മനാമ: ബഹ്‌റൈനിലെ എക്‌സ്പ്രസ് നിയന്ത്രണങ്ങള്‍ തുടരുന്ന സാഹചര്യത്തില്‍ ഗള്‍ഫ് എയര്‍ തങ്ങളുടെ താല്‍ക്കാലിക വിമാന സര്‍വീസുകള്‍ സൗദി അറേബ്യയിലെ ദമാം വഴി ഏപ്രില്‍ 30 വരെ നീട്ടിയതായി അറിയിച്ചു. നിലവിലെ സുരക്ഷാ സാഹചര്യം തുടരുന്നതിനാല്‍ സാധാരണ സര്‍വീസുകള്‍ പുനരാരംഭിക്കാന്‍ കഴിയാത്ത സാഹചര്യത്തിലാണ് ഈ തീരുമാനം.

ബഹ്‌റൈന്‍ അന്താരാഷ്ട്ര വിമാനത്താവളത്തിലേക്കും അവിടെനിന്നും നടത്തുന്ന പതിവ് സര്‍വീസുകള്‍ക്ക് ഇപ്പോഴും നിയന്ത്രണങ്ങള്‍ തുടരുകയാണ്. ഇതോടെ യാത്രക്കാരുടെ യാത്ര തുടര്‍ച്ച ഉറപ്പാക്കുന്നതിനായി ദമ്മാമിലെ കിംഗ് ഫഹദ് ഇന്റര്‍നാഷണല്‍ എയര്‍പോര്‍ട്ട് വഴി ഇടക്കാല ക്രമീകരണങ്ങള്‍ ഒരുക്കിയിരിക്കുകയാണ്.

ലണ്ടന്‍, മുംബൈ, ചെന്നൈ, ബാങ്കോക്ക് തുടങ്ങി നിരവധി പ്രധാന അന്താരാഷ്ട്ര ലക്ഷ്യസ്ഥാനങ്ങളിലേക്കുള്ള സര്‍വീസുകള്‍ ഇപ്പോള്‍ ദമ്മാം വഴിയാണ് നടത്തുന്നത്. ഈ സംവിധാനത്തിന്റെ ഭാഗമായി ബഹ്‌റൈനില്‍ നിന്ന് ദമ്മാമിലേക്ക് യാത്രക്കാരെ എത്തിക്കുന്നതിനും തിരിച്ചും പ്രത്യേക ഗതാഗത സൗകര്യങ്ങളും ഏര്‍പ്പെടുത്തിയിട്ടുണ്ട്.

ആദ്യഘട്ടത്തില്‍ കുറച്ച് ദിവസങ്ങള്‍ക്കായി മാത്രം പ്രഖ്യാപിച്ചിരുന്ന ഈ താല്‍ക്കാലിക സര്‍വീസുകള്‍, നിലവിലെ സാഹചര്യം മാറാത്തതിനാല്‍ വീണ്ടും നീട്ടേണ്ടി വന്നതാണെന്ന് ഗള്‍ഫ് എയര്‍ വ്യക്തമാക്കി. എയര്‍സ്‌പേസ് തുറക്കുന്നതില്‍ വ്യക്തതയില്ലാത്തതിനാല്‍ മുന്‍കരുതലായാണ് ഈ തീരുമാനം എടുത്തത്.

യാത്രക്കാരുടെ സൗകര്യം മുന്‍നിര്‍ത്തിയാണ് എല്ലാ ക്രമീകരണങ്ങളും ഒരുക്കിയിരിക്കുന്നതെന്ന് എയര്‍ലൈന്‍ അധികൃതര്‍ അറിയിച്ചു. ട്രാന്‍സിറ്റ് യാത്രകള്‍ സുഗമമാക്കുന്നതിനായി ആവശ്യമായ നിര്‍ദേശങ്ങളും സഹായവും നല്‍കുന്നുണ്ട്. യാത്രയ്ക്ക് മുമ്പ് ഷെഡ്യൂള്‍ വിവരങ്ങള്‍ പരിശോധിക്കണമെന്നും യാത്രക്കാര്‍ക്ക് നിര്‍ദേശം നല്‍കിയിട്ടുണ്ട്.

ALSO READ: ബഹ്‌റൈനിൽ കനത്ത മഴയിൽ വീടിന്റെ മേൽക്കൂര തകർന്നുവീണു; വൻ ദുരന്തം ഒഴിവായി, വീട് നിർമിച്ചത്

ഗള്‍ഫ് മേഖലയിലെ നിലവിലെ സംഘര്‍ഷാവസ്ഥയും അതിനെ തുടര്‍ന്ന് ഉണ്ടായ എയര്‍സ്‌പേസ് നിയന്ത്രണങ്ങളുമാണ് ഈ സാഹചര്യം ഉണ്ടാക്കിയത്. സ്ഥിതി സാധാരണ നിലയിലേക്ക് മടങ്ങിയാല്‍ മാത്രമേ ബഹ്‌റൈനില്‍ നിന്ന് നേരിട്ടുള്ള സര്‍വീസുകള്‍ പൂര്‍ണ്ണമായും പുനരാരംഭിക്കാനാകൂ എന്നതാണ് അധികൃതരുടെ നിലപാട്.

ഇതിനിടെ, ദമാം വഴി തുടരുന്ന ഈ ഇടക്കാല സര്‍വീസുകള്‍ യാത്രക്കാര്‍ക്ക് വലിയ ആശ്വാസമാണ് നല്‍കുന്നത്. സര്‍വീസുകള്‍ പൂര്‍ണ്ണമായും സാധാരണ നിലയിലാകുന്നതുവരെ ഈ സംവിധാനം തുടരുമെന്ന സൂചനയും ലഭിക്കുന്നു.

Gulf Air extends its temporary flight operations via Dammam until April 30 as Bahrain airspace restrictions continue, ensuring limited passenger connectivity.