മസ്‌കത്ത്: ഒമാനിലെ സുവൈഖില്‍ മലയാളി യുവാവ് ഹൃദയാഘാതത്തെ തുടര്‍ന്ന് മരിച്ചു. പാലക്കാട് തൃത്താല കുമ്പിടി ഉമ്മത്തൂര്‍ പട്ടിപ്പാറ ഹൗസില്‍ സലാഹുദ്ദീന്‍ (40) ആണ് മരിച്ചത്. 15 വര്‍ഷമായി പ്രവാസജീവിതം നയക്കുന്ന സലാഹുദ്ദീന്‍, സുവൈഖിലെ ഖദറയില്‍ സ്വകാര്യ കമ്പനിയില്‍ അക്കൗണ്ടന്റായി ജോലി ചെയ്തുവരികയായിരുന്നു.
ശനിയാഴ്ച ഉച്ചയ്ക്ക് രണ്ടുമണിയോടെയാണ് സംഭവം. ജോലി കഴിഞ്ഞ് താമസസ്ഥലത്തെത്തിയ സലാഹുദ്ദീന്‍ റൂമിന് പുറത്ത് കുഴഞ്ഞുവീഴുകയായിരുന്നു. ഏറെ നേരം കഴിഞ്ഞ് കൂടെ താമസിക്കുന്നയാള്‍ പുറത്തുവന്നപ്പോഴാണ് ഇദ്ദേഹത്തെ വീണുകിടക്കുന്ന നിലയില്‍ കണ്ടത്. ഉടന്‍ തന്നെ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. കഴിഞ്ഞ നവംബറിലാണ് അവധി കഴിഞ്ഞ് സലാഹുദ്ദീന്‍ ഒമാനിലേക്ക് തിരിച്ചെത്തിയത്.
പിതാവ്: പരേതനായ കമ്മു മുസ്‌ലിയാര്‍. മാതാവ്: ആയിശ. ഭാര്യ: അംറത്ത് റിസ്‌വാന. മക്കള്‍: ഫൈഹ (ആറ്), ഫര്‍ഹ (നാല്), ഫൈറ (ആറുമാസം). ഖദറയില്‍ തന്നെ ജോലി ചെയ്യുന്ന സഹോദരന്‍ മുഹമ്മദ് മുസ്തഫയുടെ നേതൃത്വത്തില്‍ മരണാനന്തര നടപടിക്രമങ്ങള്‍ പുരോഗമിക്കുകയാണ്. ഞായറാഴ്ച രാത്രിയോടെ മൃതദേഹം നാട്ടിലേക്ക് കൊണ്ടുപോകുമെന്ന് ബന്ധുക്കള്‍ അറിയിച്ചു.

English Summary: A 40-year-old Malayali exptariate died of a heart attack in Suwaiq, Oman. The deceased, identified as Salahudeen from Kumbidi, Palakkad ditsrict, had been working as an accountant at a private company in Khadhra. The incident occurred on Saturday around 2:00 PM. Salahudeen collapsed outside his room after returning from work. He was later found by his roommate and rushed to the hospital, but was declared dead on arrival. An expat for 15 years, he had recently returned to Oman in November after a vacation. He is survived by his wife and three young children, the youngest being just six months old.