തെഹ്‌റാൻ: അമേരിക്കൻ പ്രസിഡന്റ് ഡൊണാൾഡ് ട്രംപിന്റെ സമ്മർദ്ദ തന്ത്രങ്ങൾക്ക് വഴങ്ങി ഹോർമുസ് കടലിടുക്ക് തുറന്നുകൊടുക്കില്ലെന്ന് ഇറാൻ റെവല്യൂഷണറി ഗാർഡ് കോർപ്സ് (IRGC). മേഖലയിലെ സ്ഥിതിഗതികൾ തങ്ങളുടെ പൂർണ്ണമായ ആധിപത്യത്തിലാണെന്നും ശത്രുക്കൾക്ക് മുന്നിൽ മുട്ടുമടക്കില്ലെന്നും ഇറാൻ വ്യക്തമാക്കി.

ALSO READ: ജനപിന്തുണ നഷ്ടപ്പെട്ട ട്രംപ് രാഷ്ട്രീയ അതിജീവനത്തിന് പുതിയ തന്ത്രങ്ങൾ മെനയുന്നു; രാജ്യത്തെ ഉടൻ അഭിസംബോധന ചെയ്യും

ഇറാൻ വെടിനിർത്തലിനായി തന്നെ സമീപിച്ചുവെന്ന ട്രംപിന്റെ അവകാശവാദത്തിന് പിന്നാലെയാണ് ഇറാന്റെ ശക്തമായ പ്രതികരണം വന്നത്. ഹോർമുസ് കടലിടുക്കിലൂടെയുള്ള ഗതാഗതം തടസ്സമില്ലാതെ പുനഃസ്ഥാപിച്ചാൽ മാത്രമേ വെടിനിർത്തൽ ആലോചിക്കൂ എന്നായിരുന്നു ട്രംപ് സോഷ്യൽ മീഡിയയിൽ കുറിച്ചത്. "അതുവരെ ഇറാനെ ഞങ്ങൾ വിസ്മൃതിയിലേക്ക് തള്ളിവിടും," എന്നായിരുന്നു ട്രംപിന്റെ ഭീഷണി കലർന്ന പ്രസ്താവന.

ALSO READ: നൂറിലധികം മിസൈലുകളും ഡ്രോണുകളും; ഇസ്റാഈലിലും യുഎസ് സൈനിക താവളങ്ങൾക്കും നേരെ സംയുക്ത ആക്രമണവുമായി ഇറാനും സഖ്യകക്ഷികളും

എന്നാൽ ട്രംപിന്റേത് വെറും 'പരിഹാസ്യമായ പ്രകടനങ്ങൾ' മാത്രമാണെന്ന് IRGC പരിഹസിച്ചു. കടലിടുക്കിന്റെ നിയന്ത്രണം തങ്ങളുടെ കൈവശം ദൃഢമാണെന്നും അത് ആർക്കും വിട്ടുകൊടുക്കില്ലെന്നും ഇറാൻ ആവർത്തിച്ചു.

നാറ്റോയും അമേരിക്കയും തമ്മിലുള്ള ഭിന്നത

അതേസമയം, ഹോർമുസ് വിഷയത്തിൽ അമേരിക്കയെ പിന്തുണയ്ക്കാൻ നാറ്റോ സഖ്യകക്ഷികൾ തയ്യാറാകാത്തത് വലിയ രാഷ്ട്രീയ ചർച്ചകൾക്ക് വഴിവെച്ചിരിക്കുകയാണ്. കടലിടുക്കിലെ സൈനിക നടപടികളിൽ പങ്കാളികളാകാത്ത നാറ്റോ രാജ്യങ്ങളെ 'ഭീരുക്കൾ' എന്നാണ് ട്രംപ് വിശേഷിപ്പിച്ചത്. അമേരിക്കയെ നാറ്റോയിൽ നിന്ന് പിൻവലിക്കുന്നതിനെക്കുറിച്ച് ആലോചിക്കുന്നതായി 'ദി ടെലിഗ്രാഫ്' പത്രത്തിന് നൽകിയ അഭിമുഖത്തിൽ അദ്ദേഹം സൂചിപ്പിച്ചു.

നാറ്റോയുടെ പരിധിയിൽ വരുന്ന വിഷയമല്ല ഹോർമുസിലേതെന്ന് ഫ്രഞ്ച് ജൂനിയർ ആർമി മന്ത്രി ആലീസ് റൂഫോ വ്യക്തമാക്കി. നാറ്റോ എന്നത് യൂറോ-അറ്റ്ലാന്റിക് മേഖലയുടെ സുരക്ഷയ്ക്കായുള്ള സഖ്യമാണ്. ഹോർമുസ് കടലിടുക്കിൽ സൈനിക നടപടി നടത്തുന്നത് അന്താരാഷ്ട്ര നിയമങ്ങളുടെ ലംഘനമാകും. മേഖലയിൽ യുദ്ധസമാനമായ സാഹചര്യം നിലനിൽക്കുമ്പോഴും ലോകരാജ്യങ്ങൾക്കിടയിലുള്ള ഈ അഭിപ്രായ ഭിന്നത സ്ഥിതിഗതികൾ കൂടുതൽ സങ്കീർണ്ണമാക്കുകയാണ്.

Iran's Revolutionary Guard (IRGC) has rejected U.S. President Donald Trump's demands to open the Strait of Hormuz, calling his actions "ridiculous performances." While Trump claimed Iran requested a ceasefire offering to consider it only if the strait is cleared—Iran maintained that the vital waterway remains firmly under its "dominant control."