മദീന: സഊദിയിലെ മദീനയിൽ വാഹനാപകടത്തിൽ കോഴിക്കോട് സ്വദേശിയായ പ്രവാസി അന്തരിച്ചു. പേരാമ്പ്ര കുത്താളി സ്വദേശി പാണമ്പ്ര കൊയ്‌ലോത്ത് അബ്ദു (67) ആണ് തിങ്കളാഴ്ച മരിച്ചത്.

മസ്‌ജിദുൽ ഖുബ പരിസരത്തുവെച്ച് റോഡ് മുറിച്ചു കടക്കുന്നതിനിടെ ഒരു വിദേശിയുടെ വാഹനം ഇടിച്ചാണ് അപകടമുണ്ടായത്. ഗുരുതരമായി പരുക്കേറ്റ അബ്ദുവിനെ ഉടൻ തന്നെ മദീനയിലെ ഹയാത്ത് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. കഴിഞ്ഞ 15 വർഷമായി മദീനയിലെ ഒരു ഈത്തപ്പഴ കമ്പനിയിൽ ജോലി ചെയ്തു വരികയായിരുന്നു അദ്ദേഹം. കഴിഞ്ഞ 23 വർഷമായി സഊദിയിൽ പ്രവാസിയായിരുന്നു.

പരേതരായ മൂസ-കുഞ്ഞാമി ദമ്പതികളുടെ മകനാണ് അബ്ദു. ഭാര്യ: ജമീല. മക്കൾ: അൻവർ, അഷ്ക്കർ, താഹിറ, ജസീല, അരീഫ.

മരണാനന്തര നടപടികൾ പൂർത്തിയാക്കി ചൊവ്വാഴ്‌ച ഇശ നമസ്കാരത്തിന് ശേഷം മദീനയിലെ ജന്നത്തുൽ ബഖീഹ് മഖ്ബറയിൽ ഖബറടക്കുമെന്ന് ബന്ധുക്കൾ അറിയിച്ചു. നടപടികൾ വേഗത്തിലാക്കാൻ നവോദയ മദീന രക്ഷാധികാരി നിസാർ കരുനാഗപ്പള്ളിയുടെ നേതൃത്വത്തിലുള്ള സാമൂഹിക പ്രവർത്തകർ രംഗത്തുണ്ട്.