തളിപ്പറമ്പ്: പറശ്ശിനിക്കടവ് യു.പി സ്‌കൂള്‍ ജീവനക്കാരന്‍ കുറ്റിക്കോല്‍ മുണ്ടപ്രത്തെ പുതിയ പുരയില്‍ രജീഷിനെ കാണാതായി ആറു ദിവസം കഴിഞ്ഞിട്ടും കണ്ടെത്താനാകാത്ത സാഹചര്യത്തില്‍ തളിപ്പറമ്പ് സി.ഐ കെ.വി പ്രേമചന്ദ്രന്റെ നേതൃത്വത്തില്‍ പൊലിസ് അന്വേഷണം ഊര്‍ജിതമാക്കി.
സൈബര്‍സെല്ലുമായി നടത്തിയ അന്വേഷണത്തില്‍ കരിമ്പം ഫാമിനു പിറകിലെ മൊബൈല്‍ ടവറിന്റെ പരിധിയില്‍ ഇയാളുടെ ഫോണിന്റെ സിഗ്നല്‍ ലഭിച്ചിരുന്നു. ഇതനുസരിച്ച് സംശയാസ്പദമായ കേന്ദ്രങ്ങളില്‍ പൊലിസ് റെയ്ഡ് നടത്തിയിരുന്നുവെങ്കിലും കാര്യമായ വിവരങ്ങളൊന്നും ലഭിച്ചിരുന്നില്ല. രജീഷിന്റെ ഫോണ്‍കോള്‍ ലിസ്റ്റ് പരിശോധിച്ചിരുന്നുവെങ്കിലും സംശയാസ്പദമായി ഒന്നും കണ്ടെത്താനായില്ല. യുവാവിന്റെ ഫേസ്ബുക്ക്, വാട്‌സ്ആപ്പ് തുടങ്ങിയ സോഷ്യല്‍ നെറ്റ്‌വര്‍ക്ക് അക്കൗണ്ടുകള്‍ പൊലിസ് നിരീക്ഷണത്തിലാണ്. കഴിഞ്ഞ ദിവസവും ഇയാളുടെ വാട്‌സ്ആപ്പ് അക്കൗണ്ടില്‍ സന്ദേശങ്ങള്‍ സ്വീകരിക്കപ്പെട്ടതും,ഒന്നിലധികം തവണ ഫോണ്‍ ഓണ്‍ ചെയ്ത് ഉപയോഗിച്ചതും അന്വേഷണ സംഘത്തിന്റെ ശ്രദ്ധയില്‍പെട്ടിരുന്നു. ഇത് ഇയാള്‍ ബന്ധുക്കളെയും പൊലിസിനെയും കബളിപ്പിക്കുകയാണോ എന്ന സംശയം ബലപ്പെടുത്തിയിട്ടുണ്ട്.