ചെമ്മനാട്, കുമ്പള, എന്‍മകജെ, പുത്തിഗൈ, കോടോം-ബേളൂര്‍ പഞ്ചായത്തുകളുടെ
പദ്ധതികള്‍ക്ക് അംഗീകാരം നല്‍കിയില്ല
നീലേശ്വരം നഗരസഭയുടെ രണ്ടേകാല്‍ കോടിയുടെ അയ്യങ്കാളി നഗര തൊഴിലുറപ്പ് പദ്ധതിയുടെ ആക്ഷന്‍ പ്ലാനും അംഗീകരിച്ചു
കാസര്‍കോട്: ജില്ലയിലെ അഞ്ചു ഗ്രാമ പഞ്ചായത്തുകള്‍ ഒഴിച്ചുള്ള പഞ്ചായത്തുകളുടെയും നഗരസഭകളുടെയും ജില്ലാ പഞ്ചായത്തിന്റെ പദ്ധതികള്‍ക്ക് ജില്ലാ ആസൂത്രണ സമിതിയോഗത്തില്‍ അംഗീകാരം നല്‍കി. ചെമ്മനാട്, എന്‍മകജെ, കുമ്പള, പുത്തിഗൈ, കോടോം-ബേളൂര്‍ പഞ്ചായത്തുകളുടെ പദ്ധതികള്‍ക്ക് യോഗം അംഗീകാരം നല്‍കിയില്ല. ഇതോടെ ജില്ലയിലെ 43 ഗ്രാമപഞ്ചായത്തുകളുടെ പദ്ധതികള്‍ക്ക് അംഗീകാരം നല്‍കി. മടക്കിയ പഞ്ചായത്തുകളുടെ പദ്ധതികള്‍ സംബന്ധിച്ച് അടുത്തയോഗത്തില്‍ ചര്‍ച്ച ചെയ്യുമെന്ന് കലക്ടര്‍ പറഞ്ഞു.
നീലേശ്വരം നഗരസഭയുടെ 2,27,12,619 രൂപയുടെ അയ്യങ്കാളി നഗര തൊഴിലുറപ്പ് പദ്ധതിയുടെ ആക്ഷന്‍ പ്ലാനും യോഗം അംഗീകരിച്ചു. ജില്ലയില്‍ തദ്ദേശ സ്ഥാപനങ്ങള്‍ക്കു കീഴില്‍ ഇപ്പോള്‍ തുടങ്ങിയ റോഡുകളടക്കമുള്ള നിര്‍മാണ പ്രവൃത്തികള്‍ ഉടനെ പൂര്‍ത്തീകരിക്കാന്‍ ആസൂത്രണ സമിതി യോഗത്തില്‍ നിര്‍ദേശം നല്‍കി.
തൊഴിലുറപ്പ് പദ്ധതികളുടെ നടത്തിപ്പില്‍ കൃത്യത വേണമെന്നും ചില തദ്ദേശ സ്ഥാപനങ്ങള്‍ തൊഴിലുറപ്പു പദ്ധതികള്‍ വഴി നടപ്പാക്കാന്‍ പാടില്ലാത്ത പദ്ധതികള്‍ നടപ്പാക്കുന്നതു നിര്‍ത്തണമെന്നും ആസൂത്രണ സമിതി യോഗത്തില്‍ നിര്‍ദേശിച്ചു. ആസൂത്രണ സമിതിയോഗത്തില്‍ കലക്ടര്‍ ജീവന്‍ ബാബു അധ്യക്ഷനായി. ജില്ലാ പ്ലാനിംഗ് ഓഫിസര്‍ കെ.എം സുരേഷ്, ജില്ലാ പഞ്ചായത്ത് പ്രസിഡന്റ് ഏ.ജി.സി ബഷീര്‍, ജില്ലയിലെ തദ്ദേശ സ്വയംഭരണ സ്ഥാപനത്തിലെ പ്രസിഡന്റുമാര്‍, സെക്രട്ടറിമാര്‍ എന്നിവര്‍ യോഗത്തില്‍ പങ്കെടുത്തു.