ബീഡ് (മഹാരാഷ്ട്ര): പരീക്ഷാ ഹാളിലെ ജനലുകളിൽ സ്പൈഡർമാനെപ്പോലെ തൂങ്ങിക്കിടന്ന് മക്കൾക്ക് ഉത്തരങ്ങൾ കൈമാറുന്ന രക്ഷിതാക്കളുടെയും ബന്ധുക്കളുടെയും ദൃശ്യങ്ങൾ പുറത്ത്. മഹാരാഷ്ട്രയിലെ ബീഡ് ജില്ലയിലുള്ള ചൗസാല ജൂനിയർ കോളേജിലാണ് പന്ത്രണ്ടാം ക്ലാസ് (HSC) ഇംഗ്ലീഷ് പരീക്ഷയ്ക്കിടെ വ്യാപകമായ കോപ്പിയടി നടന്നത്. വിദ്യാഭ്യാസ വകുപ്പ് ഏർപ്പെടുത്തിയ ഡ്രോൺ നിരീക്ഷണത്തിലാണ് ഞെട്ടിക്കുന്ന ദൃശ്യങ്ങൾ പതിഞ്ഞത്.

ഡ്രോൺ എത്തിയപ്പോൾ നെട്ടോട്ടം

തുറസ്സായ സ്ഥലത്ത് സ്ഥിതി ചെയ്യുന്ന കോളേജ് കെട്ടിടത്തിന്റെ ചുവരുകളിൽ വലിഞ്ഞുകയറിയാണ് പുറത്തുനിന്നുള്ളവർ വിദ്യാർത്ഥികൾക്ക് കോപ്പിയടിക്കാനുള്ള ഉത്തര കടലാസുകൾ കൈമാറിയിരുന്നത്.നിരീക്ഷണത്തിനായി ഡ്രോൺ ക്യാമറകൾ അടുത്തേക്ക് വന്നതോടെ ജനലുകളിൽ തൂങ്ങിക്കിടന്നവർ പരിഭ്രാന്തരായി താഴേക്ക് ചാടി ഓടിമറയുന്നത് ദൃശ്യങ്ങളിൽ വ്യക്തമാണ്.പരീക്ഷ തുടങ്ങി ആദ്യ മണിക്കൂറിൽ തന്നെ ക്ലാസ് മുറികൾക്ക് പുറത്ത് വൻ സംഘം തടിച്ചുകൂടുകയും ജനലുകൾ വഴി ഉത്തരങ്ങൾ കൈമാറാൻ ശ്രമിക്കുകയും ചെയ്തു.

2015-ലെ ബിഹാർ സംഭവത്തിന്റെ ആവർത്തനം

2015-ൽ ബിഹാറിലെ ഹാജിപൂരിൽ സമാനമായ രീതിയിൽ രക്ഷിതാക്കൾ കെട്ടിടത്തിൽ തൂങ്ങിക്കിടന്ന് കോപ്പിയടിക്ക് സഹായിക്കുന്ന ദൃശ്യങ്ങൾ ആഗോളതലത്തിൽ വലിയ ചർച്ചയായിരുന്നു. അന്ന് 500-ഓളം വിദ്യാർത്ഥികളെ പരീക്ഷയിൽ നിന്ന് വിലക്കിയിരുന്നു. അതിന് സമാനമായ രീതിയിലുള്ള സുരക്ഷാ വീഴ്ചയാണ് ഇപ്പോൾ ബീഡിലും റിപ്പോർട്ട് ചെയ്തിരിക്കുന്നത്.

കർശന നടപടിക്ക് ഉത്തരവ്

സംഭവത്തിൽ ജില്ലാ ഭരണകൂടം കർശന നടപടിക്ക് ഉത്തരവിട്ടു.പരീക്ഷാ കേന്ദ്രങ്ങളിൽ സിസിടിവി നിരീക്ഷണവും 'ഫ്ലൈയിംഗ് സ്ക്വാഡും' ഉണ്ടായിട്ടും ഇത്രയധികം ആളുകൾ കെട്ടിടത്തിൽ വലിഞ്ഞുകയറിയത് അധികൃതരുടെ വീഴ്ചയാണെന്ന് വിമർശനമുയർന്നു.കോപ്പിയടിക്ക് ഒത്താശ ചെയ്ത സെന്റർ ഇൻചാർജ് ഉൾപ്പെടെയുള്ള ഉദ്യോഗസ്ഥർക്കെതിരെ അന്വേഷണം പ്രഖ്യാപിച്ചു. പരീക്ഷാ കേന്ദ്രത്തിന്റെ അംഗീകാരം റദ്ദാക്കുന്നത് ഉൾപ്പെടെയുള്ള നടപടികൾ പരിഗണനയിലാണെന്ന് ജില്ലാ മജിസ്‌ട്രേറ്റ് വിവേക് ജോൺസൺ അറിയിച്ചു.