തിരുവനന്തപുരം: പ്രതിപക്ഷ നേതാവ് വി.ഡി സതീശന്റെ നിര്‍ദ്ദേശപ്രകാരമാണ് തന്റെ വീട് ആക്രമിച്ചതെന്ന് ആരോഗ്യമന്ത്രി വീണാ ജോര്‍ജ്. സ്വകാര്യ കുത്തകകളെ സഹായിക്കുന്ന നിലപാടാണിത്. സര്‍ക്കാര്‍ ആശുപത്രികള്‍ തകര്‍ച്ചയിലാണെന്ന് വരുത്താനുള്ള ശ്രമമാണിതെന്നും കോണ്‍ഗ്രസിന് തെരഞ്ഞെടപ്പ് പരാജയ ഭീതിയാണെന്നും മന്ത്രി ആരോപിച്ചു. കോണ്‍ഗ്രസിന് യൂത്ത് കോണ്‍ഗ്രസിനും ജനം റീത്ത് വെക്കുമെന്നും ആരോഗ്യമന്ത്രി പറഞ്ഞു. 

ചികിത്സാ പിഴവില്‍ സര്‍ക്കാര്‍ ഉത്തരവാദിത്തത്തോടെ നടപടി കൈക്കൊള്ളുമെന്നും ആരെയും സംരക്ഷിക്കാന്‍ ശ്രമിച്ചിട്ടില്ലെന്നും ആരോഗ്യമന്ത്രി പറഞ്ഞു. വിഷയത്തില്‍ ചെയ്യേണ്ടതെല്ലാം ചെയ്തിട്ടുണ്ട്. കുറ്റക്കാര്‍ക്കെതിരെ മുഖം നോക്കാതെ നടപടിയെടുക്കുമെന്നും മന്ത്രി അറിയിച്ചു. 

അതേസമയം, മന്ത്രി വീണാ ജോര്‍ജിനെതിരെ നടന്ന യൂത്ത് കോണ്‍ഗ്രസിന്റെ സമരരീതിയെ തള്ളിപ്പറഞ്ഞ് പ്രതിപക്ഷ നേതാവ് വി.ഡി സതീശന്‍ പറഞ്ഞു. റീത്ത് വെക്കലും മന്ത്രിമാരുടെ വീട്ടില്‍ കയറിയുള്ള സമരവും തങ്ങളുടെ രീതിയല്ലെന്ന് സതീശന്‍ പറഞ്ഞു. മന്ത്രിമാരുടെ വീട്ടില്‍ കൊണ്ടുപോയി റീത്ത് വയ്ക്കാന്‍ പറയുന്നതല്ല തന്റെ ജോലിയെന്നും അദ്ദേഹം പറഞ്ഞു. 

ALSO READ: ആരോഗ്യമന്ത്രിയുടെ വസതിയില്‍ യൂത്ത് കോണ്‍ഗ്രസ് പ്രതിഷേധം; പൊലിസിന് ഗുരുതര സുരക്ഷാ വീഴ്ചയെന്ന് റിപോര്‍ട്ട്

തന്റെ വീട്ടിലേക്ക് ആളുകളെ വിട്ട് തല്ലിത്തകര്‍ത്തത് മന്ത്രിമാര്‍ പറഞ്ഞിട്ടാണോയെന്ന മറു ചോദ്യവും വി.ഡി സതീശന്‍ ഉന്നയിച്ചു. പറവൂരിലെ എന്റെ സ്വകാര്യവസതിയില്‍ വീട്ടില്‍ നിവേദനം നല്‍കിയവരെ തല്ലിയിട്ട് പോലും കേസ് എടുത്തിട്ടില്ല. അന്ന് ആക്രമണം നടത്തിയവര്‍ക്കെതിരെ കേസെടുക്കുന്നതിന് പകരം, വീടിനകത്ത് ഉണ്ടായിരുന്നവര്‍ക്കെതിരെയും നിവേദനം നല്‍കാന്‍ വന്നവര്‍ക്കെതിരെയുമാണ് അന്ന് ജാമ്യമില്ലാ വകുപ്പുകള്‍ പ്രകാരം കേസെടുത്തതെന്നും പ്രതിപക്ഷ നേതാവ് പറഞ്ഞു. 

ഇന്ന് രാവിലെ ഏഴ് മണിയോടെ മന്ത്രി വസതിയില്‍ നിന്നു പുറപ്പെട്ടതിന് പിന്നാലെയായിരുന്നു പ്രതിഷേധം അരങ്ങേറിയത്. ഏഴരയോടെ മുദ്രാവാക്യം വിളികളുമായി ഇരച്ചെത്തിയ യൂത്ത് കോണ്‍ഗ്രസ് പ്രവര്‍ത്തകര്‍ മന്ത്രിയുടെ വീടിന് മുന്നില്‍ റീത്ത് വച്ചു.

ALSO READ: ആശുപത്രികളിലെ അനാസ്ഥ; പത്തുവര്‍ഷത്തിനിടെ സര്‍ക്കാര്‍ പ്രഖ്യാപിച്ചത് 45 ലേറെ അന്വേഷണങ്ങള്‍, നടക്കുന്നത് റിപ്പോര്‍ട്ട് തേടല്‍ മാത്രം

പ്രവര്‍ത്തകരെ അറസ്റ്റ് ചെയ്ത് നീക്കാന്‍ ശ്രമിക്കുന്നതിനിടെ പൊലിസും പ്രവര്‍ത്തകരും തമ്മില്‍ ഉന്തും തള്ളും കൈയേറ്റവുമുണ്ടായി. കസ്റ്റഡിയിലെടുത്തവരെ കൊണ്ടുപോകാന്‍ അനുവദിക്കാതെ പ്രവര്‍ത്തകര്‍ തടഞ്ഞതോടെ പ്രദേശത്ത് വലിയ തോതിലുള്ള കൈയാങ്കളിയാണ് നടന്നത്. ഏറെ നേരത്തെ ശ്രമത്തിനൊടുവിലാണ് പ്രവര്‍ത്തകരെ പൊലിസ് സ്ഥലത്തുനിന്നു നീക്കിയത്.

A fresh political confrontation erupted in Kerala after Health Minister Veena George alleged that her residence was attacked at the instigation of Opposition Leader V. D. Satheesan. Responding to the allegations, VD Satheesan distanced himself from the Youth Congress protest, stating that wreath-laying demonstrations or entering ministers’ homes are not part of their protest culture.