പാലക്കാട്: കഞ്ചിക്കോട് ജ്യേഷ്ഠന്‍ അനുജനെ തല്ലിക്കൊന്നു. ആര്‍.ബാബു (35) ആണ് കൊല്ലപ്പെട്ടത്. ഇയാള്‍ വാട്ടര്‍ ടാങ്ക് ജങ്ഷന്‍ പഴയ പോസ്റ്റ് ഓഫീസ് തെരുവില്‍ താമസിച്ചുവരുകയായിരുന്നു. സഹോദരന്‍ ആര്‍. സതീഷിനെ (37) വാളയാര്‍ പൊലിസ് കസ്റ്റഡിയില്‍ എടുത്തു. 

ഇന്നലെയാണ് ബാബുവിനെ വീടിനകത്ത് മരിച്ച നിലയില്‍ കണ്ടെത്തിയത്. പോസ്റ്റ്‌മോര്‍ട്ടത്തില്‍ ബാബുവിന്റെ ശരീരത്തില്‍ മര്‍ദനമേറ്റ പാടുകള്‍ കണ്ടെത്തി.പിന്നാലെ, വാളയാര്‍ പൊലിസ് നടത്തിയ അന്വേഷണത്തിലാണ് സഹോദരന്‍ സതീഷിനെ പിടികൂടിയത്. 

കഴിഞ്ഞ 20 വര്‍ഷമായി തമിഴ്‌നാട് സ്വദേശികളായ ബാബുവും കുടുംബവും കഞ്ചിക്കോടാണ് താമസം.