ശ്രീനഗര്‍: ജമ്മുകശ്മിരില്‍ ഉണ്ടായ വ്യത്യസ്ത ഏറ്റുമുട്ടലുകളില്‍ നാലു ഭീകരരും പൊലിസുകാരനും കൊല്ലപ്പെട്ടു. ഒരു പൊലിസുകാരനു പരുക്കേറ്റു. നിയന്ത്രണരേഖയിലെ നൗഗാം സെക്ടറില്‍ നുഴഞ്ഞുകയറാന്‍ ശ്രമിച്ച മൂന്നു ഭീകരരെയാണു സൈന്യം വധിച്ചത്. അതിര്‍ത്തിയില്‍ സംശയകരമായ നീക്കം കണ്ടതോടെ സൈനികര്‍ ഭീകരരോടു കീഴടങ്ങാന്‍ ആവശ്യപ്പെടുകയായിരുന്നു. എന്നാല്‍ ഭീകരര്‍ സൈന്യത്തിനു നേരെ വെടിയുതിര്‍ത്തു. തുടര്‍ന്നു സൈന്യം നടത്തിയ പ്രത്യാക്രമണത്തിലാണ് ഭീകരര്‍ കൊല്ലപ്പെട്ടത്. പൂഞ്ച് ജില്ലയില്‍ ഭീകരര്‍ നടത്തിയ ആക്രമണത്തിലാണു പൊലിസുകാരന്‍ കൊല്ലപ്പെട്ടത്. പൂഞ്ച് നഗരത്തിലെ നിര്‍മാണത്തിലിരുന്ന സര്‍ക്കാര്‍ കെട്ടിടത്തില്‍  രണ്ടു തീവ്രവാദികള്‍ ഒളിച്ചിരിക്കുന്നതായി വിവരം ലഭിച്ചതിനെ തുടര്‍ന്ന് സൈനികര്‍ എത്തിയതോടെയാണ് ഏറ്റുമുട്ടല്‍ ഉണ്ടായത്. ഇന്നലെ രാവിലെ 7.50നാണ് ഏറ്റുമുട്ടലുണ്ടായത്. സൈന്യവും പൊലിസും കെട്ടിടം വളഞ്ഞതോടെ ഭീകരര്‍ വെടിയുതിര്‍ക്കുകയായിരുന്നു. തുടര്‍ന്ന് രൂക്ഷമായ ഏറ്റുമുട്ടലാണ് നടന്നത്. ഇതിലാണ് പൊലിസുകാരന്‍ കൊല്ലപ്പെട്ടത്. ഒരു സബ് ഇന്‍സപെക്ടര്‍ക്ക് പരുക്കേറ്റിട്ടുണ്ട്.