മസ്‌കത്ത്: ഒമാൻ പൗരത്വത്തിനും ദേശീയതയുമായി ബന്ധപ്പെട്ട സേവനങ്ങൾക്കും പുതിയ ഫീസ്നിരക്ക് ഏർപ്പെടുത്തി. ഇത് സംബന്ധിച്ച ഔദ്യോഗിക ഉത്തരവ് ഗസറ്റിൽ പ്രസിദ്ധീകരിച്ചു. ഇന്നലെ മുതൽ തന്നെ പുതുക്കിയ നിരക്കുകൾ പ്രാബല്യത്തിലായിരുന്നു.

ALSO READ: മനുഷ്യക്കടത്ത് തടയാനുള്ള നടപടികൾ ശക്തമാക്കി ഒമാൻ 

പുതുക്കിയ ഫീസ് നിരക്കുകൾ

ഒമാനി പൗരത്വം ലഭിക്കുന്നതിനായുള്ള അപേക്ഷകൾക്ക് ഇനിമുതൽ 600 ഒമാനി റിയാൽ ഫീസ് നൽകണം. ഒമാനി പൗരന്മാരെ വിവാഹം കഴിച്ച വിദേശ വനിതകൾ, ഒമാനികളുടെ വിധവകൾ, വിവാഹമോചിതരായ ഇണകൾ, ഒമാനി വനിതകളുടെ പ്രായപൂർത്തിയാകാത്ത മക്കൾ എന്നിവർ സമർപ്പിക്കുന്ന അപേക്ഷകൾക്കും ഇതേ നിരക്ക് ബാധകമാകും. അതേസമയം, ഒമാനി പൗരത്വം പിൻവലിക്കുന്നതിനോ ഉപേക്ഷിക്കുന്നതിനോ ഉള്ള അപേക്ഷകൾക്ക് 200 ഒമാനി റിയാൽ ഫീസായി നൽകേണ്ടതുണ്ടെന്നും പുതിയ ഉത്തരവിൽ വ്യക്തമാക്കുന്നു.

ദേശീയ സേവനങ്ങളുമായി ബന്ധപ്പെട്ട ഭരണപരമായ നടപടിക്രമങ്ങൾ ഏകീകരിക്കുന്നതിന്റെ ഭാഗമായാണ് ഫീസ് പുതുക്കി നിശ്ചയിച്ചിരിക്കുന്നത്. എന്നാൽ, പൗരത്വം ലഭിക്കുന്നതിനുള്ള യോഗ്യതാ മാനദണ്ഡങ്ങളിലോ മറ്റ് നിയമപരമായ നിബന്ധനകളിലോ മാറ്റങ്ങൾ വരുത്തിയിട്ടില്ലെന്ന് അധികൃതർ വ്യക്തമാക്കി. സേവന ഫീസുകളിൽ മാത്രമാണ് ഇപ്പോൾ മാറ്റം വരുത്തിയിട്ടുള്ളത്.

ALSO READ: സലാലയിലേക്ക് വിദേശികളുടെ ഒഴുക്ക്; വിമാനത്താവളങ്ങൾ വഴി യാത്ര ചെയ്തവരുടെ എണ്ണത്തിൽ 10 ശതമാനം വർദ്ധനവ് 

സുൽത്താനേറ്റിലുടനീളമുള്ള പൗരത്വ സേവനങ്ങളെ കൂടുതൽ ക്രമീകൃതമാക്കാൻ പുതിയ ഫീസ് ഘടന സഹായിക്കുമെന്നാണ് വിലയിരുത്തപ്പെടുന്നത്.

oman has announced a revised fee structure for citizenship related services including updated application charges. the changes aim to streamline procedures enhance administrative efficiency and clarify costs for applicants while aligning fees with service delivery and regulatory requirements.