കൗണ്‍സിലിങ്ങിനായി പൊലിസ് സ്റ്റേഷനില്‍ എത്തിയ ദമ്പതികള്‍ സെഷന്റെ ഇടയില്‍ തങ്ങളുടെ രണ്ട് പെണ്‍മക്കളെ ഉപേക്ഷിച്ച് സ്ഥലം വിട്ടു. ഒടുവില്‍ മുത്തശ്ശിയെ വിളിച്ച് കുഞ്ഞുങ്ങളെ ഏല്‍പിക്കുകയായിരുന്നു പൊലിസ്. തെലങ്കാനയിലാണ് സംഭവം.  

കടയുടമയായ രവികുമാറും നഴ്‌സിംഗ് വിദ്യാര്‍ത്ഥിനിയായ ലളിതയും ഏകദേശം പത്തു വര്‍ഷം മുമ്പ് പ്രണയിച്ച് വിവാഹം  കഴിച്ചതാണ്.  പിന്നീട് ബന്ധം വഷളായി. ഇവര്‍ക്കിടയില്‍ തര്‍ക്കങ്ങള്‍ പതിവാകുകയുടെ ചെയ്തു.  പരാതിയുമായി ലളിതയാണ് പൊലിസിനെ സമീപിച്ചത്. തുടര്‍ന്ന് പൊലിസ് ഇരുവരെയും കൗണ്‍സിലിങിന് വിളിച്ചു. കൗണ്‍സിലിങിനിടെ ലളിത തന്റെ മംഗല്യസൂത്രവും കാല്‍വിരലിലെ മോതിരങ്ങളും ഊരി മേശപ്പുറത്ത് വച്ചു.  ബന്ധം തുടരാനോ കുട്ടികളെ പരിപാലിക്കാനോ ആഗ്രഹിക്കുന്നില്ലെന്ന് പ്രഖ്യാപിച്ച് അവര്‍ സ്റ്റേഷനില്‍ നിന്ന് ഇറങ്ങിപ്പോവുകയും ചെയ്തു.

ALSO READ: ഹണിമൂണിനിടെ ഭർത്താവിനെ കൊലപ്പെടുത്തിയ കേസ്; പത്തുമാസത്തെ ജയിൽവാസത്തിന് ശേഷം ഭാര്യക്ക് കോടതി ജാമ്യം അനുവദിച്ചു

പിന്നാലെ രവികുമാറും ഇറങ്ങിപ്പോവുകയായിരുന്നു. അവരോടൊപ്പമുള്ള കുഞ്ഞുങ്ങളെ രണ്ട് പേരും ശ്രദ്ധിച്ചില്ല. പൊലിസ് ഇരുവരെയും ഫോണില്‍ വിളിച്ചെങ്കിലും മറുപടി ലഭിച്ചില്ല. കുട്ടികള്‍ ഭയന്ന് കരയാന്‍ തുടങ്ങി. കുട്ടികളെ ആശ്വസിപ്പിക്കാനും അവരുടെ സുരക്ഷ ഉറപ്പാക്കാനും സബ് ഇന്‍സ്‌പെക്ടര്‍ അന്‍വറിന്റെ നേതൃത്വത്തില്‍ പൊലിസ് ഉദ്യോഗസ്ഥര്‍ശ്രമിച്ചു. മാതാപിതാക്കളെ ബന്ധപ്പെടാനുള്ള ശ്രമങ്ങള്‍ പരാജയപ്പെട്ടതോടെ പൊലിസ് മുത്തശ്ശിയെ വിളിച്ച് കുട്ടികളെ അവരുടെ സംരക്ഷണത്തിലേക്ക് മാറ്റുകയായിരുന്നു.

സംഭവത്തില്‍ കേസെടുത്തിട്ടില്ല. കുടുംബത്തിലെ മുതിര്‍ന്നവരുടെ സഹായത്തോടെ ദമ്പതികള്‍ക്ക് വീണ്ടും കൗണ്‍സിലിങ് നല്‍കാനുള്ള ശ്രമത്തിലാണ് പൊലിസ്.

a couple in telangana left their two young daughters at a police station during a counselling session and walked away