മസ്‌കത്ത്: വസന്തകാലത്തിന്റെ വരവ് ആഘോഷിക്കുന്ന റഷ്യയുടെ പരമ്പരാഗത ഉത്സവമായ 'മസ്‌ലേനിറ്റ്‌സാ 2026' മസ്‌കറ്റില്‍ വലിയ ജനപങ്കാളിത്തത്തോടെ സമാപിച്ചു. ഫെബ്രുവരി 5 മുതല്‍ 7 വരെ അല്‍ മൗജ് മസ്‌കത്തില്‍ നടന്ന മൂന്ന് ദിവസത്തെ ഉത്സവം 46,000ത്തിലധികം സന്ദര്‍ശകരെ ആകര്‍ഷിച്ചു. ഇതോടെ റഷ്യയും ഒമാനും തമ്മിലുള്ള സാംസ്‌കാരിക ബന്ധങ്ങള്‍ കൂടുതല്‍ ശക്തമായതായി വിലയിരുത്തപ്പെടുന്നു.

റഷ്യന്‍ ഹൗസ് ഒമാനും റഷ്യന്‍ ഫെഡറേഷന്റെ ഒമാന്‍ എംബസിയും സംയുക്തമായാണ് ഉത്സവം സംഘടിപ്പിച്ചത്. റഷ്യന്‍ ജനകീയ നൃത്തങ്ങള്‍, സംഗീത പരിപാടികള്‍, പരമ്പരാഗത ഭക്ഷണ സ്റ്റാളുകള്‍, കുട്ടികള്‍ക്കും കുടുംബങ്ങള്‍ക്കും വേണ്ടി ഒരുക്കിയ വിവിധ കലാപരിപാടികള്‍ എന്നിവ ഉത്സവത്തിന്റെ പ്രധാന ആകര്‍ഷണങ്ങളായി.

റഷ്യയില്‍ നിന്നെത്തിയ കലാകാരന്മാരുടെ പ്രകടനങ്ങള്‍ സന്ദര്‍ശകരുടെ പ്രത്യേക ശ്രദ്ധ നേടി. റഷ്യന്‍ സംസ്‌കാരവും പാരമ്പര്യവും പരിചയപ്പെടുത്തുന്ന പ്രദര്‍ശനങ്ങള്‍ക്കും വര്‍ക്ക്‌ഷോപ്പുകള്‍ക്കും വലിയ പങ്കാളിത്തമാണ് ലഭിച്ചത്. ഒമാനികളോടൊപ്പം വിവിധ രാജ്യങ്ങളില്‍ നിന്നുള്ള പ്രവാസികളും പരിപാടിയില്‍ പങ്കെടുത്തു.

ALSO READ: മസ്‌കത്ത് വിമാനത്താവളത്തില്‍ മരിജ്വാന പിടികൂടി; ഏഷ്യന്‍ വനിത അറസ്റ്റില്‍ 

ഉത്സവത്തിന്റെ ഭാഗമായി ഒരുക്കിയ വിപണിയില്‍ റഷ്യന്‍ കൈത്തറി ഉല്‍പ്പന്നങ്ങളും സ്മരണികകളും പ്രദര്‍ശിപ്പിക്കുകയും വില്‍പ്പന നടത്തുകയും ചെയ്തു. ഒപ്പം, ഒമാനി കലാകാരന്മാരുടെ സൃഷ്ടികള്‍ക്കും വേദിയൊരുക്കിയതോടെ, രണ്ട് രാജ്യങ്ങളുടെയും സംസ്‌കാരങ്ങള്‍ ഒരേ വേദിയില്‍ സംഗമിക്കുന്ന അനുഭവമായി മസ്‌ലേനിറ്റ്‌സാ മാറി.

ഇത്തരത്തിലുള്ള സാംസ്‌കാരിക പരിപാടികള്‍ ജനങ്ങള്‍ തമ്മിലുള്ള സൗഹൃദബന്ധങ്ങള്‍ കൂടുതല്‍ ഊട്ടിയുറപ്പിക്കുമെന്നും, റഷ്യ–ഒമാന്‍ ബന്ധങ്ങള്‍ക്ക് പുതിയ ഊര്‍ജം നല്‍കുമെന്നും സംഘാടകര്‍ വ്യക്തമാക്കി.

Maslenitsa 2026, a Russian spring festival, drew over 46,000 visitors in Muscat, strengthening cultural ties between Russia and Oman.