കാസർഗോഡ്: സംസ്ഥാനത്തെ ജില്ല കോടതികളിൽ അജ്ഞാത ബോംബ് ഭീഷണി. കാസർഗോഡ്, ഇടുക്കി, മഞ്ചേരി ജില്ല കോടതികളിലാണ് ബോംബ് വെച്ചതായി ഇ-മെയിൽ സന്ദേശം എത്തിയത്. കോടതികളിൽ പൊലിസ് പരിശോധന തുടങ്ങിയിട്ടുണ്ട്.

വ്യാഴാഴ്ച പുലർച്ചെ 3.22ന് ആണ് ഇ-മെയിൽ സന്ദേശം വന്നിട്ടുള്ളത്. മൂന്ന് ആർ.ഡി.എക്സ് അടങ്ങിയ ഒരു മനുഷ്യ ചാവേർ ബോംബ് സ്ഥാപിച്ചിട്ടുണ്ട് എന്നാണ് സന്ദേശം. ഇതേതുടർന്ന് കോടതി സമുച്ചയങ്ങളിൽ നിന്ന് ജീവനക്കാരെയും അഭിഭാഷകരെയും ഉൾപ്പടെ ആളുകളെ മാറ്റി.

ALSO READ: യുപിയിൽ 14 കാരിയെ പീഡനത്തിനിരയാക്കി പൊലിസ് ഇൻസ്പെക്ടറും യൂട്യൂബറും; ഒരാൾ അറസ്റ്റിൽ, കേസെടുക്കാതിരുന്നവർക്ക് സസ്‌പെൻഷൻ

'നിങ്ങളുടെ കോടതിയിൽ മൂന്ന് ആർ.ഡി.എക്സ് അടങ്ങിയ ഒരു മനുഷ്യ ചാവേർ ബോംബ് സ്ഥാപിച്ചിട്ടുണ്ട്. ഉച്ചക്ക് 1.15ന് മുൻപ് ജഡ്ജിമാരെ ഒഴിപ്പിക്കുക'- എന്ന സന്ദേശമാണ് ഇ-മെയിൽ വഴി ലഭിച്ചത്. കോടതിക്ക് സമീപം റിമോട്ട് കൺട്രോൾ ബോംബുകൾ സ്ഥാപിച്ചിട്ടുണ്ട് എന്നും ബോംബുകൾ പൊട്ടിത്തെറിച്ചില്ലെങ്കിൽ ചാവേർ ആക്രമണം ഉണ്ടാകുമെന്നും ഇ-മെയിലിൽ പറയുന്നു. 

പൊലിസും ബോംബ് ഡോഗ് സ്ക്വാഡും കോടതികളിൽ എത്തി പരിശോധന തുടരുകയാണ്. ഒഴിപ്പിച്ച ആളുകളെ പരിശോധനയ്ക്ക് ശേഷം തിരിച്ച് പ്രവേശിപ്പിച്ചിട്ടുണ്ട്. ഇതുവരെയുള്ള പരിശോധനയിൽ അസാധാരണമായി ഒന്നും കണ്ടെത്താൻ ഉദ്യോഗസ്ഥർക്ക് കഴിഞ്ഞിട്ടില്ല.

ALSO READ: 'വിധി പറയാന്‍ അര്‍ഹയല്ല, നടനെതിരായ തെളിവുകള്‍ പരിഗണിച്ചില്ല'; ഗുരുതര പരാമര്‍ശങ്ങളുമായി നിയമോപദേശം

തമിഴ് ലിബറേഷൻ ആർമിയുടെ പേരിലാണ് സന്ദേശമെത്തിയത്. മുഹമ്മദ് അസ്ലം വിക്രം എന്ന പേരാണ് സന്ദേശത്തിൽ നൽകിയിട്ടുള്ളത്. എന്നാൽ വ്യാജമാണോ യാഥാർത്ഥമാണോ എന്നറിവില്ല. സംഭവത്തിൽ പൊലിസ് കേസെടുത്ത് അന്വേഷണം ആരംഭിച്ചിട്ടുണ്ട്.