കോഴിക്കോട്: സാമൂഹ്യ മാധ്യമങ്ങളിലൂടെ അപമാനിക്കപ്പെട്ടതിനെ തുടര്‍ന്ന് യുവാവ് ആത്മഹത്യ ചെയ്ത കേസില്‍ പ്രതി ഷിംജിതയുടെ ജാമ്യാപേക്ഷയില്‍ കോടതി നാളെ വിധി പറയും. കോഴിക്കോട് പ്രിന്‍സിപ്പല്‍ സെഷന്‍സ് കോടതിയാണ് വിധി പറയുക. ഇതിന് മുന്നോടിയായി അന്വേഷണ സംഘം ഇന്ന് കോടതിയില്‍ അഡീഷണല്‍ റിപ്പോര്‍ട്ട് സമര്‍പ്പിച്ചു.

ദീപകിന്റെ ലാപ്‌ടോപ്പ്, ഫോണ്‍ എന്നിവയുടെ ഫോറന്‍സിക് പരിശോധനാ ഫലം വരുന്നത് വരെ പ്രതിക്ക് ജാമ്യം അനുവദിക്കരുതെന്ന് പ്രോസിക്യൂഷന്‍ അറിയിച്ചു. ഷിംജിതയുടെ വിഡിയോ എഡിറ്റഡ് ആണോ എന്ന് പരിശോധിക്കണമെന്നും പ്രോസിക്യൂഷന്‍ കോടതിയില്‍ പറഞ്ഞു.

അതേസമയം ഷിംജിത 21 ദിവസമായി ജയിലിലാണെന്നും പരിശോധനാ ഫലം വരുന്നത് വരെ റിമാന്റില്‍ കഴിയേണ്ട ആവശ്യമില്ലെന്നും ആയിരുന്നു പ്രതിഭാഗത്തിന്റെ വാദം. കുന്ദമംഗലം കോടതി നേരത്തെ ഷിംജിതയുടെ ജാമ്യം തള്ളിയിരുന്നു. പിന്നാലെ ഇവര്‍ സെഷന്‍സ് കോടതിയെ സമീപിക്കുകയായിരുന്നു.