തിരുവനന്തപുരം: തിരുവനന്തപുരത്ത് മേയര്‍ സ്ഥാനാര്‍ഥിയായി ബി.ജെ.പി വി.വി രാജേഷിനെ പ്രഖ്യാപിച്ചു. ആര്‍. ശ്രീലേഖ മേയറാകുമെന്ന തരത്തില്‍ വാര്‍ത്തകള്‍ പ്രചരിക്കുന്നതിനിടെയാണ് പ്രഖ്യാപനം വന്നിരിക്കുന്നത്. ഇതു സംബന്ധിച്ച് ചര്‍ച്ചകള്‍ നടന്നിരുന്നെങ്കിലും ഒരു വിഭാഗം ഇതിനെ എതിര്‍ത്തിരുന്നു. വിഷയത്തില്‍ ശ്രീലേഖയുടെ വീട്ടില്‍ നടന്ന ചര്‍ച്ചയില്‍ നേതാക്കള്‍ കാര്യം ധരിപ്പിക്കുകയും ചെയ്തിരുന്നു. ശ്രീലേഖയെ മേയറാക്കുന്നതിനെതിരെ ബി.ജെ.പി കൗണ്‍സിലര്‍മാര്‍ക്കിടയില്‍ തന്നെ ഭിന്നത ഉണ്ടായിരുന്നു. വി.വി രാജേഷിന് ആര്‍.എസ്.എസ് വിഭാഗത്തിന്റെ പിന്തുണ ലഭിക്കുകയും ചെയ്തിരുന്നു.

ബി.ജെ.പി ജില്ലാ അധ്യക്ഷനായിരുന്ന വി.വി രാജേഷിന്റെയും ആര്‍ ശ്രീലേഖയുടെയും പേരുകള്‍ ആയിരുന്നു കൂടുതല്‍ സാധ്യതയില്‍ ഉണ്ടായിരുന്നത്. രാജേഷിനെ മേയര്‍ ആക്കണമെന്നായിരുന്നു ആര്‍.എസ്.എസിന്റെയും അഭിപ്രായം. ഒപ്പം കരമന അജിത്, എം.ആര്‍ ഗോപന്‍ തുടങ്ങിയവരുടെ പേരുകള്‍ പരിഗണിക്കപ്പെട്ടിരുന്നു. ഇവരെയൊക്കെയും അവഗണിച്ച് ബി.ജെ.പിയില്‍ പ്രവര്‍ത്തി പരിചയം പോലുമില്ലാത്ത ആര്‍ ശ്രീലേഖക്കാണ് സംസ്ഥാന അധ്യക്ഷന്‍ ഉള്‍പ്പെടെയുള്ള ഒരു വിഭാഗം പിന്തുണ പ്രഖ്യാപിച്ചത്.

ALSO READ: തൃശൂര്‍ മേയറാകാന്‍ ഡോ. നിജി ജസ്റ്റിന്‍; ഡെപ്യൂട്ടി മേയർ സ്ഥാനത്തേക്ക് എ പ്രസാദ്

കഴിഞ്ഞദിവസം കൗണ്‍സിലര്‍മാരെ നേരില്‍ കണ്ടും സംസ്ഥാന അധ്യക്ഷന്‍ അഭിപ്രായം ആരാഞ്ഞിരുന്നു. കൂടുതല്‍ പേരും ആര്‍ ശ്രീലേഖക്കെതിരെ എതിര്‍പ്പ് രേഖപ്പെടുത്തുകയായിരുന്നു. 

ശ്രീലേഖക്ക് നിയമസഭാ തെരഞ്ഞെടുപ്പില്‍ ജയസാധ്യത ഉള്ള സീറ്റ് വാഗ്ദാനം ചെയ്‌തെന്നും റിപ്പോര്‍ട്ടുണ്ട്. ഇടതുകോട്ടയായിരുന്ന തിരുവനന്തപുരം കോര്‍പ്പറേഷന്‍ നാല്‍പ്പതു വര്‍ഷത്തിനു ശേഷമാണ് ബി.ജെപി നേടുന്നത്.

bjp has announced v v rajesh as its mayoral candidate in thiruvananthapuram, putting an end to speculation about r sreelekha. the decision reportedly came amid internal differences within the party.