തിരുവനന്തപുരം: ആരോഗ്യ മന്ത്രി വീണാ ജോര്‍ജിന്റെ ഔദ്യോഗിക വസതിയില്‍ യൂത്ത് കോണ്‍ഗ്രസ് നടത്തിയ പ്രതിഷേധത്തില്‍ പൊലിസിന് സംഭവിച്ചത് ഗുരുതര വീഴ്ചയെന്ന് കണ്ടെത്തല്‍. സ്‌പെഷല്‍ ബ്രാഞ്ച് മുന്‍കൂട്ടി മുന്നറിയിപ്പ് നല്‍കിയിട്ടും വസതിക്ക് മുന്നില്‍ മതിയായ സുരക്ഷാ ഉദ്യോഗസ്ഥരെ വിന്യസിച്ചില്ലെന്നാണ് റിപോര്‍ട്ട്. സംഭവത്തില്‍ തിരുവനന്തപുരം സിറ്റി പൊലിസ് കമ്മീഷണര്‍ കന്റോണ്‍മെന്റ് എസിപിയോട് വിശദീകരണം തേടും.

ഇന്ന് രാവിലെ ഏഴ് മണിയോടെ മന്ത്രി വസതിയില്‍ നിന്നു പുറപ്പെട്ടതിന് പിന്നാലെയായിരുന്നു പ്രതിഷേധം അരങ്ങേറിയത്. ഏഴരയോടെ മുദ്രാവാക്യം വിളികളുമായി ഇരച്ചെത്തിയ യൂത്ത് കോണ്‍ഗ്രസ് പ്രവര്‍ത്തകര്‍ മന്ത്രിയുടെ വീടിന് മുന്നില്‍ റീത്ത് വച്ചു.

പ്രതിഷേധം നടക്കുമ്പോള്‍ വെറും മൂന്ന് പൊലിസുകാര്‍ മാത്രമാണ് വസതിക്ക് മുന്നില്‍ ഡ്യൂട്ടിയിലുണ്ടായിരുന്നത്. 
പ്രതിഷേധം തുടങ്ങി 15 മിനിറ്റുകള്‍ക്ക് ശേഷമാണ് കൂടുതല്‍ പൊലിസുകാര്‍ സ്ഥലത്തെത്തിയത്.
സ്‌പെഷല്‍ ബ്രാഞ്ച് നല്‍കിയ റിപോര്‍ട്ട് ഗൗരവമായി എടുക്കുന്നതില്‍ പ്രാദേശിക പൊലിസിന് വീഴ്ച സംഭവിച്ചു.

ALSO READ: അവയവങ്ങൾ നഷ്ടപ്പെട്ട ഗസ്സയിലെ 1,000 കുട്ടികൾക്ക് താങ്ങായി ഷാർജ; ബിഗ് ഹാർട്ട് ഫൗണ്ടേഷൻ കൃത്രിമാവയവങ്ങളും ചികിത്സയും നൽകും

പ്രവര്‍ത്തകരെ അറസ്റ്റ് ചെയ്ത് നീക്കാന്‍ ശ്രമിക്കുന്നതിനിടെ പൊലിസും പ്രവര്‍ത്തകരും തമ്മില്‍ ഉന്തും തള്ളും കൈയേറ്റവുമുണ്ടായി. കസ്റ്റഡിയിലെടുത്തവരെ കൊണ്ടുപോകാന്‍ അനുവദിക്കാതെ പ്രവര്‍ത്തകര്‍ തടഞ്ഞതോടെ പ്രദേശത്ത് വലിയ തോതിലുള്ള കൈയാങ്കളിയാണ് നടന്നത്. ഏറെ നേരത്തെ ശ്രമത്തിനൊടുവിലാണ് പ്രവര്‍ത്തകരെ പൊലിസ് സ്ഥലത്തുനിന്നു നീക്കിയത്.

Massive security lapse reported at Health Minister's official residence in Thiruvananthapuram as Youth Congress protesters breach the perimeter despite Special Branch warnings.