തിരുവനന്തപുരം: പഞ്ചായത്ത് ഉദ്യോഗസ്ഥര്‍ക്ക് കര്‍ശന നിര്‍ദേശവുമായി തദ്ദേശ സ്വയംഭരണ വകുപ്പ്. ഫീല്‍ഡ് തല അന്വേഷണത്തിന്റെ ഭാഗമായി പൊതുജനങ്ങളോട് വാഹനം ഏര്‍പ്പാട് ചെയ്യാന്‍ ആവശ്യപ്പെടരുതെന്ന് തദ്ദേശസ്വയംഭരണ വകുപ്പ് പ്രിന്‍സിപ്പല്‍ ഡയരക്ടര്‍ ജില്ലാ ജോയിന്റ് ഡയരക്ടര്‍മാര്‍ക്ക് നിര്‍ദേശം നല്‍കി. മനുഷ്യാവകാശ കമ്മിഷന്റെ ഉത്തരവിനെ തുടര്‍ന്നാണ് നടപടി. ചില ഉദ്യോഗസ്ഥര്‍ വാഹനം എത്തിക്കാന്‍ നിര്‍ബന്ധം ചെലുത്തുന്നത് നിര്‍ധനരെ ബുദ്ധിമുട്ടിച്ചിരുന്നു.

വരന്തരപ്പിള്ളി പഞ്ചായത്തിലുണ്ടായ ഫീല്‍ഡ് പരിശോധനയാണ് നിര്‍ദേശത്തിനു കാരണമായ സംഭവം. മനോദൗര്‍ബല്യമുള്ള മകനോടൊപ്പം വാസയോഗ്യമല്ലാത്ത വീട്ടില്‍ കഴിഞ്ഞിരുന്ന വിധവയായ സ്ത്രീയുടെ നിസ്സഹായാവസ്ഥയില്‍ പൊതുപ്രവര്‍ത്തകനായ കെ.ജി.രവീന്ദ്രനാഥ് ഇടപെട്ടിരുന്നു. 

ദയനീയ സാഹചര്യത്തിലുള്ള ഇവരുടെ റേഷന്‍ കാര്‍ഡ് എപിഎല്‍ വിഭാഗത്തില്‍പെട്ടതായിരുന്നു. ഇത് ബിപിഎല്‍ ആക്കാന്‍ വേണ്ടി നടത്തിയ ഫീല്‍ഡ് പരിശോധനയിലാണ് വാഹനപ്രശ്‌നം രവീന്ദ്രനാഥിന്റെ ശ്രദ്ധയില്‍പെട്ടത്. ഇതോടെ മനുഷ്യാവകാശ കമ്മിഷനെ സമീപിക്കുകയായിരുന്നു. വാഹനം ആവശ്യപ്പെടുന്നത് കുറ്റകരമാണെന്ന് കമ്മിഷന്‍ കണ്ടെത്തി. ഇതോടെയാണ് തദ്ദേശ സഹകരണ വകുപ്പിന് ഉത്തരവ് കൈമാറിയത്. വാഹനം ഏര്‍പ്പാടാക്കാന്‍ ജനങ്ങളോട് ആവശ്യപ്പെടരുതെന്ന ഉത്തരവ് പഞ്ചായത്ത് ഓഫിസില്‍ പ്രദര്‍ശിപ്പിക്കണമെന്നും നിര്‍ദേശമുണ്ട്.