ദുബൈ: യുഎഇയുടെ രൂപീകരണ കാലഘട്ടം മുതൽ ഇന്നുവരെയുള്ള ചരിത്രം ക്യാമറയിൽ പകർത്തിയ പ്രശസ്ത ഇന്ത്യൻ ഫോട്ടോഗ്രാഫർ രമേശ് ശുക്ല (87) അന്തരിച്ചു. അദ്ദേഹത്തിന്റെ വിയോഗത്തിൽ ദുബൈ കിരീടാവകാശിയും യുഎഇ ഉപപ്രധാനമന്ത്രിയും പ്രതിരോധ മന്ത്രിയുമായ ശൈഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം അനുശോചനം രേഖപ്പെടുത്തി.

"യുഎഇയുടെ ആദ്യകാല യാത്ര പകർത്തുകയും നമ്മുടെ രാജ്യത്തിന്റെ ചരിത്രത്തിലും ദൃശ്യസ്മരണയിലും നിർണായക നിമിഷങ്ങൾ നിലനിർത്തുകയും ചെയ്ത രമേശ് ശുക്ലയുടെ കുടുംബത്തിനും സുഹൃത്തുക്കൾക്കും ഹൃദയംഗമമായ അനുശോചനം. എമിറേറ്റ്‌സിനും ഇവിടുത്തെ ജനങ്ങൾക്കും വേണ്ടി വിശ്വസ്തതയോടും സ്നേഹത്തോടും കൂടി അദ്ദേഹം 6 പതിറ്റാണ്ടുകൾ സമർപ്പിച്ചു," ശൈഖ് ഹംദാൻ എക്സിൽ കുറിച്ചു.

ALSO READ: നയതന്ത്രബന്ധം ശക്തിപ്പെടുത്തും; തുർക്കി പ്രസിഡന്റുമായി ഫോണിൽ സംസാരിച്ച് ശൈഖ് മുഹമ്മദ് ബിൻ സായിദ് അൽ നഹ്യാൻ

കഴിഞ്ഞ ഒരു വർഷമായി ഹൃദയസംബന്ധമായ അസുഖങ്ങളാൽ ചികിത്സയിലായിരുന്ന ശുക്ല, ഞായറാഴ്ചയാണ് അന്തരിച്ചത്. ഒരാഴ്ച മുൻപ് ഹൃദയാഘാതം ഉണ്ടായതിനെ തുടർന്ന് ആശുപത്രിയിലായിരുന്ന അദ്ദേഹം, പിന്നീട് വീട്ടിലേക്ക് മടങ്ങിയിരുന്നു. എന്നാൽ ആരോഗ്യനില വഷളായതിനെ തുടർന്ന് വീണ്ടും അത്യാഹിത വിഭാഗത്തിൽ പ്രവേശിപ്പിച്ചു. 

ഔദ്യോഗിക പദവിയല്ലെങ്കിലും, പതിറ്റാണ്ടുകൾ നീണ്ട സംഭാവനകളെ മാനിച്ച് പരേതനായ ശൈഖ് റാഷിദ് ബിൻ സയീദ് അൽ മക്തൂമാണ് അദ്ദേഹത്തിന് "രാജകീയ ഫോട്ടോഗ്രാഫർ" എന്ന പേര് നൽകിയത്. 1960-കൾ മുതൽ യുഎഇയുടെ ചരിത്രം രേഖപ്പെടുത്തുന്ന അദ്ദേഹത്തിന്റെ അമൂല്യമായ ഫോട്ടോഗ്രാഫിക് ശേഖരം സായിദ് നാഷണൽ മ്യൂസിയത്തിലും ഇത്തിഹാദ് മ്യൂസിയത്തിലും പ്രദർശിപ്പിച്ചിട്ടുണ്ട്.

renowned uae royal photographer ramesh shukla, who documented key moments in the nation’s history, has passed away. sheikh hamdan paid heartfelt tribute, recalling his iconic images that captured the leadership, heritage and transformation of the united arab emirates.