പടിഞ്ഞാറത്തറ: നിര്‍ഝരി നാട്യ ദൃശ്യ കലാ കേന്ദ്ര സംഘടിപ്പിക്കുന്ന ഓണം, പെരുന്നാള്‍ ഫെസ്റ്റ് വ്യാഴാഴ്ച്ച വൈകിട്ട് ആറിന് ചലച്ചിത്ര സംവിധായകന്‍ രാജീവ് രവി ഉദ്ഘാടനം ചെയ്യും. പടിഞ്ഞാറത്തറ പഞ്ചായത്ത് സ്റ്റേഡിയത്തില്‍ ഗ്രാമ പഞ്ചായത്ത് പ്രസിഡന്റ് പി.ജി സജേഷ് അധ്യക്ഷനാവും. നിര്‍ഝരി ഫൗണ്ടേഷന്റെ ഉദ്ഘാടനം വെള്ളിയാഴ്ച വൈകിട്ട് ആറിന് സി.കെ ശശീന്ദ്രന്‍ എം.എല്‍.എ നിര്‍വഹിക്കും. സാംസ്‌കാരിക സമ്മേളനത്തില്‍ കല്‍പ്പറ്റ ബ്ലോക്ക് പഞ്ചായത്ത് പ്രസിഡന്റ് ശകുന്തള ഷണ്‍മുഖന്‍ അധ്യക്ഷയാവും. സാഹിത്യകാരിയും കേരള സാഹിത്യ അക്കാദമി ഉപാധ്യക്ഷയുമായ ഡോ. ഖദീജ മുംതാസ് മുഖ്യ പ്രഭാഷണം നടത്തും. സംവിധായകന്‍ രാജീവ് രവിയും എഡിറ്റര്‍ ബി അജിത് കുമാറും സംവാദത്തിന് നേതൃത്വം നല്‍കും. വെള്ളിയാഴ്ച ഉച്ചക്ക് രണ്ടിന് സംഗീതജ്ഞന്‍ ഡോ. മുകുന്ദനുണ്ണി കര്‍ണാടിക് സംഗീതം അവതരിപ്പിക്കും.