ടി-20 ഫോർമാറ്റിൽ പുത്തൻ നാഴികക്കല്ല് സ്വന്തമാക്കി മലയാളി താരം സഞ്ജു സാംസൺ. സയ്യിദ് മുഷ്താഖ് അലി ട്രോഫിയിലെ ആദ്യ മത്സരത്തിൽ ഒഡീഷക്കെതിരെ നേടിയ അർദ്ധ സെഞ്ച്വറിയോടെയാണ് സഞ്ജു ഈ നേട്ടം കൈവരിച്ചത്. ടി-20യിൽ 50 അർദ്ധ സെഞ്ച്വറികൾ പൂർത്തിയാക്കാനാണ് സഞ്ജുവിന് സാധിച്ചത്. 

ടി-20യിൽ 314 മത്സരങ്ങളിൽ നിന്നും 7814 റൺസാണ് സഞ്ജു നേടിയിട്ടുള്ളത്. ആറ് സെഞ്ച്വറികളും 50 അർദ്ധ സെഞ്ച്വറികളുമാണ് സഞ്ജു ഇതുവരെ നേടിയിട്ടുള്ളത്. ഒഡീഷക്കെതിരെ 41 പന്തിൽ ഒരു സിക്സും ആറ് ഫോറും ഉൾപ്പെടെ 51 റൺസ് നേടിയാണ് സഞ്ജു തിളങ്ങിയത്. മത്സരത്തിൽ 10 വിക്കറ്റിന്റെ വമ്പൻ വിജയമാണ് കേരളം സ്വന്തമാക്കിയത്. 

മത്സരത്തിൽ ആദ്യം ബാറ്റ് ചെയ്ത ഒഡീഷ നിശ്ചിത 20 ഓവറിൽ 7 വിക്കറ്റ് നഷ്ടത്തിൽ 176 റൺസെടുത്തു. വിജയലക്ഷ്യം പിന്തുടർന്ന കേരളം 16.3 ഓവറിൽ വിക്കറ്റ് നഷ്ടമില്ലാതെ ലക്ഷ്യം മറികടന്നു. സെഞ്ച്വറി നേടിയ രോഹൻ കുന്നുമ്മലും കേരളത്തിന്റെ വിജയത്തിൽ നിർണായകമായി. 60 പന്തുകൾ നേരിട്ട രോഹൻ, 10 സിക്സറുകളും,10 ഫോറുകളും സഹിതം 121 റൺസുമായി പുറത്താവാതെ നിന്നു.

അതേസമയം നീണ്ട നാളത്തെ ചർച്ചകൾക്കെല്ലാം വിരമായിട്ടുകൊണ്ട് സഞ്ജു സാംസൺ നിലവിൽ ചെന്നൈ സൂപ്പർ കിങ്സിലെത്തിയിരിക്കുകയാണ്. രാജസ്ഥാനൊപ്പമുള്ള നീണ്ട വർഷക്കാലത്തെ ഐതിഹാസികമായ ക്രിക്കറ്റ് യാത്രക്ക് വിരാമമിട്ടാണ് സഞ്ജു ചെന്നൈയിലേക്ക് കൂടുമാറിയത്. ഇന്ത്യൻ സ്റ്റാർ ഓൾ റൗണ്ടർ രവീന്ദ്ര ജഡേജ, ഇംഗ്ലണ്ട് ഓൾ റൗണ്ടർ സാം കറൻ എന്നിവരെ രാജസ്ഥാന് കൈമാറിയാണ് ചെന്നൈ ഈ ട്രേഡ് പൂർത്തിയാക്കിയത്. ശിവം ദുബെ, ഡെവാൾഡ് ബ്രെവിസ് എന്നിവരിലൊരാളെ വേണമെന്നും രാജസ്ഥാൻ ആവശ്യപ്പെട്ടിരുന്നു. എന്നാൽ സി.എസ്.കെ അതിന് തയ്യാറാവാതെ ഇരിക്കുകയായിരുന്നു. ഇതോടെയാണ് ജഡേജ, കറൻ എന്നീ താരങ്ങളെ രാജസ്ഥാൻ ആവശ്യപ്പെട്ടത്. 

18 കൊടിക്കാണ് മലയാളി സൂപ്പർതാരത്തെ ചെന്നൈ സ്വന്തമാക്കിയത്. ഇതോടെ ഓസ്‌ട്രേലിയൻ ഓൾ റൗണ്ടർ കാമറൂൺ ഗ്രീനിന്റെ റെക്കോർഡ് തകർത്തുകൊണ്ട് ഐപിഎൽ ചരിത്രത്തിൽ ഏറ്റവും ഉയർന്ന തുകക്ക് കൈമാറ്റം ചെയ്യപ്പെടുന്ന താരമായും സഞ്ജു മാറി. ഗ്രീൻ 2024ൽ 17.5 കോടിക്കായിരുന്നു മുംബൈ ഇന്ത്യൻസിൽ നിന്നും റോയൽ ചലഞ്ചേഴ്‌സ് ബെംഗളൂരുവിലേക്ക് കൂടുമാറിയത്. 

kerala star player Sanju Samson has achieved a new milestone in the T20 format. Sanju achieved this feat with a half-century against Odisha in the first match of the Syed Mushtaq Ali Trophy. Sanju was able to complete 50 half-centuries in T20.