ഷൊര്‍ണൂര്‍: വണ്ടൂര്‍ സ്വദേശിയായ പ്രവാസി വ്യവസായി മുഹമ്മദാലിയെ തോക്കുചൂണ്ടി തട്ടിക്കൊണ്ടുപോയ സംഭവത്തില്‍ ഞെട്ടിക്കുന്ന വഴിത്തിരിവ്. സംഭവത്തിന് പിന്നില്‍ പ്രവര്‍ത്തിച്ച മുഖ്യസൂത്രധാരന്‍ വ്യവസായിയുടെ പിതാവിന്റെ സഹോദരപുത്രനായ സിയാസ് (54) ആണെന്ന് പൊലിസ് കണ്ടെത്തി. ഒളിവില്‍ കഴിഞ്ഞിരുന്ന ഇയാളെ മലപ്പുറം എടവണ്ണയില്‍ നിന്നാണ് പ്രത്യേക അന്വേഷണസംഘം പിടികൂടിയത്.

പ്രതികാരത്തിന് പിന്നിലെ കാരണം
ഒരുകാലത്ത് മുഹമ്മദാലിയുടെ ബിസിനസ് കാര്യങ്ങള്‍ വിശ്വസ്തതയോടെ നോക്കി നടത്തിയിരുന്ന വ്യക്തിയായിരുന്നു സിയാസ്. എന്നാല്‍ പില്‍ക്കാലത്ത് ഇയാളെ ചുമതലകളില്‍ നിന്ന് നീക്കം ചെയ്തതിലുള്ള കടുത്ത വിരോധമാണ് ക്വട്ടേഷന്‍ നല്‍കാന്‍ പ്രേരിപ്പിച്ചതെന്ന് പൊലിസ് പറഞ്ഞു.

2025 ഡിസംബര്‍ 6ന് മുഹമ്മദാലിയുടെ കാര്‍ തടഞ്ഞുനിര്‍ത്തി തോക്കുചൂണ്ടി ഒരു സംഘം തട്ടിക്കൊണ്ടുപോവുകയായിരുന്നു. അക്രമികളുടെ പിടിയില്‍ നിന്ന് സാഹസികമായി രക്ഷപ്പെട്ട ഇദ്ദേഹത്തെ ഒറ്റപ്പാലം കോതകുറിശ്ശിയില്‍ വച്ച് നാട്ടുകാരാണ് കണ്ടെത്തിയത്. കേസിലെ ഒരു പ്രതിയെ അന്നുതന്നെ പിടികൂടിയ ഡിവൈഎസ്പിയുടെ നേതൃത്വത്തിലുള്ള സംഘം, ഇയാളില്‍ നിന്ന് ലഭിച്ച സൂചനകളിലൂടെയാണ് സിയാസിലേക്ക് എത്തിയത്.

വിദേശത്തേക്ക് കടന്ന സിയാസ് തെളിവുകള്‍ നശിപ്പിക്കാന്‍ ശ്രമിച്ചെങ്കിലും പഴുതടച്ച അന്വേഷണത്തിലൂടെ പൊലിസ് ഇയാളെ വലയിലാക്കി. നിലവില്‍ ഒറ്റപ്പാലം കോടതി പ്രതിയെ 14 ദിവസത്തേക്ക് റിമാന്‍ഡ് ചെയ്തിരിക്കുകയാണ്. പാലക്കാട് ജില്ലാ പൊലിസ് മേധാവി അജിത്കുമാറിന്റെ നേരിട്ടുള്ള മേല്‍നോട്ടത്തിലായിരുന്നു അന്വേഷണം.

The police arrested Siyas, the cousin of an expatriate businessman, for planning his kidnapping at gunpoint due to a personal grudge over business matters.