പൂഞ്ഞാർ: പൂഞ്ഞാറിൽ എൽഡിഎഫ് സ്ഥാനാർത്ഥി സെബാസ്റ്റ്യൻ കുളത്തുങ്കലും പൊലിസും തമ്മിൽ വാക്കേറ്റം. കൂവപ്പള്ളിയിലെ എൽഡിഎഫ് ബൂത്ത് കമ്മിറ്റി ഓഫീസ് ദൂരപരിധി ലംഘിച്ചുവെന്ന് ആരോപിച്ച് പൊലിസ് ബൂത്ത് ഓഫീസ് മാറ്റി സ്ഥാപിക്കാൻ ശ്രമിച്ചതാണ് സംഘർഷത്തിന് വഴിവെച്ചത്. 

നിയമലംഘനമാരോപിച്ച് പാർട്ടിയുടെ ഫ്ലെക്‌സ് ബോർഡുകളും, ഓഫീസും പൊലിസ് മാറ്റാൻ ശ്രമിക്കുന്നതിനിടെ  സ്ഥലത്തെത്തിയ സെബാസ്റ്റ്യൻ കുളത്തുങ്കൽ പൊലിസിനെ തടയുകയും വാക്കേറ്റത്തിൽ ഏർപ്പെടുകയുമായിരുന്നു.

താൻ 35 വർഷമായി പൊതുരംഗത്തുണ്ടെന്നും, മെയ് 20 വരെ ഇവിടുത്തെ എംഎൽഎ താനാണെന്ന് മറക്കരുതെന്നും എന്നും അദ്ദേഹം പൊലിസിനോട് പറഞ്ഞു. കൂടാതെ, ഡിജിപിക്ക് മുകളിലാണ് തന്റെ റാങ്കെന്നും തിരഞ്ഞെടുപ്പ് ഇന്നത്തോടെ തീരുമെന്നും ഓർക്കണമെന്നും അദ്ദേഹം ഉദ്യോഗസ്ഥരെ ഭീഷണിപ്പെടുത്തി. 

ALSO READ: കേരളം വിധിയെഴുതി; വോട്ടിങ് സമയം അവസാനിച്ചു, 80% പിന്നിട്ട് നാല് മണ്ഡലങ്ങള്‍

അതേസമയം, 'എടോ' എന്ന് വിളിച്ചുകൊണ്ടുള്ള എംഎൽഎയുടെ ഭീഷണിക്ക് പൊലിസ് ഉദ്യോഗസ്ഥൻ കൃത്യമായ മറുപടി നൽകി. നിയമം ലംഘിച്ചതിനാലാണ് നടപടിയെടുത്തതെന്നും പേടിച്ചിട്ടല്ല താൻ ജീവിക്കുന്നതെന്നും ഉ​ദ്യോ​ഗസ്ഥൻ എംഎൽഎയോട് പറഞ്ഞു. അതേസമയം, സംഭവത്തിന്റെ ദൃശ്യങ്ങൾ ഇപ്പോൾ സാമൂഹ്യ മാധ്യമങ്ങളിൽ പ്രചരിക്കുന്നുണ്ട്.