മലപ്പുറം: തെരഞ്ഞെടുപ്പിന് മുന്നോടിയായി മലപ്പുറം ജില്ലയിൽ നിയന്ത്രണങ്ങൾ ഏർപ്പെടുത്തി കളക്ടർ ഡോ വിനയ് ഗോയൽ ഉത്തരവിറക്കി. മാതൃക തെരഞ്ഞെടുപ്പ് പെരുമാറ്റച്ചട്ടം നിലവിൽ വന്നതിന് പിന്നാലെയാണ് നടപടി. ബിഎൻഎസ്എസ് സെക്ഷൻ 163 പ്രകാരമാണ് നടപടി. 

ജില്ലയിൽ ആയുധം കൈവശം വെയ്ക്കുന്നതിനും, കൊണ്ടുനടക്കുന്നതിനും നിരോധനം ഏർപ്പെടുത്തി. പ്രകടനങ്ങൾക്കും, സർക്കാർ പരസ്യങ്ങൾക്കും വിലക്കേർപ്പെടുത്തി. ഘോഷയാത്രകൾക്കും, ഉച്ചഭാഷിണി ഉപയോഗത്തിനും പ്രത്യേക അനുമതി വാങ്ങണമെന്നും നിർദേശമുണ്ട്. ഉത്തരവ് ലംഘിക്കുന്നവർക്കെതിരെ  നിയമനടപടികൾ സ്വീകരിക്കുമെന്നും കളക്ടർ അറിയിച്ചു. 

നിയന്ത്രണങ്ങൾ

• ആയുധങ്ങൾ കൈവശം വെക്കുന്നതും കൊണ്ടുനടക്കുന്നതും പൂർണ്ണമായി നിരോധിച്ചു.
• തെരഞ്ഞെടുപ്പ് നടപടികൾ പൂർത്തിയാകുന്നതു വരെ തോക്കുകൾ, കുന്തം, വാൾ, ലാത്തികൾ തുടങ്ങിയവ പൊതുസ്ഥലങ്ങളിൽ ഉപയോഗിക്കാൻ പാടില്ല. 
• നിലവിൽ ലൈസൻസുള്ള ആയുധങ്ങൾ കൈവശമുള്ളവർ ജില്ലാ സ്ക്രീനിംഗ് കമ്മിറ്റിക്ക് മുൻപാകെ പരിശോധനയ്ക്ക് ഹാജരാകണം.

ALSO READ: ലെബനനിൽ ഇസ്റാഈൽ വ്യോമാക്രമണം: മൂന്ന് മാധ്യമപ്രവർത്തകർ കൊല്ലപ്പെട്ടു 

• ബാങ്ക് സെക്യൂരിറ്റി ജീവനക്കാർ, നാഷണൽ റൈഫിൾ അസോസിയേഷനിലെ കായിക താരങ്ങൾ, ആചാരപരമായ ആവശ്യങ്ങൾക്കായി ആയുധം ഉപയോഗിക്കുന്ന സമുദായങ്ങൾ എന്നിവർക്ക് ഇളവുണ്ട്. ഇവർ പ്രത്യേക അനുമതി പത്രം വാങ്ങിയിരിക്കണം.
• വീടുകൾക്ക് മുന്നിൽ പ്രകടനങ്ങളോ പിക്കറ്റിംഗോ പാടില്ല.
• കെട്ടിട ഉടമയുടെ മുൻകൂർ അനുമതിയില്ലാതെ മതിലുകളിലോ സ്ഥലങ്ങളിലോ കൊടിതോരണങ്ങളോ പോസ്റ്ററുകളോ സ്ഥാപിക്കാൻ പാടില്ല.
• സർക്കാർ, പൊതു-സ്വകാര്യ ഇടങ്ങളിൽ നിയമവിരുദ്ധമായി സ്ഥാപിച്ചിട്ടുള്ള പ്രചാരണ സാമഗ്രികൾ നീക്കം ചെയ്യണം. 
• ഔദ്യോഗിക വാഹനങ്ങളോ സർക്കാർ താമസസൗകര്യങ്ങളോ രാഷ്ട്രീയ പാർട്ടികളോ സ്ഥാനാർത്ഥികളോ ദുരുപയോഗം ചെയ്യുന്നത് കർശനമായി തടയും.
• പൊതുഖജനാവിൽ നിന്നുള്ള പണം ഉപയോഗിച്ച് സർക്കാർ പരസ്യങ്ങൾ നൽകുന്നതിനും വിലക്കുണ്ട്.
• ഉത്തരവ് ലംഘിക്കുന്നവർക്കെതിരെ ഭാരതീയ ന്യായ സംഹിത സെക്ഷൻ 223 പ്രകാരം നിയമനടപടികൾ സ്വീകരിക്കും.
• യോഗങ്ങളും ഘോഷയാത്രകളും നടത്തുന്നതിന് മുൻപായി രാഷ്ട്രീയ പാർട്ടികൾ പോലീസിനെ അറിയിക്കുകയും ഉച്ചഭാഷിണികൾക്കും മറ്റും ആവശ്യമായ അനുമതി വാങ്ങുകയും വേണം.
• മൈതാനങ്ങളും ഹെലിപാഡുകളും ഉപയോഗിക്കുന്നതിന് 'സുവിധ' മോഡ്യൂൾ വഴി അപേക്ഷിക്കാം. 

Ahead of the elections, restrictions have been imposed in Malappuram district, and an order has been issued by District Collector Dr. Vinay Goyal.