കൊച്ചി: സ്വര്‍ണക്കൊള്ള കേസില്‍ കുറ്റപത്രം സമര്‍പ്പിക്കാത്തതില്‍ എസ്.ഐ.ടിയെ വിമര്‍ശിച്ച് ഹൈക്കോടതി. കുറ്റപത്രം നല്‍കിയാല്‍ മാത്രമേ പ്രതികള്‍ക്ക് സ്വാഭാവിക ജാമ്യം ലഭിക്കുന്നത് തടയാനാകൂ അല്ലാത്ത പക്ഷം പൊതുജനങ്ങള്‍ക്ക് അന്വേഷണത്തില്‍ സംശയം ഉണ്ടാകുമെന്നും കോടതി പറഞ്ഞു.

അതിനിടെ എ.പത്മകുമാറിനെതിരെയുള്ള തെളിവ് ശേഖരണത്തില്‍ എസ്‌ഐടിക്ക് വീഴ്ച പറ്റിയെന്ന വിവരവും പുറത്തുവന്നു. സ്വര്‍ണ്ണം ചെമ്പെന്ന് രേഖപ്പെടുത്തിയ മിനുറ്റ്‌സ് രേഖയുമായി ബന്ധപ്പെട്ട്, മൂന്നു ദിവസം മുന്‍പ് മാത്രമാണ് എ പത്മകുമാറിന്റെ കയ്യക്ഷര പരിശോധനയ്ക്കായി സാമ്പിള്‍ ശേഖരിച്ചത്. കേസില്‍ തിരുവിതാംകൂര്‍ ദേവസ്വം ബോര്‍ഡ് മുന്‍ പ്രസിഡന്റ് പി എസ് പ്രശാന്തിന്റെ മൊഴി വീണ്ടും അന്വേഷണ സംഘം രേഖപ്പെടുത്തി.

അതേസമയം തന്ത്രി കണ്ഠരര് രാജീവരുടെ കയ്യക്ഷര പരിശോധനക്ക് കൊല്ലം വിജിലന്‍സ് കോടതിയില്‍ എസ്‌ഐടി അനുമതി തേടി. അതിനിടെ മുഖ്യപ്രതി ഉണ്ണികൃഷ്ണന്‍ പോറ്റി ജാമ്യത്തിലിറങ്ങാതിരിക്കാന്‍ പുതിയ കേസുകളെടുക്കാനാണ് പൊലിസ് നീക്കം. റിയല്‍ എസ്റ്റേറ്റ്, ചെക്ക് തട്ടിപ്പ് പരാതികളില്‍ കേസ് എടുത്തേക്കും.