തിരുവനന്തപുരം: ശബരിമല സ്വര്‍ണ്ണക്കൊള്ള കേസില്‍ നിര്‍ണായക നീക്കങ്ങളുമായി പ്രത്യേക അന്വേഷണ സംഘം. കേസില്‍ യു.ഡി.എഫ് കണ്‍വീനര്‍ അടൂര്‍ പ്രകാശിനെ ചോദ്യം ചെയ്യാന്‍ എസ്.ഐ.ടി നീക്കം. 

കേസിലെ മുഖ്യപ്രതിയായ ഉണ്ണികൃഷ്ണന്‍ പോറ്റിയുമായുള്ള ബന്ധത്തെക്കുറിച്ച് കൂടുതല്‍ വ്യക്തത വരുത്തുന്നതിനാണ് അടൂര്‍ പ്രകാശിനെ വിളിപ്പിക്കുന്നത്. പോറ്റിക്കൊപ്പം അടൂര്‍ പ്രകാശ് നടത്തിയ ഡല്‍ഹി യാത്ര ഉള്‍പ്പെടെയുള്ള വിവരങ്ങള്‍ സംഘം ശേഖരിക്കും. ഉണ്ണികൃഷ്ണന്‍ പോറ്റി സോണിയാഗാന്ധിയെ കാണാന്‍ പോകുമ്പോള്‍ അടൂര്‍ പ്രകാശ് ഒപ്പമുണ്ടായിരുന്നു. 

തന്റെ മണ്ഡലത്തിലെ വോട്ടറായ ഉണ്ണികൃഷ്ണന്‍ പോറ്റി സോണിയാ ഗാന്ധിയുടെ അപ്പോയിന്റ്‌മെന്റ് എടുത്തപ്പോള്‍ തന്നെയും ഒപ്പം കൂട്ടുകയായിരുന്നുവെന്നാണ് അടൂര്‍ പ്രകാശിന്റെ വിശദീകരണം. പോറ്റിയുമായി തനിക്ക് സാമൂഹ്യ സേവന പ്രവര്‍ത്തനങ്ങളിലൂടെയുള്ള ബന്ധം മാത്രമേയുള്ളൂവെന്നും അടൂര്‍ പ്രകാശ് പറഞ്ഞിരുന്നു. 

നേരത്തെ മുന്‍ ദേവസ്വം മന്ത്രി കടകംപള്ളി സുരേന്ദ്രന്‍, മുന്‍ ദേവസ്വം ബോര്‍ഡ് പ്രസിഡന്റ് പി.എസ് പ്രശാന്ത് എന്നിവരുടെ മൊഴി രേഖപ്പെടുത്തിയിരുന്നു. ഇതിന് പിന്നാലെയാണ് അടൂര്‍ പ്രകാശിലേക്കും അന്വേഷണം നീളുന്നത്.  

ഉണ്ണികൃഷ്ണന്‍ പോറ്റിയെ അറിയാമെങ്കിലും സ്വര്‍ണം പൂശല്‍ പോറ്റിയെ ഏല്‍പിക്കാനുള്ള ബോര്‍ഡ് തീരുമാനത്തില്‍ ഇടപെട്ടില്ലെന്ന് കടകംപള്ളി മൊഴി നല്‍കി. പ്രധാനപ്രതി ഉണ്ണികൃഷ്ണന്‍ പോറ്റിയുമായുള്ള ബന്ധത്തെ കുറിച്ചുള്ള ചോദ്യത്തിന് സ്പോണ്‍സര്‍ എന്ന നിലയില്‍ പോറ്റിയെ അറിയാമെന്നും എന്നാല്‍ ഇടപാടുകളില്‍ പങ്കില്ലെന്നും സ്വര്‍ണപ്പാളികള്‍ പോറ്റിക്ക് കൈമാറാനുള്ള തീരുമാനത്തില്‍ ദേവസ്വം മന്ത്രി എന്ന നിലയില്‍ ഇടപെട്ടില്ലെന്നുമാണ് കടകംപള്ളി മൊഴിനല്‍കിയത്.

സ്വര്‍ണപ്പാളി കൈമാറാനുള്ള തീരുമാനം താന്‍ ഒറ്റയ്ക്ക് എടുത്തതല്ലെന്ന എ.പത്മകുമാറിന്റെ മൊഴിയുടെ അടിസ്ഥാനത്തിലാണ് അന്വേഷണ സംഘം കടകംപള്ളി സുരേന്ദ്രനെ ചോദ്യം ചെയ്തത്. 2019ല്‍ പത്മകുമാര്‍ ബോര്‍ഡ് പ്രസിഡന്റായിരുന്ന കാലത്ത് ഉണ്ണികൃഷ്ണന്‍ പോറ്റിക്ക് സ്വര്‍ണപ്പാളികള്‍ കൈമാറിയപ്പോള്‍ കടകംപള്ളിയായിരുന്നു ദേവസ്വം മന്ത്രി. മറ്റുള്ളവരുടെ മൊഴിയെടുത്ത ശേഷം ആവശ്യമെങ്കില്‍ കടകംപള്ളിയെ വീണ്ടും വിളിപ്പിക്കാനാണ് അന്വേഷണസംഘത്തിന്റെ തീരുമാനം. 

ദ്വാരപാലക ശില്‍പം സ്വര്‍ണം പൂശുന്നതിന് കൊണ്ടുപോയ കാര്യങ്ങളാണ് ചോദിച്ചതെന്ന് പി.എസ് പ്രശാന്ത് പറഞ്ഞു. സ്റ്റേറ്റ്‌മെന്റ് രേഖപ്പെടുത്തുകയാണ് ചെയ്തത്. കൃത്യമായ ഉത്തരം നല്‍കിയിട്ടുണ്ടെന്നും പ്രശാന്ത് പറഞ്ഞു. ആദ്യ വീഴ്ചയ്ക്കു ശേഷവും കഴിഞ്ഞ ദേവസ്വം ബോര്‍ഡിന്റെ കാലത്ത് വീണ്ടും ദ്വാരപാലക പാളികള്‍ പോറ്റിക്ക് കൈമാറിയത് സംബന്ധിച്ചാണ് പി.എസ് പ്രശാന്തിനെ ചോദ്യം ചെയ്തത്. 

The Special Investigation Team (SIT) probing the Sabarimala gold smuggling case is planning to question UDF convener Adoor Prakash as part of a crucial phase of the investigation. The move aims to clarify his association with the prime accused, Unnikrishnan Potti.