മസ്‌കത്ത്: ഒമാന്‍ ബൊട്ടാനിക് ഗാര്‍ഡന്‍ ഔദ്യോഗികമായി മസ്‌കത്ത് മുനിസിപ്പാലിറ്റിക്ക് കൈമാറി. പൈതൃകടൂറിസം മന്ത്രാലയത്തിന്റെ നേതൃത്വത്തില്‍ നടപ്പാക്കിയ പദ്ധതിയുടെ കൈമാറ്റ നടപടികളാണ് പൂര്‍ത്തിയായത്.

സുല്‍ത്താന്‍ ഖാബൂസ് സര്‍വകലാശാലയ്ക്ക് സമീപമുള്ള അല്‍ ഖൗദ് പ്രദേശത്താണ് ബൊട്ടാനിക് ഗാര്‍ഡന്‍ സ്ഥിതി ചെയ്യുന്നത്. ഏകദേശം 430 ഹെക്ടര്‍ വിസ്തീര്‍ണ്ണത്തില്‍ വ്യാപിച്ചിരിക്കുന്ന തോട്ടം ഒമാനിലെ വിവിധ പ്രദേശങ്ങളിലെ തദ്ദേശീയ സസ്യങ്ങളെ ഒരിടത്ത് പരിചയപ്പെടുത്തുന്ന പദ്ധതിയാണ്.

തോട്ടത്തിന്റെ പരിപാലനം, പ്രവര്‍ത്തനം, പൊതുജനങ്ങള്‍ക്ക് തുറന്നുനല്‍കല്‍ എന്നിവ ഇനി മുതല്‍ മസ്‌കത്ത് മുനിസിപ്പാലിറ്റിയുടെ ചുമതലയിലായിരിക്കും. പരിസ്ഥിതി സംരക്ഷണം, വിദ്യാഭ്യാസം, വിനോദസഞ്ചാരം എന്നിവയ്ക്ക് സഹായകരമായ കേന്ദ്രമായി ബൊട്ടാനിക് ഗാര്‍ഡന്‍ വികസിപ്പിക്കാനാണ് ലക്ഷ്യമെന്ന് അധികൃതര്‍ അറിയിച്ചു.