തിരുവനന്തപുരം: ശരീരത്തിനുള്ളില്‍ ഒളിപ്പിച്ച് മയക്കുമരുന്ന് കടത്താന്‍ ശ്രമിച്ച യുവാവിനെ സിറ്റി ഡാന്‍സാഫ് സംഘം പിടികൂടി. രാജാജി നഗര്‍ സ്വദേശി ബിജുവാണ് 110 ഗ്രാം എംഡിഎംഎയുമായി പിടിയിലായത്. ബംഗളൂരുവില്‍ നിന്നാണ് പ്രതി മയക്കുമരുന്ന് എത്തിച്ചത്. രഹസ്യവിവരത്തെ തുടര്‍ന്ന് കസ്റ്റഡിയിലെടുത്ത ബിജുവിനെ ജനറല്‍ ആശുപത്രിയില്‍ എത്തിച്ച് എക്‌സ്‌റേ പരിശോധനയ്ക്ക് വിധേയമാക്കിയപ്പോഴാണ് എംഡിഎംഎ കണ്ടെത്തിയത്. സ്വകാര്യ ഭാഗത്ത് ഒളിപ്പിച്ച നിലയിലായിരുന്നു ലഹരിമരുന്ന്. പ്രതിയെ തുടര്‍ നടപടികള്‍ക്കായി കന്റോണ്‍മെന്റ് പൊലിസിന് കൈമാറി.

ആനയറയിലും വന്‍ ലഹരിമരുന്ന് വേട്ട
കഴിഞ്ഞ ദിവസം തിരുവനന്തപുരത്ത് നടന്ന മറ്റൊരു പരിശോധനയില്‍ 157 ഗ്രാം എംഡിഎംഎയുമായി രണ്ട് യുവാക്കള്‍ കൂടി പിടിയിലായി. ആനയറ സ്വദേശി നന്ദു, ചെറിയകൊണ്ണി സ്വദേശി നന്ദഹരി എന്നിവരെയാണ് എക്‌സൈസ് സംഘം പിടികൂടിയത്. രഹസ്യ വിവരത്തിന്റെ അടിസ്ഥാനത്തില്‍ നടത്തിയ വാഹന പരിശോധനയ്ക്കിടെ വസ്ത്രത്തിനുള്ളില്‍ ഒളിപ്പിച്ച നിലയിലാണ് മയക്കുമരുന്ന് കണ്ടെത്തിയത്. ഇവരുടെ സ്‌കൂട്ടറും എക്‌സൈസ് കസ്റ്റഡിയിലെടുത്തു.

ജോയിന്റ് എക്‌സൈസ് കമ്മീഷണര്‍ ആര്‍. ഗോപകുമാര്‍, ഡെപ്യൂട്ടി എക്‌സൈസ് കമ്മീഷണര്‍ പി.എല്‍ ഷിബു എന്നിവര്‍ സംഭവസ്ഥലം സന്ദര്‍ശിച്ചു. പ്രിവന്റീവ് ഓഫിസര്‍മാരായ മോന്‍സി, രഞ്ജിത്ത് തുടങ്ങിയവരുടെ നേതൃത്വത്തിലുള്ള സംഘമാണ് പരിശോധന നടത്തിയത്.

Thiruvananthapuram police and excise officials have intensified their crackdown on drug trafficking, arresting a man who concealed 110g of MDMA in a private body part and two others with 157g of the synthetic drug.