തിരുവനന്തപുരം: പാങ്ങോട് പൊലിസ് സ്റ്റേഷന്‍ വളപ്പില്‍ സൂക്ഷിച്ചിരുന്ന വാഹനങ്ങള്‍ക്ക് തീ പിടിച്ചു. ഇന്ന് രാവിലെ 8.15ഓടെയാണ് സംഭവം. സ്റ്റേഷന്‍ പരിസരത്തെ ചപ്പുചവറുകള്‍ കത്തിക്കുന്നതിനിടെ അബദ്ധത്തില്‍ തീ പടരുകയായിരുന്നുവെന്നാണ് പ്രാഥമിക വിവരം.

പൊലിസ് വിവിധ കേസുകളിലായി പിടിച്ചെടുത്തതും സ്റ്റേഷന്‍ വളപ്പില്‍ സൂക്ഷിച്ചിരുന്നതുമായ വാഹനങ്ങള്‍ക്കാണ് തീ പിടിച്ചത്. ആറ് ബൈക്കുകള്‍ പൂര്‍ണമായും കത്തിനശിച്ചു. ഒരു ഓട്ടോറിക്ഷയ്ക്ക് ഭാഗികമായും തീപിടിച്ചു. മോഷണക്കേസുകളില്‍ ഉള്‍പ്പെട്ടതും അപകടങ്ങളില്‍പ്പെട്ടതുമായ വാഹനങ്ങളാണ് ഇവയിലേറെയും.

 ALSO READ: നാളെ മാസപ്പിറവി നിരീക്ഷിക്കാൻ ഗൾഫ് രാഷ്ട്രങ്ങളുടെ ആഹ്വാനം; പതിവ് തെറ്റിച്ചു ഒമാൻ, ഓരോ രാജ്യത്തെയും അവസ്ഥകൾ ഇങ്ങനെ | Ramadan 2026

സ്റ്റേഷനിലെ ക്ലീനിങ് സ്റ്റാഫ് പരിസരം വൃത്തിയാക്കുന്നതിനിടെ ചപ്പുചവറുകള്‍ കൂട്ടിയിട്ട് കത്തിച്ചിരുന്നു. ഇതില്‍ നിന്നുള്ള തീ സമീപത്തുണ്ടായിരുന്ന വാഹനങ്ങളിലേക്ക് പടരുകയായിരുന്നു. ഉടന്‍ തന്നെ നാട്ടുകാരും പൊലിസും ചേര്‍ന്ന് തീ അണയ്ക്കാനുള്ള ശ്രമങ്ങള്‍ ആരംഭിച്ചു. പിന്നാലെ ഫയര്‍ഫോഴ്‌സ് സംഘമെത്തിയാണ് തീ പൂര്‍ണമായും നിയന്ത്രണവിധേയമാക്കിയത്.
സ്റ്റേഷന്‍ വളപ്പിലെ സുരക്ഷാ മുന്‍കരുതലുകളില്‍ ഉണ്ടായ വീഴ്ചയെക്കുറിച്ച് ഉന്നത ഉദ്യോഗസ്ഥര്‍ അന്വേഷിക്കുമെന്നാണ് സൂചന.

A fire broke out at the Pangode Police Station premises in Trivandrum after cleaning staff set dry waste on fire. The flames quickly spread to seized vehicles parked nearby, destroying six motorcycles and partially damaging an autorickshaw.