മനാമ: ബഹ്‌റൈനില്‍ കഴിഞ്ഞ വര്‍ഷം അനധികൃതമായി കടത്താന്‍ ശ്രമിച്ച വന്‍തോതിലുള്ള പുകയില ഉല്‍പ്പന്നങ്ങള്‍ കസ്റ്റംസ് അധികൃതര്‍ പിടിച്ചെടുത്തു. ആഭ്യന്തര മന്ത്രാലയം പുറത്തുവിട്ട കണക്കുകള്‍ പ്രകാരം, 2025ല്‍ രാജ്യത്തുടനീളം നടത്തിയ പരിശോധനകളില്‍ 12 ടണിലധികം പുകയിലയാണ് പിടികൂടിയത്. രാജ്യത്തെ അനധികൃത വ്യാപാരങ്ങള്‍ തടയുന്നതിനായി പരിശോധനകള്‍ ശക്തമാക്കിയതിന്റെ ഭാഗമായാണ് ഈ നടപടിയെന്ന് അധികൃതര്‍ അറിയിച്ചു.

വിവിധ പരിശോധനകളില്‍ 58,996 ബാഗുകളിലായി സൂക്ഷിച്ചിരുന്ന പുകയില ഉല്‍പ്പന്നങ്ങള്‍ പിടികൂടിയതായി റിപ്പോര്‍ട്ടില്‍ വ്യക്തമാക്കുന്നു. ഇതിന് പുറമെ, 528 നിരോധിത ഉപകരണങ്ങളും 10,591 വ്യാജ ഉല്‍പ്പന്നങ്ങളും കണ്ടെത്തി. വിമാനത്താവളങ്ങള്‍, തുറമുഖങ്ങള്‍, അതിര്‍ത്തി മേഖലകള്‍ എന്നിവിടങ്ങളില്‍ നടത്തിയ പരിശോധനകളിലാണ് ഇവ പിടിച്ചെടുത്തത്.

ആധുനിക സാങ്കേതിക സംവിധാനങ്ങള്‍ ഉപയോഗിച്ചുള്ള പരിശോധനകളിലൂടെ നിരവധി കേസുകള്‍ കണ്ടെത്താനായതായി ആഭ്യന്തര മന്ത്രാലയം വ്യക്തമാക്കി. എക്‌സ്‌റേ സ്‌കാനിങ് സംവിധാനങ്ങളുടെ സഹായത്തോടെ 286 കേസുകള്‍ കണ്ടെത്തി. ഇതോടൊപ്പം, മയക്കുമരുന്ന് കടത്തുമായി ബന്ധപ്പെട്ട പരിശോധനകളും ശക്തമാക്കിയിരുന്നു. ഇതിന്റെ ഭാഗമായി 98 മയക്കുമരുന്ന് കേസുകള്‍ രജിസ്റ്റര്‍ ചെയ്തതായും അറിയിച്ചു.

ALSO READ: അനധികൃത പ്രവേശനം തടയാന്‍ നീക്കം; പഴയ മുഹറഖിലെ ഉപേക്ഷിച്ച കെട്ടിടങ്ങള്‍ അടയ്ക്കാന്‍ തീരുമാനം

അനധികൃത പുകയില വ്യാപാരം പൊതുജനാരോഗ്യത്തിനും സാമൂഹിക സുരക്ഷയ്ക്കും ഗുരുതര ഭീഷണിയാണെന്ന് അധികൃതര്‍ ചൂണ്ടിക്കാട്ടി. ഇത്തരം നിയമലംഘനങ്ങള്‍ തടയുന്നതിനായി കസ്റ്റംസ്, സുരക്ഷാ ഏജന്‍സികള്‍ തമ്മിലുള്ള സഹകരണം കൂടുതല്‍ ശക്തമാക്കുമെന്നും, പരിശോധനകള്‍ വരും കാലത്തും തുടരുമെന്നും വ്യക്തമാക്കി.

നിയമം ലംഘിച്ച് അനധികൃത വ്യാപാരങ്ങളില്‍ ഏര്‍പ്പെടുന്നവര്‍ക്കെതിരെ കര്‍ശന നിയമനടപടികള്‍ സ്വീകരിക്കുമെന്നും ആഭ്യന്തര മന്ത്രാലയം മുന്നറിയിപ്പ് നല്‍കി.

More than 12 tons of illegally smuggled tobacco products were seized in Bahrain last year, according to the Interior Ministry. Authorities say inspections and enforcement measures will continue.