മനാമ: സൗദി അറേബ്യയിലെ എനര്‍ജി, പെട്രോകെമിക്കല്‍ കേന്ദ്രങ്ങള്‍ ഉള്‍പ്പെടെയുള്ള നിര്‍ണായക അടിസ്ഥാന സൗകര്യങ്ങള്‍ ലക്ഷ്യമിട്ട് നടന്ന ആക്രമണങ്ങളെ ബഹ്‌റൈന്‍ ശക്തമായി എതിര്‍ത്തു. ഗള്‍ഫ് മേഖലയിലെ സമാധാനത്തിനും സ്ഥിരതയ്ക്കും ഭീഷണിയാകുന്ന നടപടികളാണിവയെന്ന് ബഹ്‌റൈന്‍ വിദേശകാര്യ മന്ത്രാലയം വ്യക്തമാക്കി.

ആക്രമണങ്ങളെ 'ഗുരുതരവും അന്യായവുമായ ശത്രുതാപരമായ നീക്കങ്ങള്‍' എന്നാണ് ബഹ്‌റൈന്‍ വിശേഷിപ്പിച്ചത്. ഗള്‍ഫ് സഹകരണ കൗണ്‍സില്‍ രാജ്യങ്ങളിലെ സിവിലിയന്‍ മേഖലകളും സാമ്പത്തിക സംവിധാനങ്ങളും ലക്ഷ്യമിട്ട് തുടരുന്ന ഭീഷണികളുടെ ഭാഗമായാണ് ഈ സംഭവങ്ങളെ കാണുന്നതെന്നും അധികൃതര്‍ ചൂണ്ടിക്കാട്ടി.

അന്താരാഷ്ട്ര നിയമങ്ങളും രാജ്യങ്ങള്‍ തമ്മിലുള്ള നല്ല അയല്‍ബന്ധവും ലംഘിക്കുന്ന തരത്തിലുള്ള നടപടികളാണ് ഇത്തരം ആക്രമണങ്ങളെന്ന് പ്രസ്താവനയില്‍ പറയുന്നു. പ്രദേശത്തെ സമാധാനം തകര്‍ക്കുന്ന ഇത്തരം നീക്കങ്ങള്‍ ഉടന്‍ അവസാനിപ്പിക്കണമെന്ന് ബഹ്‌റൈന്‍ ആവശ്യപ്പെട്ടു.

ALSO READ: തടസ്സങ്ങള്‍ക്ക് വിരാമം; സ്വന്തം ആകാശത്ത് വീണ്ടും പറന്ന് ഗള്‍ഫ് എയര്‍

സൗദി അറേബ്യയ്ക്ക് പൂര്‍ണ പിന്തുണ പ്രഖ്യാപിച്ച ബഹ്‌റൈന്‍, രാജ്യത്തിന്റെ സുരക്ഷയും പരമാധികാരവും സംരക്ഷിക്കാന്‍ സൗദി സ്വീകരിക്കുന്ന എല്ലാ നടപടികള്‍ക്കും പിന്തുണ നല്‍കുമെന്നും വ്യക്തമാക്കി. ഗള്‍ഫ് മേഖലയിലെ സുരക്ഷ ഉറപ്പാക്കുന്നതില്‍ സൗദിയുടെ പങ്ക് നിര്‍ണായകമാണെന്നും അവര്‍ കൂട്ടിച്ചേര്‍ത്തു.

ഇത്തരം ആക്രമണങ്ങളെ ചെറുക്കാന്‍ അന്താരാഷ്ട്ര സമൂഹം കൂടുതല്‍ ശക്തമായി ഇടപെടണമെന്നും ബഹ്‌റൈന്‍ ആവശ്യപ്പെട്ടു. ഐക്യരാഷ്ട്ര സഭയുടെ ചട്ടങ്ങളും അന്താരാഷ്ട്ര നിയമങ്ങളും കര്‍ശനമായി പാലിക്കപ്പെടേണ്ടതുണ്ടെന്നും, മേഖലയില്‍ സമാധാനവും സുരക്ഷയും നിലനിര്‍ത്താന്‍ കൂട്ടായ്മ ആവശ്യമാണ് എന്നും പ്രസ്താവനയില്‍ വ്യക്തമാക്കുന്നു.

ആഗോള എനര്‍ജി വിതരണ ശൃംഖലകള്‍ക്കും ഇത്തരം ആക്രമണങ്ങള്‍ ഭീഷണിയാകുന്ന സാഹചര്യത്തില്‍, നിര്‍ണായക അടിസ്ഥാന സൗകര്യങ്ങളുടെ സുരക്ഷ ഉറപ്പാക്കാന്‍ രാജ്യങ്ങള്‍ തമ്മിലുള്ള സഹകരണം ശക്തിപ്പെടുത്തേണ്ടതുണ്ടെന്നും ബഹ്‌റൈന്‍ മുന്നറിയിപ്പ് നല്‍കി.

Bahrain strongly condemns Iranian attacks targeting Saudi Arabia’s energy and petrochemical facilities, warning of serious threats to regional peace and global energy security.