തിരുവനന്തപുരം: വഞ്ചിയൂരിലെ സി.പി.എം രക്തസാക്ഷി വിഷ്ണുവിന്റെ സഹോദരനും സി.പി.എം ബ്രാഞ്ച് അംഗവുമായിരുന്ന വിനോദ് കോണ്‍ഗ്രസിലേക്ക്. വിനോദും സുഹൃത്തുക്കളും പ്രതിപക്ഷ നേതാവ് വി.ഡി.സതീശനില്‍നിന്ന് പാര്‍ട്ടി അംഗത്വം സ്വീകരിച്ചു.

വിഷ്ണുവിന്റെ പേരില്‍ പിരിച്ച രക്തസാക്ഷി ഫണ്ട് നേതാക്കള്‍ തട്ടിയെടുത്തതായി നേരത്തെ വിനോദ് ആരോപിച്ചിരുന്നു. ഫണ്ട് തട്ടിപ്പിന് തരം താഴ്ത്തിയ നേതാവിന് വീണ്ടും പദവി നല്‍കിയെന്നും മന്ത്രി വി. ശിവന്‍കുട്ടിയാണ് ഇതിന് പിന്നിലെന്നുമാണ് വിനോദിന്റെ ആരോപണം.

2008 ഏപ്രില്‍ ഒന്നിനാണ് വിഷ്ണു കൊല്ലപ്പെട്ടത്. ആര്‍.എസ്.എസ് പ്രവര്‍ത്തകരായിരുന്നു പ്രതികള്‍. വിഷ്ണുവിന്റെ കുടുംബത്തിനായി പിരിച്ചെടുത്ത ഫണ്ടില്‍ നിന്ന് 5 ലക്ഷം രൂപ കേസ് നടത്തിപ്പിനെന്ന പേരില്‍ അന്നത്തെ ഏരിയാ സെക്രട്ടറി രവീന്ദ്രന്‍ നായര്‍ മാറ്റിവച്ചുവെന്നും ഇത് ദുരുപയോഗം ചെയ്തുവെന്നുമാണ് വിനോദിന്റെ പരാതി. ഈ പരാതിയില്‍ മുന്‍പ് നടത്തിയ പാര്‍ട്ടി അന്വേഷണത്തില്‍ രവീന്ദ്രന്‍ നായര്‍ക്ക് വീഴ്ച പറ്റിയെന്ന് കണ്ടെത്തി സസ്പെന്‍ഡ് ചെയ്തിരുന്നു. എന്നാല്‍ പിന്നീട് അദ്ദേഹത്തെ സി.ഐ.ടി.യു ജില്ലാ സെക്രട്ടറിയായി നിയമിച്ചത് കുറ്റക്കാരെ സംരക്ഷിക്കുന്നതിന് തുല്യമാണെന്ന് വിനോദ് ആരോപിക്കുന്നു.

ALSO READ: മുഖ്യപ്രതിയും പുറത്തേക്ക്; ശബരിമല സ്വര്‍ണക്കൊള്ളക്കേസില്‍ ഉണ്ണികൃഷ്ണന്‍ പോറ്റിക്ക്  ജാമ്യം

അഞ്ചു ലക്ഷം രൂപ അമ്മയുടെ പേരില്‍ നല്‍കി. ബാക്കി അഞ്ചുലക്ഷം പാര്‍ട്ടിയുടെ അക്കൗണ്ടില്‍ സൂക്ഷിച്ചു. ഈ പണം രവീന്ദ്രന്‍ സ്വന്തം കാര്യങ്ങള്‍ക്ക് ഉപയോഗിച്ചു. ഇക്കാര്യം 15 വര്‍ഷം കഴിഞ്ഞാണ് ഞങ്ങള്‍ അറിഞ്ഞത്. പരാതി നല്‍കിയതിന്റെ അടിസ്ഥാനത്തില്‍ ഇയാളെ സ്ഥാനങ്ങളില്‍ നിന്ന് നീക്കുകയും പാര്‍ട്ടി അംഗമായി തരംതാഴ്ത്തുകയും ചെയ്തു. പിന്നീട് ഇയാളെ സിഐടിയുവിന്റെ ജില്ലാ സെക്രട്ടറിയാക്കി. ഇത് ഞങ്ങള്‍ക്ക് അംഗീകരിക്കാന്‍ സാധിക്കില്ല.- വിഷ്ണുവിന്റെ സഹോദരന്‍ പറഞ്ഞു.

പാര്‍ട്ടിയുടെ വിശദീകരണം
ആരോപണങ്ങള്‍ അടിസ്ഥാനരഹിതമാണെന്ന് സി.പി.എം ജില്ലാ സെക്രട്ടറി വി. ജോയ് അന്ന് പറഞ്ഞിരുന്നു. ഫണ്ടിന്റെ ഒരു ഭാഗം കുടുംബത്തിന് നല്‍കുകയും ബാക്കി തുക ബാങ്കില്‍ നിക്ഷേപിക്കുകയും ചെയ്തിരുന്നു. അഭിഭാഷകര്‍ക്ക് ഫീസ് നല്‍കാനാണ് ഈ തുക ഉപയോഗിച്ചത്. പാര്‍ട്ടി കമ്മിറ്റികളില്‍ ചര്‍ച്ച ചെയ്യാതെ പണം കൈമാറി എന്ന സാങ്കേതികമായ വീഴ്ച മാത്രമാണ് നേതാവിനുണ്ടായതെന്നും അഴിമതി നടന്നിട്ടില്ലെന്നും പാര്‍ട്ടി വ്യക്തമാക്കുന്നു. ഈ വിവാദത്തെത്തുടര്‍ന്ന് പാര്‍ട്ടിയില്‍ നിന്ന് രാജിവെക്കുകയാണെന്നും വിനോദ് പ്രഖ്യാപിച്ചു. വിഷ്ണുവിന്റെ മറ്റൊരു സഹോദരനായ വിമല്‍ നിലവില്‍ സി.പി.എം ഏരിയാ കമ്മിറ്റി അംഗമാണ്.

Vinod, the brother of CPM martyr Vishnu and a former CPM branch committee member, has decided to join the Congress party. He will be formally inducted into the Congress at the KPCC office at noon.