വയനാട്: മുണ്ടക്കൈചൂരല്‍മല ഉരുള്‍പൊട്ടല്‍ ദുരന്തബാധിതര്‍ക്കായി കോണ്‍ഗ്രസ് പ്രഖ്യാപിച്ച ഭവനപദ്ധതി വൈകുന്നതായി ആക്ഷേപം. കുന്നമ്പറ്റയില്‍ വീടുകള്‍ക്കായി തറക്കല്ലിട്ട് ഒരു മാസം പിന്നിട്ടിട്ടും നിര്‍മാണ പ്രവര്‍ത്തനങ്ങള്‍ തുടങ്ങിയിട്ടില്ല. പദ്ധതിയുടെ പണി ആരംഭിച്ചെന്ന പ്രതിപക്ഷ നേതാവ് വി.ഡി സതീശന്റെ വാദങ്ങള്‍ ഇതോടെ ചോദ്യം ചെയ്യപ്പെടുകയാണ്.

കഴിഞ്ഞ ഫെബ്രുവരി 26ന് രാഹുല്‍ ഗാന്ധിയും പ്രിയങ്ക ഗാന്ധിയും ചേര്‍ന്നാണ് പദ്ധതിക്ക് തറക്കല്ലിട്ടത്. ആറ് മാസത്തിനുള്ളില്‍ നൂറ് വീടുകള്‍ പൂര്‍ത്തിയാക്കുമെന്നായിരുന്നു വാഗ്ദാനമെങ്കിലും നിലവില്‍ കുന്നമ്പറ്റയിലെ ഭൂമിയില്‍ യാതൊരു പ്രവൃത്തിയും നടക്കുന്നില്ല. നിര്‍മ്മാണത്തിനാവശ്യമായ അനുമതി തേടി ആരും ഇതുവരെ മേപ്പാടി പഞ്ചായത്തിനെ സമീപിച്ചിട്ടില്ലെന്നും റിപോര്‍ട്ടുകള്‍ സൂചിപ്പിക്കുന്നു. ആദ്യഘട്ടത്തില്‍ എട്ട് സെന്റ് ഭൂമിയില്‍ മൂന്ന് കിടപ്പുമുറികളുള്ള 50 വീടുകളാണ് വിഭാവനം ചെയ്തിരിക്കുന്നത്.

ഭൂമി നിരപ്പാക്കിയതൊഴിച്ചാല്‍ മറ്റു നീക്കങ്ങളൊന്നും നടക്കാത്ത പ്ലോട്ടില്‍ ഇപ്പോള്‍ കാട്ടാനശല്യം രൂക്ഷമാണെന്നും നാട്ടുകാര്‍ പറയുന്നു. ടൂറിസം സാധ്യതകള്‍ കൂടി കണക്കിലെടുത്ത് പ്രത്യേക രൂപകല്‍പ്പനയോടെ തയ്യാറാക്കിയ വീടുകളുടെ നിര്‍മ്മാണം എന്ന് തുടങ്ങുമെന്ന കാര്യത്തില്‍ അനിശ്ചിതത്വം തുടരുകയാണ്.

Construction of the Congress party's promised housing project for Wayanad landslide survivors at Kunnampetta is yet to begin, contradicting Opposition Leader V.D. Satheesan's claims and raising concerns over delays in rehabilitation.