മലപ്പുറം: മുസ് ലിം ലീഗ് സംസ്ഥാന പ്രസിഡന്റ് പാണക്കാട് സാദിഖലി ശിഹാബ് തങ്ങള്‍ക്കെതിരെ അപകീര്‍ത്തികരമായ ഫേസ്ബുക്ക് പോസ്റ്റ് ഇട്ട പ്രതിയെ തിരിച്ചറിഞ്ഞതായി പൊലിസ്. പെരിന്തല്‍മണ്ണ സ്വദേശിയായ കാപ്പാ കേസ് പ്രതി മുഹമ്മദ് റോഷനാണ് പ്രതി. പെരിന്തല്‍മണ്ണ പൊലിസ് കേസ് രജിസ്റ്റര്‍ ചെയ്തു. പ്രതി ഒളിവിലാണെന്നാണ് പൊലിസ് പറയുന്നത്. 

വ്യാജ ദൃശ്യങ്ങള്‍ കാണിച്ച് സാദിഖലി തങ്ങളുടെ ബന്ധുവിനോട് 15 കോടി രൂപ ആവശ്യപ്പെട്ടു. ഇത് നിരസിച്ചപ്പോളാണ് വ്യാജ എഫ്.ബി അക്കൗണ്ട് ഉണ്ടാക്കി തങ്ങളെ അപകീര്‍ത്തിപ്പെടുത്തിയതെന്ന് പൊലിസ് പറയുന്നു. 

സാദിഖലി തങ്ങള്‍ക്കെതിരായ പോസ്റ്റിനെതിരെ മുസ്‌ലിം ലീഗ് പരാതി നല്‍കിയിരുന്നു.  പരാതിയില്‍ അപകീര്‍ത്തിപ്പെടുത്തല്‍, പ്രകോപനം സൃഷ്ടിക്കല്‍, വ്യാജരേഖ ചമയ്ക്കല്‍ വകുപ്പുകള്‍ ചുമത്തിയാണ് മലപ്പുറം സൈബര്‍ പൊലിസ് കേസെടുത്തത്.

ദിവസങ്ങള്‍ക്കു മുമ്പ് വിദേശത്ത് നിന്നാരംഭിച്ച ഫേസ്ബുക്ക് പ്രൊഫൈലിലാണ് സാദിഖലി തങ്ങള്‍ക്കെതിരെയുള്ള ആക്ഷേപം പോസ്റ്റ് ചെയ്തത്. മണിക്കൂറുകള്‍ക്കകം തന്നെ പോസ്റ്റ് പിന്‍വലിച്ച് അക്കൗണ്ട് ഡിലീറ്റ് ചെയ്തിരുന്നു. മാര്‍ച്ച് 22നാണ് പോസ്റ്റ് ചെയ്തത്.

An abusive social media post targeting Sadikali Thangal has been traced to an accused in a KAAPA case, with authorities suspecting it was part of a blackmail attempt. The incident has raised concerns over cyber harassment and misuse of social media, prompting further police investigation into the matter.