കൊച്ചി: എൻ.എസ്.എസ് - എസ്.എൻ.ഡി.പി ഐക്യ നീക്കത്തിന് പിന്നിൽ ചതിയുണ്ടെന്ന മന്ത്രി കെ.ബി. ഗണേഷ് കുമാറിന്റെ പ്രസ്താവനയ്ക്ക് രൂക്ഷമായ മറുപടിയുമായി എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ രംഗത്ത്. ഗണേഷ് കുമാർ ഒരു 'ലോക ചതിയൻ' ആണെന്നും അദ്ദേഹത്തിന്റെ രാഷ്ട്രീയ പാരമ്പര്യം തന്നെ ചതിയുടേതാണെന്നും വെള്ളാപ്പള്ളി തുറന്നടിച്ചു.

വെള്ളാപ്പള്ളിയുടെ പ്രധാന വിമർശനങ്ങൾ ഇവയാണ്:

ചതിയുടെ ഒക്കെ പ്രതിഫലമായിട്ടാണ് ഗണേഷ് കുമാറിന് മന്ത്രിസ്ഥാനം ലഭിച്ചത്.ഗണേഷ് കുമാർ സദാചാരബോധമില്ലാത്തയാളാണെന്നും വെള്ളാപ്പള്ളി പരിഹസിച്ചു.സ്വന്തം പിതാവിനെപ്പോലും ചതിച്ച പാരമ്പര്യമാണ് അദ്ദേഹത്തിനുള്ളതെന്ന് വെള്ളാപ്പള്ളി പരോക്ഷമായി സൂചിപ്പിക്കുകയും ചെയ്തു.

വിവാദത്തിന് കാരണമായ ഗണേഷ് കുമാറിന്റെ വെളിപ്പെടുത്തൽ

കഴിഞ്ഞ ദിവസം മാധ്യമങ്ങൾക്ക് നൽകിയ അഭിമുഖത്തിലാണ് ഗണേഷ് കുമാർ സമുദായ ഐക്യ നീക്കത്തെക്കുറിച്ച് വിവാദ വെളിപ്പെടുത്തലുകൾ നടത്തിയത്.ഐക്യ നീക്കത്തിന് പിന്നിൽ ഹിന്ദു ക്ഷേമമായിരുന്നില്ല, മറിച്ച് എൻ.എസ്.എസിനെ ഒരു വർഗീയ കക്ഷിയുടെ (എൻ.ഡി.എ) പാളയത്തിലെത്തിച്ച് വോട്ട് ഉറപ്പിക്കുക എന്നതായിരുന്നു ലക്ഷ്യം.

ഈ ചതി വെള്ളാപ്പള്ളി നടേശൻ കൂടി അറിഞ്ഞുകൊണ്ടുള്ളതായിരുന്നു. തുഷാർ വെള്ളാപ്പള്ളി വഴി എൻ.എസ്.എസിനെ രാഷ്ട്രീയമായി ഉപയോഗിക്കാനാണ് ശ്രമിച്ചത്.തുഷാർ വെള്ളാപ്പള്ളി എൻ.ഡി.എ ഘടകകക്ഷിയായതിനാൽ, എൻ.എസ്.എസിനെ വർഗീയവൽക്കരിക്കാനുള്ള നീക്കം തിരിച്ചറിഞ്ഞാണ് ജി. സുകുമാരൻ നായർ ഐക്യത്തിൽ നിന്ന് പിന്മാറിയത്. സുകുമാരൻ നായർ അപകടം മുൻകൂട്ടി കണ്ടുവെന്നും ഗണേഷ് അവകാശപ്പെട്ടു.

രാഷ്ട്രീയ പ്രത്യാഘാതം

എൻ.എസ്.എസിനെ കൂടെ നിർത്തി തുഷാർ വെള്ളാപ്പള്ളി രാഷ്ട്രീയ മുതലെടുപ്പ് നടത്തുമെന്ന് ജി. സുകുമാരൻ നായർ ഭയന്നുവെന്നും, മുസ്ലിം ലീഗിനെതിരെയുള്ള പരാമർശങ്ങൾ എൻ.എസ്.എസ് രീതിയായിരുന്നില്ലെന്നും ഗണേഷ് കുമാർ അഭിമുഖത്തിൽ പറഞ്ഞിരുന്നു. ഇതിനെതിരെയാണ് "മന്ത്രിസ്ഥാനം കിട്ടിയത് തന്നെ ചതിയിലൂടെയാണ്" എന്ന പരുഷമായ മറുപടിയുമായി വെള്ളാപ്പള്ളി രംഗത്തെത്തിയത്.

സമുദായ നേതാവും മന്ത്രിയും തമ്മിലുള്ള ഈ പരസ്യമായ ഏറ്റുമുട്ടൽ കേരള രാഷ്ട്രീയത്തിൽ പുതിയ ചർച്ചകൾക്ക് വഴിതുറന്നിരിക്കുകയാണ്.