വാഷിങ്ടണ്‍: പ്രസിഡന്റ് ട്രംപിന്റെ ഭീഷണികള്‍ ഏറ്റില്ല. വായ്പ പലിശനിരക്കുകളില്‍ മാറ്റം വരുത്താതെ യു.എസ് കേന്ദ്രബാങ്കായ ഫെഡറല്‍ റിസര്‍വ്. പലിശനിരക്ക് 3.5 ശതമാനത്തില്‍ 3.75 ശതമാനത്തിനും ഇടയില്‍ തുടരുമെന്നാണ് ഫെഡറല്‍ റിസര്‍വ് യോഗത്തിന് ശേഷം ചെയര്‍മാന്‍ ജെറോം പവല്‍ അറിയിച്ചത്. ട്രംപിന്റെ കടുത്ത സമ്മര്‍ദത്തെ അവഗണിച്ചാണ് ഫെഡറല്‍ റിസര്‍വ് തീരുമാനം പ്രഖ്യാപിച്ചത്.

ഫഡറലിന് അതിന്റെ സ്വാതന്ത്ര്യം നഷ്ടപ്പെട്ടിട്ടില്ലെന്നാണ് പവല്‍ പ്രതികരിച്ചത്. ഡിസംബറില്‍ നടന്ന യോഗത്തിന് ശേഷം സമ്പദ്വ്യവസ്ഥയില്‍ മെച്ചമുണ്ടായെന്നും  തീരുമാനം പ്രഖ്യാപിച്ചതിന് ശേഷം ചെയര്‍ ജെറോം പവല്‍ വാര്‍ത്താ സമ്മേളനത്തില്‍ പറഞ്ഞു. തൊഴിലവസരങ്ങളുടെ സാധ്യതയും അദ്ദേഹം വാര്‍ത്താസമ്മേളനത്തില്‍ വ്യക്തമാക്കി. കാലക്രമേണ നിയമനങ്ങള്‍ വര്‍ദ്ധിപ്പിക്കുമെന്ന് അദ്ദേഹം ചൂണ്ടിക്കാട്ടി. തൊഴില്‍ വിപണി സ്ഥിരത കൈവരിക്കുന്നതിന്റെ സൂചനകളുണ്ടെന്നും വായ്പ അവലോകന യോഗത്തിന് ശേഷം നടത്തിയ വാര്‍ത്താസമ്മേളനത്തില്‍ പവല്‍ കൂട്ടിച്ചേര്‍ത്തു. 

ALSO READ: ഇറാനെ ആക്രമിക്കാന്‍ ഞങ്ങളുടെ മണ്ണും ആകാശവും വിട്ടുനല്‍കില്ല; യു.എ.ഇക്ക് പിന്നാലെ നിര്‍ണായക പ്രഖ്യാപനം നടത്തി സഊദിയും

വരുന്ന വായ്പ അവലോകന യോഗങ്ങളിലും പലിശനിരക്കുകളില്‍ മാറ്റമുണ്ടാവില്ലെന്ന സൂചനയും ഫെഡറല്‍ റിസര്‍വ് നല്‍കിയിട്ടുണ്ട്. സമ്പദ്വ്യവസ്ഥ ആരോഗ്യകരമായ വേഗതയില്‍ വളരുകയും തൊഴിലില്ലായ്മ നിരക്ക് കുറയുകയും ചെയ്യുന്നതിനാല്‍, കൂടുതല്‍ നിരക്ക് കുറയ്ക്കുന്നതിന് തിടുക്കം കൂട്ടാന്‍ ഫെഡ് ഉദ്യോഗസ്ഥര്‍ ഒരു കാരണവും കാണുന്നില്ലെന്നും അദ്ദേഹം ആവര്‍ത്തിച്ചു. രാഷ്ട്രീയ ഇടപെടലുകള്‍ക്ക് വഴങ്ങില്ലെന്നാണ് ജെറോം പവല്‍ നല്‍കിയ സൂചനകളില്‍ നിന്ന് വ്യക്തമാവുന്നത്.

 അതേസമയം, വൈറ്റ് ഹൗസുമായി ബന്ധപ്പെട്ട് ഇക്കാര്യത്തില്‍ നടക്കുന്ന ഏറ്റുമുട്ടലുകളെ കുറിച്ച് പ്രതികരിക്കാന്‍ അദ്ദേഹം തയാറായില്ല. അതിനിടെ,  ഫെഡറല്‍ റിസര്‍വില്‍ ട്രംപ് നിയമിച്ച രണ്ട് ഗവര്‍ണര്‍മാരായ സ്റ്റീഫന്‍ മിരാനും ക്രിസ്റ്റഫര്‍ വാലറും പലിശനിരക്ക് കുറക്കുന്നതിന് അനുകൂലമായി വോട്ട് ചെയ്തുവെന്നാണ് റിപ്പോര്‍ട്ടുകള്‍ പറയുന്നത്.

ALSO READ: സാംസ്‌ക്കാരിക പൈതൃകങ്ങള്‍ സംരക്ഷിക്കാനുള്ളതാണ്; ഹിന്ദുക്ഷേത്രം നവീകരിച്ച് പാകിസ്താന്‍, പൊതുജനങ്ങള്‍ക്ക് തുറന്നു നല്‍കി 

അടുത്ത ഫെഡറല്‍ റിസര്‍വ് ചെയര്‍മാനാകാനുള്ള നോമിനിയെ ട്രംപ് ഉടന്‍ പ്രഖ്യാപിക്കുന്ന് റിപ്പോര്‍ട്ടുണ്ട്. ഇനി രണ്ട് വായ്പ അവലോകന യോഗങ്ങളില്‍ കൂടിയാണ് ജെറോം പവല്‍ അധ്യക്ഷത വഹിക്കുക. ഈ രണ്ട് യോഗങ്ങളിലും പലിശനിരക്കില്‍ ഇളവ് പ്രതീക്ഷിക്കേണ്ടെന്ന് റിപ്പോര്‍ട്ടുകള്‍ സൂചിപ്പിക്കുന്നു. പവലിന് ശേഷം ട്രംപിന്റെ നോമിനിയാണ് ഫെഡറല്‍ റിസര്‍വിന്റെ തലപ്പത്തെത്തുന്നതെങ്കില്‍ പലിശനിരക്ക് കുറക്കുമെന്നാണ് പ്രതീക്ഷയെന്നും ചൂണ്ടിക്കാട്ടപ്പെടുന്നു.

the us federal reserve has decided to keep interest rates unchanged despite pressure from president donald trump. fed chair jerome powell said the economy is improving and rate cuts are not needed for now.