അബൂദബി: സായിദ് അന്താരാഷ്ട്ര വിമാനത്താവളത്തിൽ (AUH) എത്തുന്ന എല്ലാ വിദേശ യാത്രക്കാർക്കും സൗജന്യ വിസിറ്റർ സിം കാർഡ് നൽകും. അബൂദബി വിമാനത്താവള അതോറിറ്റിയും (Abu Dhabi Airports) ഇ ആൻഡ് (e&) ഉം ചേർന്നാണ് ഈ പുതിയ പദ്ധതി പ്രഖ്യാപിച്ചത്.

ഈ സിം കാർഡിൽ ആദ്യ 24 മണിക്കൂറിലേക്ക് 10GB ഡാറ്റ സൗജന്യമായി ലഭിക്കും. വിമാനത്താവളത്തിൽ ഇറങ്ങുന്ന ഉടൻ തന്നെ സന്ദർശകർക്ക് ഇന്റർനെറ്റ് കണക്ഷൻ ഉറപ്പാക്കുക എന്നതാണ് ഇതുവഴി  ലക്ഷ്യമിടുന്നത്.

മാപ്പുകൾ, ടാക്സി ബുക്കിംഗ് (ride-hailing), ഡിജിറ്റൽ പേയ്മെന്റുകൾ, മെസ്സേജിങ് ആപ്പുകൾ, അബൂദബി പാസ് ഉൾപ്പെടെയുള്ള അവശ്യ ഡിജിറ്റൽ സേവനങ്ങൾ എളുപ്പത്തിൽ ആക്‌സസ് ചെയ്യാൻ ഇത് യാത്രക്കാരെ സഹായിക്കും. 

ALSO READ: ദേശീയ ദിനം ആഘോഷമാക്കി ഒമാൻ; രാജ്യമെങ്ങും ആഘോഷത്തിമിർപ്പിൽ

അബൂദബി എയർപോർട്ടിന്റെ ഡിജിറ്റൽ പരിവർത്തനത്തിന്റെ ഭാഗമായാണ് ഈ നീക്കം. ലോകോത്തര നിലവാരമുള്ള യാത്ര അനുഭവം നൽകാനും യാത്ര സുഗമമാക്കാനും ഇത് സഹായിക്കുമെന്ന് അധികൃതർ പറഞ്ഞു. തുടർച്ചയായ മൂന്ന് വർഷം 'ആഗോളതലത്തിൽ ഏറ്റവും മികച്ച അറൈവൽ എയർപോർട്ട്' ആയി സായിദ് അന്താരാഷ്ട്ര വിമാനത്താവളം തിരഞ്ഞെടുക്കപ്പെട്ടിട്ടുണ്ട്.

കണക്റ്റിവിറ്റി മെച്ചപ്പെടുത്താനും യാത്രക്കാർക്ക് വേഗത്തിലുള്ള സേവനം നൽകാനും ഈ സഹകരണം സഹായിക്കുമെന്ന് അബൂദബി എയർപോർട്ട്സ് സിഇഒ എലേന സോർലിനി വ്യക്തമാക്കി.  

സായിദ് ഇന്റർനാഷണൽ എയർപോർട്ടിൽ തടസ്സമില്ലാത്ത കണക്റ്റിവിറ്റി നൽകുന്നതിലൂടെ വിനോദസഞ്ചാരികൾക്ക് അബൂദബിയിൽ എത്തുന്ന നിമിഷം മുതൽ വീട്ടിലെത്തിയതുപോലെയുള്ള അനുഭവം നൽകാൻ സഹായിക്കുമെന്ന് ഇ ആൻഡ് യുഎഇ സിഇഒ മസൂദ് എം. ഷരീഫ് മഹ്മൂദ് വ്യക്തമാക്കി. 

The Abu Dhabi Airports and e& have partnered to offer complimentary visitor SIM cards with 10GB of free data for the first 24 hours to all international travelers arriving at Zayed International Airport (AUH).