കിയോഞ്ജര്‍ (ഒഡീഷ): മരണപ്പെട്ട സഹോദരിയുടെ അക്കൗണ്ടിലെ പണം പിന്‍വലിക്കാനാണ് ഒഡീഷയിലെ കിയോഞ്ജര്‍ ജില്ലയിലെ ഡയാനാലി ഗ്രാമത്തില്‍ നിന്നുള്ള ജിതു മുണ്ട ഒഡീഷ ഗ്രാമീണ്‍ ബാങ്കിലെത്തിയത്. എന്നാല്‍ അക്കൗണ്ടിന്റെ ഉടമ വന്നാലേ പണം നല്‍കൂ എന്നായി ബാങ്ക് അധികൃതര്‍. നിയമങ്ങളും നിയമാവലികളുമറിയാത്ത ഒരു സാധാരണക്കാരനായ ജിതു സഹോദരി ജീവിച്ചിരിപ്പില്ലെന്ന് ബാങ്കിനെ അറിയിച്ചു. പിന്നെയാണ് നാടിനെ തന്നെ ഞെട്ടിച്ച ആ സംഭവം.

മൂന്നുതവണയാണ് ഇയാള്‍ പണത്തിനായി ബാങ്കില്‍ പോത്. അക്കൗണ്ട് ഉടമ നേരിട്ട് എത്തണമെന്നോ അല്ലെങ്കില്‍ നിയമപരമായ പിന്തുടര്‍ച്ചാവകാശ സര്‍ട്ടിഫിക്കറ്റ് ഹാജരാക്കണമെന്നോ ആയിരുന്നു ബാങ്കിന്റെ നിലപാട്. സങ്കീര്‍ണമായ ഈ പ്രക്രിയകളൊന്നും മനസ്സിലാക്കാന്‍ കഴിയാതെ ഓരോ തവണയും അയാള്‍ നിസ്സഹായനായി മടങ്ങി. തന്റെ മുന്നില്‍ ഒരു വഴിയുമില്ലെന്ന് കണ്ട ജിതു ഒടുവില്‍ അത് ചെയ്യാന്‍ തീരുമാനിക്കുകയായിരുന്നു. 

ALSO READ: പ്രശ്‌നങ്ങള്‍ പരിഹരിക്കാന്‍ നടത്തുന്ന കൗണ്‍സിലിങ് സെഷനിടയില്‍ പെണ്‍മക്കളെ പൊലിസ് സ്‌റ്റേഷനില്‍ ഉപേക്ഷിച്ച് ദമ്പതികള്‍ സ്ഥലംവിട്ടു

ജിതു, തിങ്കളാഴ്ച ഗ്രാമത്തിലെ ശ്മശാനത്തിലെത്തി സഹോദരിയുടെ മൃതദേഹാവശിഷ്ടങ്ങള്‍ കുഴിച്ചെടുത്തു. തുണിയില്‍ പൊതിഞ്ഞ അസ്ഥികൂടം തോളിലേറ്റി കൊടും വെയിലില്‍ മൂന്ന് കിലോമീറ്റര്‍ നടന്ന് ബാങ്കിലെത്തി. ബാങ്കിലെത്തിയ ജീവനക്കാരെ വരവേറ്റത് വരാന്തയില്‍ കിടന്ന മൃതദേഹമായിരുന്നു. ബ്രാഞ്ച് മാനേജര്‍ ഉടന്‍ ലോക്കല്‍ പൊലിസില്‍ വിവരമറിയിച്ചു. ഈ കാഴ്ച കണ്ട് നാട്ടുകാരും അന്തംവിട്ടു. വിവരമറിഞ്ഞെത്തിയ പൊലിസ് ജിതുവിനെ ശാന്തനാക്കുകയും അസ്ഥികൂടം ഏറ്റെടുക്കുകയായിരുന്നു. 

സംഭവം വിവാദമായതോട പടാന പൊലിസ് സ്റ്റേഷനിലെ ഉദ്യോഗസ്ഥരും മറ്റുമെത്തി ജിതുവിനെ കൗണ്‍സിലിങ് നടത്തി. പിന്നീട് അസ്ഥികൂടം തിരികെ കൊണ്ടുപോയി അദ്ദേഹത്തിന്റെ സഹായത്തോടെ വീണ്ടും സംസ്‌കരിച്ചു.

ഒഡീഷ ഗ്രാമീണ്‍ ബാങ്ക് ഉദ്യോഗസ്ഥര്‍ ചൊവ്വാഴ്ച കിയോഞ്ജര്‍ ജില്ലയിലെ ഡയാനാലി ഗ്രാമത്തിലെത്തി തുക കൈമാറി.19,300 രൂപയാണ് അക്കൗണ്ടിലുണ്ടായിരുന്നത്. നടപടി ക്രമങ്ങള്‍ പൂര്‍ത്തിയാക്കി ഗ്രാമവാസികളുടെയും ജന പ്രതിനിധികളുടെയും സാന്നിധ്യത്തിലാണ് തുക നല്‍കിയത്. ജില്ല റെഡ് ക്രോസ് ഫണ്ട് 30,000 രൂപയും ഇയാള്‍ക്ക് കൈമാറിയിട്ടുണ്ട്.

a man in odisha shocked officials by bringing his deceased sister’s remains to a bank after being repeatedly denied withdrawal from her account. the issue was later resolved and the money was handed over following formal procedures.