തിരുവനന്തപുരം: ലൈംഗികാതിക്രമ കേസില്‍ റിമാന്‍ഡിലായ സംവിധായകന്‍ രഞ്ജിത്തിനെ ഫെഫ്കയില്‍ നിന്ന് പുറത്താക്കി. ഫെഫ്ക ഡയറക്ടേഴ്‌സ് യൂണിയനില്‍ നിന്നും ഫെഫ്ക റൈറ്റേഴ്‌സ് യൂണിയനില്‍ നിന്നുമാണ്  സസ്‌പെന്‍ഡ് ചെയ്തിരിക്കുന്നത്. 

ഫെഫ്ക ഡയറക്ടേഴ്‌സ് യൂണിയന്‍ പ്രാഥമിക അംഗത്വത്തില്‍ നിന്ന് രഞ്ജിത്തിന് സസ്‌പെന്‍ഡ് ചെയ്തതായി പ്രസിഡന്റ് രഞ്ജി പണിക്കര്‍, ജനറല്‍ സെക്രട്ടറി ജി.എസ് വിജയന്‍ എന്നിവര്‍ പ്രസ്താവനയിലൂടെ അറിയിച്ചു.

ഇന്നലെ രാത്രിയോടെയാണ് നാടകീയ നീക്കങ്ങള്‍ക്കൊടുവില്‍ രഞ്ജിത്ത് പൊലിസിന്റെ പിടിയിലായത്. മുന്‍കൂര്‍ ജാമ്യാപേക്ഷ നല്‍കാനുള്ള നീക്കങ്ങള്‍ക്കിടെയാണ് പൊലിസ് രഞ്ജിത്തിനെ പിടികൂടുന്നത്. പൊലിസ് നടപടി ഉണ്ടാകുമെന്ന് മുന്‍കൂട്ടി കണ്ട രഞ്ജിത്തിനോട് ഒളിവില്‍ പോകാന്‍ അഭിഭാഷകര്‍ നിര്‍ദ്ദേശിച്ചിരുന്നു. സ്വന്തം വാഹനം ഉപേക്ഷിച്ചു സഹപ്രവര്‍ത്തകന്റെ കാറില്‍ രക്ഷപ്പെടാന്‍ ശ്രമിക്കുന്നതിനിടെയാണ് പൊലിസ് സംഘം രഞ്ജിത്തിനെ തടഞ്ഞത്. അറസ്റ്റ് നടപടികള്‍ക്ക് പിന്നാലെ ശാരീരിക അസ്വസ്ഥതകള്‍ പ്രകടിപ്പിച്ച ഇദ്ദേഹത്തെ ജനറല്‍ ആശുപത്രിയില്‍ പ്രവേശിപ്പിച്ചിരുന്നു. ആരോഗ്യനില തൃപ്തികരമാണെന്ന് കണ്ടതിനെ തുടര്‍ന്നാണ് കോടതിയില്‍ ഹാജരാക്കിയത്

സിനിമയിലെ കാരവാനില്‍ വെച്ച് പീഡിപ്പിക്കാന്‍ ശ്രമിച്ചു എന്നാണ് യുവനടിയുടെ പരാതി. സിനിമയില്‍ പ്രധാന വേഷം വാഗ്ദാനം ചെയ്ത് വിളിച്ചുവരുത്തിയ ശേഷം ലൈംഗികമായി ഉപദ്രവിച്ചു എന്നാണ് ആക്ഷേപം. പരാതിയില്‍ കഴമ്പുണ്ടോ എന്ന് വ്യക്തമായി പരിശോധിച്ച ശേഷമാണ് പൊലിസ് അറസ്റ്റിലേക്ക് കടന്നത്.

ALSO READ: വീണ്ടും വിവാദ നീക്കവുമായി ബി ഗോപാലകൃഷ്ണന്‍; ഗുരുവായൂരിലെ മുസ്‌ലിം എം.എല്‍.എമാരുടെ പേരുകള്‍ പ്രദര്‍ശിപ്പിച്ച് ഫ്‌ളക്‌സ്

നടിയുടെ റോളും ഷൂട്ടിംഗും സംബന്ധിച്ച വിവരങ്ങള്‍ പൊലിസ് ശേഖരിച്ചു.സിനിമയിലെ പ്രധാന വേഷമാണ് നടിക്ക് നല്‍കിയിരുന്നതെന്നും ഷൂട്ടിംഗ് ഏകദേശം പൂര്‍ത്തിയായിരുന്നതായും വ്യക്തമായി.അതിനാല്‍ വ്യാജ പരാതിക്കുള്ള സാധ്യതയില്ലെന്ന് വിലയിരുത്തിയ പൊലിസ്, അന്നേദിവസം സെറ്റിലുണ്ടായിരുന്നവരില്‍ നിന്നും മൊഴിയെടുത്തു.

രഞ്ജിത്തിനെതിരെ ഉയരുന്ന മൂന്നാമത്തെ പീഡന പരാതിയാണിത്. മുന്‍പ് രണ്ട് കേസുകളിലും നിയമനടപടികള്‍ നേരിട്ടിരുന്നെങ്കിലും സാങ്കേതിക കാരണങ്ങളാല്‍ രക്ഷപ്പെടുകയായിരുന്നു.

ബംഗാളി നടിയുടെ പരാതി (2024): 'പാലേരി മാണിക്യം' സിനിമയുടെ സെറ്റില്‍ വെച്ച് പീഡിപ്പിക്കാന്‍ ശ്രമിച്ചു എന്നതായിരുന്നു പരാതി. എന്നാല്‍ കാലതാമസം ചൂണ്ടിക്കാട്ടി 2025 ഒക്ടോബറില്‍ ഹൈക്കോടതി ഈ കേസ് റദ്ദാക്കി.

യുവാവിന്റെ പരാതി (2012): ബെംഗളൂരുവിലെ ഹോട്ടലില്‍ വെച്ച് പീഡിപ്പിച്ചുവെന്ന കോഴിക്കോട് സ്വദേശിയായ യുവാവിന്റെ പരാതിയില്‍ പൊലിസ് കേസെടുത്തിരുന്നു. എന്നാല്‍ 12 വര്‍ഷത്തെ കാലതാമസം ചൂണ്ടിക്കാട്ടി കര്‍ണാടക ഹൈക്കോടതി ഈ കേസിലെ നടപടികളും 2025 ജൂലൈയില്‍ റദ്ദാക്കിയിരുന്നു.

നിലവിലെ കേസില്‍ ജാമ്യാപേക്ഷ സമര്‍പ്പിക്കുമെന്ന് രഞ്ജിത്തിന്റെ അഭിഭാഷകന്‍ അറിയിച്ചു. ഹേമ കമ്മിറ്റി റിപ്പോര്‍ട്ടിന് പിന്നാലെ സിനിമാ മേഖലയില്‍ ഉയര്‍ന്ന ലൈംഗിക ആരോപണങ്ങളില്‍ ഏറ്റവും പ്രമുഖനായ വ്യക്തിയുടെ അറസ്റ്റാണ് ഇപ്പോള്‍ നടന്നിരിക്കുന്നത്.

In a major development in a sexual harassment case, filmmaker Ranjith has been expelled from FEFKA (Film Employees Federation of Kerala). The decision was taken following allegations against him, reflecting the organization’s stance on maintaining discipline and accountability within the industry.