ന്യൂഡൽഹി: കോടതികൾ ജാമ്യമോ, മുൻകൂർ ജാമ്യമോ അനുവദിക്കുന്നത് നിശ്ചിതതുക കെട്ടിവയ്ക്കണമെന്ന വ്യവസ്ഥയുടെ അടിസ്ഥാനത്തിലായിരിക്കരുതെന്ന് സുപ്രിംകോടതി. ജാർഖണ്ഡ് ഹൈക്കോടതി പുറപ്പെടുവിച്ച സോപാധിക ജാമ്യ ഉത്തരവുകൾ റദ്ദാക്കുകയും പ്രതികളെ ജാമ്യത്തിൽ വിട്ടയയ്ക്കണമെന്ന് നിർദേശിക്കുകയും ചെയ്ത് ജസ്റ്റിസുമാരായ ജെ.ബി പാർഡിവാല, കെവി വിശ്വനാഥൻ എന്നിവരടങ്ങിയ ബെഞ്ചാണ് ഉത്തരവ് പുറപ്പെടുവിച്ചത്. 

വഞ്ചനാ കേസിൽ പ്രതികളായ പിതാവും മകനും 9 ലക്ഷം രൂപ അടയ്ക്കുന്നതുമായി ബന്ധപ്പെട്ടതാണ് കേസ്. ജാമ്യത്തിനായി ഹൈക്കോടതിയെ സമീപിച്ച ഇവരോട് പരാതിക്കാരന് 9 ലക്ഷത്തോ രൂപ നൽകാൻ കോടതി നിർദേശിച്ചു. ഇത് അടച്ചില്ലെന്ന് കണ്ടെത്തിയ കോടതി ഇരുവർക്കും ജാമ്യം നിഷേധിച്ചു. ഇതിനെതിരേയാണ് ഇരുവരും സുപ്രിംകോടതിയിലെത്തിയത്. ഹൈക്കോടതി അസാധാരണമായ ഉത്തരവാണ് പുറപ്പെടുവിച്ചതെന്ന് സുപിംകോടതി അഭിപ്രായപ്പെട്ടു.  ജാമ്യാപേക്ഷകൾ മെറിറ്റുകളുടെ അടിസ്ഥാനത്തിലാണ് തീർപ്പാക്കേണ്ടത്. സാധാരണ ജാമ്യമോ, മുൻകൂർ ജാമ്യമോ അനുവദിക്കുന്നതിന് ഒരു തുകയും നിക്ഷേപിക്കേണ്ടതില്ലെന്ന് സുപ്രിംകോടതി നേരത്തെയും ഉത്തരവുകൾ പുറപ്പെടുവിച്ചിരുന്നു-ബെഞ്ച് വ്യക്തമാക്കി.