ഇറാനിലെ പരമോന്നത നേതാവിന് നൽകുന്ന അന്ത്യശാസനം, ഇറാന്റെ എണ്ണക്കമ്പനികൾ പിടിച്ചെടുക്കുമെന്ന മുന്നറിയിപ്പ്, അമേരിക്കയുടെ ഒറ്റ പ്രഹരത്തിൽ തെഹ്‌റാൻ മുട്ടുമടക്കുമെന്ന വിശ്വാസം... ഡൊണാൾഡ് ട്രംപിന്റെ 2026-ലെ ഇറാൻ യുദ്ധ തന്ത്രങ്ങളുടെ ഭാഗമായി ഇന്ന് നമ്മൾ കാണുന്ന ഈ കാര്യങ്ങൾ ഏകദേശം നാല് പതിറ്റാണ്ടുകൾക്ക് മുൻപേ അദ്ദേഹം പരസ്യമായി പ്രഖ്യാപിച്ചിരുന്നു എന്നത് പലരെയും അത്ഭുതപ്പെടുത്തിയേക്കാം. 1987-ൽ അമേരിക്കൻ വിദേശനയത്തെ വിമർശിച്ചുകൊണ്ട് പ്രമുഖ പത്രങ്ങളിൽ ട്രംപ് നൽകിയ ഒരു പരസ്യം ഇപ്പോൾ വീണ്ടും ആഗോളതലത്തിൽ ശ്രദ്ധ നേടുകയാണ്.

95,000 ഡോളറിന്റെ ആ പത്രപ്പരസ്യം
1987-ൽ, 41 വയസ്സുള്ള ഒരു ബിസിനസുകാരൻ മാത്രമായിരുന്ന കാലത്താണ് ഡൊണാൾഡ് ട്രംപ് അമേരിക്കയിലെ മൂന്ന് പ്രധാന പത്രങ്ങളിൽ ഒരു പേജ് മുഴുവൻ നീളുന്ന പരസ്യം നൽകിയത്. ദ ന്യൂയോർക്ക് ടൈംസ് (The New York Times), വാഷിങ്ടൺ പോസ്റ്റ് (The Washington Post), ബോസ്റ്റൺ ഗ്ലോബ് (The Boston Globe) എന്നീ പത്രങ്ങളിൽ പരസ്യം നൽകാനായി അന്ന് അദ്ദേഹം ചെലവാക്കിയത് 94,801 ഡോളറാണ്. വൈറ്റ് ഹൗസിലേക്കുള്ള അദ്ദേഹത്തിന്റെ രാഷ്ട്രീയ ലക്ഷ്യങ്ങളുടെ ആദ്യ സൂചനകളിലൊന്നായിരുന്നു ആ പരസ്യം. "അൽപ്പം നട്ടെല്ല് കാണിച്ചാൽ പരിഹരിക്കാൻ കഴിയാത്ത ഒരു കുഴപ്പവും അമേരിക്കയുടെ വിദേശ പ്രതിരോധ നയത്തിനില്ല" എന്ന തലക്കെട്ടോടെയായിരുന്നു ആ കുറിപ്പ് പ്രസിദ്ധീകരിച്ചത്. ഇറാൻ-ഇറാഖ് യുദ്ധത്തെത്തുടർന്ന് ഗൾഫ് മേഖലയിൽ ഉടലെടുത്ത പ്രതിസന്ധി കൈകാര്യം ചെയ്യുന്നതിൽ അമേരിക്കൻ ഭരണാധികാരികളെ ലോകം പരിഹസിക്കുകയാണെന്നാണ് ട്രംപ് അന്ന് പരസ്യത്തിലൂടെ പറഞ്ഞത്. 

ആർക്ക് വേണ്ടി നമ്മൾ പണം കളയണം?
അക്കാലത്ത് ഹോർമുസ് കടലിടുക്കിലൂടെ പോകുന്ന എണ്ണക്കപ്പലുകൾക്ക് അമേരിക്കൻ നാവികസേന സംരക്ഷണം നൽകിയിരുന്നു. ഇതിനെ ട്രംപ് രൂക്ഷമായി വിമർശിച്ചു. "നമ്മുടെ ഉടമസ്ഥതയിലല്ലാത്ത, നമുക്ക് ആവശ്യമില്ലാത്ത എണ്ണ വഹിച്ചുകൊണ്ട്, നമ്മളെ സഹായിക്കാൻ തയ്യാറല്ലാത്ത സഖ്യകക്ഷികൾക്ക് വേണ്ടി പോകുന്ന കപ്പലുകളെയാണ് നാം സംരക്ഷിക്കുന്നത്" എന്നായിരുന്നു ട്രംപിന്റെ പക്ഷം. ജപ്പാനെപ്പോലെയുള്ള സമ്പന്ന രാജ്യങ്ങൾ അവരുടെ ആവശ്യങ്ങൾക്കായി അമേരിക്കൻ സൈന്യത്തെ ഉപയോഗിക്കുന്നുണ്ടെന്നും എന്നാൽ അതിന്റെ സാമ്പത്തിക ബാധ്യതയും ജീവഹാനിയും അമേരിക്ക മാത്രമാണ് സഹിക്കുന്നതെന്നും അദ്ദേഹം വാദിച്ചു.
ഗൾഫ് മേഖല അമേരിക്കയെ സംബന്ധിച്ചിടത്തോളം എണ്ണ വിതരണത്തിൽ വളരെ കുറഞ്ഞ പ്രാധാന്യം മാത്രമുള്ള ഇടമാണെന്നും, എന്നാൽ ജപ്പാൻ അടക്കമുള്ള രാജ്യങ്ങൾ പൂർണ്ണമായും ഈ മേഖലയെയാണ് ആശ്രയിക്കുന്നതെന്നും ട്രംപ് ഓർമ്മിപ്പിച്ചു. സ്വന്തം രാജ്യത്തെ സംരക്ഷിക്കാൻ ശേഷിയുള്ള രാജ്യങ്ങളിൽ നിന്ന് സൈനിക സംരക്ഷണത്തിന് അമേരിക്ക പണം ഈടാക്കണമെന്ന നിലപാടാണ് അദ്ദേഹം അന്ന് ഉയർത്തിയത്.

ഇറാനെതിരായ കടുത്ത നിലപാട്
ഇറാനോടുള്ള ട്രംപിന്റെ നിലപാട് അന്നും വളരെ കർക്കശമായിരുന്നു. 1988-ൽ ദ ഗാർഡിയന് (The Guardian) നൽകിയ ഒരു അഭിമുഖത്തിൽ അദ്ദേഹം പറഞ്ഞത് ഇപ്രകാരമാണ്: "നമ്മുടെ കപ്പലുകൾക്ക് നേരെയോ സൈനികർക്ക് നേരെയോ ഒരു വെടിയുണ്ടയെങ്കിലും തൊടുത്താൽ, ഞാൻ ഖാർഗ് ഐലൻഡ് (Kharg Island) പിടിച്ചെടുക്കും. ഞാൻ അവിടെ നേരിട്ട് ചെന്ന് അത് കൈവശപ്പെടുത്തും." ഇറാനെതിരേയുള്ള ആക്രമണങ്ങൾ വെറുമൊരു പ്രതികാര നടപടിയല്ല, മറിച്ച് അമേരിക്കയുടെ അധികാരം എവിടെ, എങ്ങനെ ഉപയോഗിക്കണം എന്നതിനെക്കുറിച്ചുള്ള വ്യക്തമായ കാഴ്ചപ്പാടാണെന്ന് ട്രംപ് വിശ്വസിക്കുന്നു.

ALSO READ: 'പരമോന്നത നേതാവാകാന്‍ എന്നോട് ഇറാന്‍ ആവശ്യപ്പെട്ടു, ഞാന്‍ പറഞ്ഞു 'നോ താങ്ക്‌സ്'  ട്രംപിന്റെ പുതിയ അവകാശവാദം

വിദഗ്ധരുടെ നിരീക്ഷണം
80-കളിൽ ട്രംപ് ഉയർത്തിയ ഇതേ വാദങ്ങളാണ് ഇന്നും അദ്ദേഹത്തിന്റെ രാഷ്ട്രീയ നിലപാടുകളുടെ അടിത്തറയെന്ന് രാഷ്ട്രീയ നിരീക്ഷകർ കരുതുന്നു. യൂറോപ്പിലെയും ലോകത്തിന്റെ മറ്റ് ഭാഗങ്ങളിലെയും അമേരിക്കൻ സഖ്യകക്ഷികൾക്ക് ട്രംപ് നൽകുന്ന അടുത്ത മുന്നറിയിപ്പ് യുദ്ധത്തിന്റെ സാമ്പത്തിക ബാധ്യത പങ്കിടുന്നതിനെക്കുറിച്ചായിരിക്കുമെന്നും അവർ വിലയിരുത്തുന്നു. അമേരിക്കയുടെ ശക്തി ലോകത്തിന് ഗുണകരമാകണമെങ്കിൽ അതിന്റെ ചെലവ് സഖ്യകക്ഷികൾ കൂടി വഹിക്കണമെന്ന ട്രംപിന്റെ ചിന്താഗതിയാണ് പുതിയ കാലത്തെ ഈ യുദ്ധമുഖത്തും പ്രതിഫലിക്കുന്നത്.