മസ്‌കത്ത്: ഒമാനും ഹംഗറിയും തമ്മിലുള്ള ഉഭയകക്ഷി ബന്ധം കൂടുതല്‍ ശക്തമാക്കാന്‍ ധാരണയായി. ഒമാന്‍ വിദേശകാര്യ മന്ത്രി സയ്യിദ് ബദ്ര് ബിന്‍ ഹമദ് അല്‍ ബുസൈദിയും ഹംഗറിയുടെ ഊര്‍ജ്ജ മന്ത്രാലയത്തിലെ പരിസ്ഥിതി കാര്യങ്ങളിലുളള സ്റ്റേറ്റ് സെക്രട്ടറി ഡോ. അനികോ റൈസും തമ്മില്‍ മസ്‌കത്തില്‍ നടന്ന കൂടിക്കാഴ്ചയിലാണ് ഇതുസംബന്ധിച്ച ചര്‍ച്ചകള്‍ നടന്നത്.

ഇരുരാജ്യങ്ങളും തമ്മിലുള്ള സൗഹൃദബന്ധം കൂടുതല്‍ വികസിപ്പിക്കുന്നതിനുള്ള മാര്‍ഗങ്ങള്‍ കൂടിക്കാഴ്ചയില്‍ പരിശോധിച്ചു. പരിസ്ഥിതി സംരക്ഷണം, ജലവിഭവങ്ങളുടെ കാര്യക്ഷമമായ ഉപയോഗം, മലിനീകരണ നിയന്ത്രണം, മാലിന്യ സംസ്‌കരണം, പുനഃചക്രീകരണം തുടങ്ങിയ മേഖലകളില്‍ സഹകരണം വര്‍ധിപ്പിക്കാനാണ് പ്രധാനമായും ചര്‍ച്ചകള്‍ നടന്നത്.

ഈ മേഖലകളില്‍ പരിചയവും സാങ്കേതിക അറിവും പങ്കുവെക്കുന്നതിനുള്ള സാധ്യതകള്‍ വിലയിരുത്തിയതായി അധികൃതര്‍ അറിയിച്ചു. പരിസ്ഥിതിയുമായി ബന്ധപ്പെട്ട ആഗോള വിഷയങ്ങളില്‍ അന്താരാഷ്ട്ര വേദികളില്‍ പരസ്പരം സഹകരിക്കാനും ധാരണയായി. സംയുക്ത പരിശീലന പരിപാടികള്‍, ഗവേഷണ സഹകരണം, വിദഗ്ധരുടെ കൈമാറ്റം എന്നിവയിലൂടെ ബന്ധം കൂടുതല്‍ ശക്തമാക്കാനുള്ള സാധ്യതകളും ചര്‍ച്ചയില്‍ ഉള്‍പ്പെടുത്തി.

സാമ്പത്തിക, സാമൂഹിക, സാംസ്‌കാരിക മേഖലകളിലെയും സഹകരണം വികസിപ്പിക്കേണ്ടതിന്റെ ആവശ്യകത ഇരുപാര്‍ശങ്ങളും ചൂണ്ടിക്കാട്ടി. നിലവില്‍ നടപ്പിലാക്കുന്ന സംയുക്ത പദ്ധതികള്‍ തുടര്‍ന്നും ശക്തിപ്പെടുത്താനും, ഭാവിയില്‍ പുതിയ സംരംഭങ്ങള്‍ ആരംഭിക്കാനുമുള്ള താത്പര്യവും യോഗത്തില്‍ പ്രകടമായി.

ALSO READ: ഒമാനില്‍ ക്യൂബ്‌സാറ്റ് ഉപഗ്രഹ പദ്ധതി ആരംഭിച്ചു

കൂടിക്കാഴ്ചയില്‍ ഒമാന്‍ പരിസ്ഥിതി അതോറിറ്റി ചെയര്‍മാന്‍ ഡോ. അബ്ദുല്ല ബിന്‍ അലി അല്‍ അമ്രി, വിദേശകാര്യ മന്ത്രാലയത്തിലെ അന്താരാഷ്ട്ര സംഘടന വിഭാഗം മേധാവി ഷെയ്ഖ് മുഹമ്മദ് ബിന്‍ അബ്ദുള്ള അല്‍ ഖത്ബി എന്നിവരും മറ്റ് ബന്ധപ്പെട്ട ഉദ്യോഗസ്ഥരും പങ്കെടുത്തു.

ഒമാനും ഹംഗറിയും തമ്മിലുള്ള ബന്ധം കൂടുതല്‍ വിപുലമാകുന്നത് പരിസ്ഥിതി സംരക്ഷണം ഉള്‍പ്പെടെയുള്ള ആഗോള വെല്ലുവിളികള്‍ നേരിടുന്നതില്‍ നിര്‍ണായകമാകുമെന്ന് യോഗത്തില്‍ പങ്കെടുത്തവര്‍ വിലയിരുത്തി.

Oman and Hungary have agreed to strengthen bilateral relations following talks in Muscat, with discussions focusing on cooperation in environmental, economic and diplomatic fields.