വിശാഖപട്ടണം: കാമുകിയായ യുവതിയെ വീട്ടിലേക്ക് വിളിച്ചുവരുത്തി കൊലപ്പെടുത്തിയ നാവികസേനാ ഉദ്യോഗസ്ഥന്‍ അറസ്റ്റില്‍. ഐ.എന്‍.എസ് ദേഗയില്‍ ജോലിചെയ്യുന്ന ചിന്താട രവീന്ദ്ര(35)യാണ് കാമുകി മൗനിക(29)യെ കൊലപ്പെടുത്തിയത്. ക്രൂരമായ കൊലപാതകത്തിന് ശേഷം മൃതദേഹം കഷ്ണങ്ങളാക്കി ഫ്രിഡ്ജില്‍ സൂക്ഷിക്കുകയായിരുന്നു. 

2021ല്‍ ഡേറ്റിങ് ആപ്പിലൂടെയാണ് രവീന്ദ്ര മൗനികയെ പരിചയപ്പെട്ടത്. പിന്നീട് ഇരുവരും പ്രണയത്തിലായി. എന്നാല്‍ 2024 ല്‍ രവീന്ദ്ര മറ്റൊരു യുവതിയെ വിവാഹം ചെയ്തു. രണ്ടാഴ്ച്ച മുന്‍പ്  ഭാര്യ സ്വന്തം വീട്ടിലേക്ക് പോയതിന് പിന്നാലെ രവീന്ദ്ര മൗനികയെ വീട്ടിലേക്ക് വിളിച്ചുവരുത്തുകയായിരുന്നു. പിന്നീട് ഇരുവരും തമ്മില്‍ തര്‍ക്കമുണ്ടായി. ഇതിനിടെ രവീന്ദ്ര മൗനികയെ കൊലപ്പെടുത്തുകയായിരുന്നു. തുടര്‍ന്ന് മൃതദേഹം പല കഷ്ണങ്ങളാക്കി മുറിച്ച് ചില ബാഗങ്ങള്‍ വിജനമായ സ്ഥലത്ത് ഉപേക്ഷിക്കുകയും ബാക്കി ഭാഗങ്ങള്‍ വീട്ടിലെ ഫ്രിഡ്ജില്‍ സൂക്ഷിക്കുകയുമായിരുന്നു. മൃതദേഹം വെട്ടിമുറിക്കുന്നതിനായുള്ള കത്തി ഓണ്‍ലൈനില്‍ ഓര്‍ഡര്‍ ചെയ്യുകയായിരുന്നു. 

ALSO READ: വിവാഹപ്പന്തലിലേക്ക് പടക്കത്തില്‍ നിന്ന് തീപ്പൊരി തെറിച്ചു; കാസര്‍കോട് ഒഴിവായത് വന്‍ ദുരന്തം

കൃത്യം നടത്തിയതിന് ശേഷം രവീന്ദ്ര തന്നെ പൊലിസ് സ്റ്റേഷനിലെത്തി കുറ്റം സമ്മതിക്കുകയായിരുന്നു. മൗനിക തന്റെ കൈയില്‍ നിന്ന് 3.5 ലക്ഷം രൂപ വാങ്ങിയെന്നും തങ്ങള്‍ തമ്മിലുള്ള ബന്ധം ഭാര്യയോട് പറഞ്ഞ് ഭീഷണിപ്പെടുത്താറുണ്ടായിരുന്നുവെന്നും പ്രതി പൊലിസിനോട് പറഞ്ഞു. ഇതേചൊല്ലിയുള്ള തര്‍ക്കമാണ് കൊലപാതകത്തില്‍ കലാശിച്ചത്. 

അതേസമയം, മൗനികയുടെ കാണാതായ ശരീരഭാഗങ്ങള്‍ കണ്ടെത്താനായി പ്രത്യേക അന്വേഷണസംഘത്തെ രൂപീകരിച്ചിട്ടുണ്ട്.

A naval officer has been arrested in connection with the murder of his girlfriend, whose body was allegedly dismembered and stored in a refrigerator. The shocking crime has triggered widespread outrage, and authorities have launched a detailed investigation to uncover the circumstances and motive behind the incident