വാഷിങ്ടണ്‍: അമേരിക്കന്‍ പ്രസിഡന്റ് ഡൊണാള്‍ഡ് ട്രംപിനെതിരെ  യു.എസിലുടനീളം 'നോ കിങ്‌സ്' റാലി. രാജ്യവ്യാപകമായി നടന്ന ജനകീയ പ്രക്ഷോഭത്തില്‍ ദശലക്ഷക്കണക്കിന് ആളുകളാണ് പങ്കെടുത്തത്. 

ഭരണകൂടത്തോടുള്ള ജനങ്ങളുടെ ശക്തമായ അമര്‍ഷം വെളിപ്പെടുത്തുന്നതായിരുന്നു രാജ്യത്തെ മൂവായിരത്തോളം കേന്ദ്രങ്ങളിലായി നടന്ന പ്രതിഷേധ പരിപാടികള്‍. 

ഇറാനെതിരായ ഏകപക്ഷീയ ആക്രമണത്തിലൂടെ തുടക്കമിട്ട യുദ്ധം മുതല്‍ ഫെഡറല്‍ ഇമിഗ്രേഷന്‍ എന്‍ഫോഴ്സ്മെന്റ്, വര്‍ദ്ധിച്ചുവരുന്ന ജീവിതച്ചെലവ് എന്നിവയുള്‍പ്പെടെ യു.എസ്ട്രംപ് അടിച്ചേല്‍പ്പിച്ച നയങ്ങള്‍ക്കെതിരെയാണ് തങ്ങള്‍ പ്രതിഷേധിക്കുന്നതെന്ന് സംഘാടകര്‍ പ്രതികരിച്ചു. 

ALSO READ: ഒരു മാസം പിന്നിട്ട് ഇറാൻ യുദ്ധം; ആക്രമണത്തിന് പുതിയ തലം, ഹൂതികളും രംഗത്ത്; അടുത്തയാഴ്ച വെടിനിർത്തിയേക്കുമെന്ന് യു.എസ്

'ഒരു സ്വേച്ഛാധിപതിയായി നമ്മെ ഭരിക്കാനാണ് ട്രംപ് ആഗ്രഹിക്കുന്നത്. എന്നാല്‍ ഇത് അമേരിക്കയാണ്, അധികാരം ജനങ്ങളുടേതാണ്. രാജാക്കന്മാരാകാനോ അവരുടെ ശതകോടീശ്വരന്‍ കൂട്ടാളികളുടേതോ അല്ല,' സംഘാടകര്‍ പറഞ്ഞു.

 ഫ്രാന്‍സ്, പോര്‍ച്ചുഗല്‍, ജര്‍മനി, ഇറ്റലി, ഗ്രീസ് തുടങ്ങിയ രാജ്യങ്ങളിലും പ്രതിഷേധം നടന്നു. അവിടങ്ങളില്‍ താമസിക്കുന്ന അമേരിക്കക്കാരാണ് പ്രതിഷേധ റാലികള്‍ സംഘടിപ്പിച്ചത്.

മിനസോട്ടയിലെ റാലിയില്‍ മാത്രം അമ്പതിനായിരത്തിലധികം ആളുകള്‍ തെരുവിലിറങ്ങി. പ്രശസ്ത അമേരിക്കന്‍ റോക്ക് ഗായകന്‍ ബ്രൂസ് സ്പ്രിംഗ്സ്റ്റീനും റാലിയില്‍ പങ്കെടുത്ത് ഗാനങ്ങള്‍ ആലപിച്ചു. തടിച്ചുകൂടിയ ആയിരങ്ങളെ അഭിസംബോധന ചെയ്ത അദ്ദേഹം, തന്റെ സംഗീതത്തിലൂടെ പ്രതിഷേധത്തിന് ഐക്യദാര്‍ഢ്യം പ്രഖ്യാപിക്കുകയായിരുന്നു. 

ഇമിഗ്രേഷന്‍ ആന്‍ഡ് കസ്റ്റംസ് എന്‍ഫോഴ്‌സ്‌മെന്റ് (ICE) രാജ്യവ്യാപകമായി നടത്തുന്ന ക്രൂരമായ റെയ്ഡുകള്‍ക്കും കൂട്ട നാടുകടത്തലുകള്‍ക്കുമെതിരെ രാജ്യത്ത് രോഷം ഇരമ്പുകയാണ്. കുടിയേറ്റ വിരുദ്ധ നയങ്ങളും ICE റെയ്ഡുകളും രാജ്യത്ത് വലിയ രീതിയിലുള്ള മനുഷ്യാവകാശ ചോദ്യങ്ങള്‍ ഉയര്‍ത്തുന്നുണ്ടെന്ന് സംഘാടകര്‍ ചൂണ്ടിക്കാട്ടുന്നു. 

ALSO READ: ഇസ്‌റാഈലിന് നേരെ വീണ്ടും ഹൂതി  മിസൈല്‍ ആക്രമണം; യു.എസ്, ഇസ്‌റാഈല്‍ സര്‍വ്വകലാശാലകള്‍ ലക്ഷ്യമിടുമെന്ന് ഇറാന്റെ താക്കീത്

ജനുവരിയില്‍ മിനസോട്ടയില്‍ നടന്ന പ്രതിഷേധത്തിനിടെ ഫെഡറല്‍ ഏജന്റുമാരുടെ വെടിയേറ്റ് രണ്ട് അമേരിക്കന്‍ പൗരന്മാര്‍ കൊല്ലപ്പെട്ട സംഭവം ജനരോഷം ആളിക്കത്തിച്ചിരുന്നു.പ്രാദേശിക തലം മുതല്‍ വന്‍ നഗരങ്ങളില്‍ വരെ ഒരേസമയം ആഞ്ഞടിച്ച ഈ പ്രക്ഷോഭം ട്രംപ് ഭരണകൂടത്തിന് വലിയ രാഷ്ട്രീയ വെല്ലുവിളിയാണ് ഉയര്‍ത്തുന്നത്. വരും ദിവസങ്ങളിലും അമേരിക്കന്‍ തെരുവുകളില്‍ ഭരണകൂട വിരുദ്ധ പ്രതിഷേധങ്ങള്‍ കൂടുതല്‍ ശക്തമാകാനാണ് സാധ്യതയെന്ന് റിപ്പോര്‍ട്ടുകള്‍ സൂചിപ്പിക്കുന്നു.

millions join no kings protests across the us opposing donald trump policies including immigration raids war actions and rising living costs with global support rallies