അബുദാബി: ആരോഗ്യ കേന്ദ്രങ്ങള്‍, എമര്‍ജന്‍സി മെഡിക്കല്‍ സര്‍വീസുകള്‍, സുരക്ഷാ വിഭാഗങ്ങള്‍, മറ്റ് നിര്‍ണായക മേഖലകള്‍ എന്നിവയിലുള്‍പ്പെടുന്ന 20,000 മുന്നണിപ്പോരാളികള്‍ക്ക് പരിശീലനം നല്‍കാനുള്ള തന്ത്രപരമായ പദ്ധതി അബൂദബി സര്‍ക്കാര്‍ പ്രഖ്യാപിച്ചു. അംഗീകൃതവും സംയോജിതവുമായ ഏകീകൃത സംവിധാനത്തിലൂടെയായിരിക്കും ഈ പ്രോഗ്രാം നടപ്പാക്കുക. 
യു.എ.ഇ നാഷണല്‍ പ്രോഗ്രാം ഫോര്‍ പ്രിപ്പയേര്‍ഡ്‌നെസ് ആന്‍ഡ് റെസ്‌പോണ്‍സ് ആയ 'ജാഹെസിയ' (Jahezia) അബുദാബിയില്‍ സംഘടിപ്പിച്ച ദേശീയ അടിയന്തര പ്രതികരണ ഫോറമായ 'ഇസ്തിജാബ'യുടെ ഉദ്ഘാടന വേളയിലാണ്  പ്രഖ്യാപനം നടത്തിയത്. രാജ്യത്തെ മുന്നണിപ്പോരാളികളുടെ കാര്യക്ഷമത വര്‍ധിപ്പിക്കുന്നതിനുള്ള ദേശീയ സംരംഭത്തിന്റെ തുടക്കം കൂടിയാണിത്.

വിവിധ എമിറേറ്റുകളിലായി ഒരാഴ്ച നീണ്ടുനില്‍ക്കുന്നതാണ് ഈ ഫോറം. നാളെ അജ്മാനിലും ബുധനാഴ്ച ഫുജൈറയിലും നടക്കുന്ന സെഷനുകള്‍ക്ക് ശേഷം ഞായറാഴ്ച ദുബൈയില്‍ ഫോറം സമാപിക്കും. സ്ഥാപനങ്ങള്‍ തമ്മിലുള്ള ഏകോപനം ശക്തമാക്കാനും, ആഗോള മാനദണ്ഡങ്ങള്‍ക്കനുസരിച്ച് രാജ്യത്തിന്റെ അടിയന്തര പ്രതികരണ സംവിധാനങ്ങളുടെ കാര്യക്ഷമത ഉയര്‍ത്താനുമാണ് ഇതിലൂടെ ലക്ഷ്യമിടുന്നത്.

സമഗ്രമായ പരിശീലന പദ്ധതി

തിയറിയും പ്രായോഗിക പരിശീലനവും സമന്വയിപ്പിച്ചുള്ളതാണ് പ്രോഗ്രാം. സിമുലേഷന്‍ എക്‌സര്‍സൈസുകളും ഇതില്‍ ഉള്‍പ്പെടുന്നു. പരിശീലനത്തിന്റെ തുടര്‍ച്ച ഉറപ്പാക്കാന്‍ പ്രതിവര്‍ഷം 100 ദശലക്ഷം ദിര്‍ഹമാണ് പദ്ധതിക്കായി വകയിരുത്തിയിരിക്കുന്നത്. മികച്ച പരിശീലകരെ വാര്‍ത്തെടുക്കുന്നതിനും ഇതിലൂടെ സാധിക്കും. അമേരിക്കയിലെയും യൂറോപ്പിലെയും പത്തിലധികം പ്രമുഖ സര്‍വകലാശാലകളുടെയും പരിശീലന കേന്ദ്രങ്ങളുടെയും പൂര്‍ണ്ണ അംഗീകാരത്തോടെയാണ് പദ്ധതി നടപ്പിലാക്കുന്നത്. 

അടിയന്തര തയ്യാറെടുപ്പുകള്‍ക്ക് ആഗോള പ്രശംസ

ദേശീയ, അന്തര്‍ദേശീയ അനുഭവങ്ങള്‍ പങ്കുവെക്കുന്ന പാനല്‍ ചര്‍ച്ചകളും ശില്‍പശാലകളും ഫോറത്തിന്റെ ഭാഗമായി നടക്കും. അടിയന്തര സാഹചര്യങ്ങളെ നേരിടുന്നതിലെ യു.എ.ഇയുടെ മികവിനെയും സ്ഥാപനങ്ങള്‍ തമ്മിലുള്ള ഏകോപനത്തെയും യൂറോപ്യന്‍ സെന്റര്‍ ഫോര്‍ ഡിസാസ്റ്റര്‍ മെഡിസിന്‍ പ്രസിഡന്റ് പ്രൊഫസര്‍ റോബര്‍ട്ടോ മുഗാവെറോ പ്രശംസിച്ചു. 
അടിയന്തര സാഹചര്യങ്ങളില്‍ പിന്തുണ നല്‍കുന്ന വിവിധ സ്ഥാപനങ്ങളും പരിശീലന കേന്ദ്രങ്ങളും തമ്മിലുള്ള സഹകരണം മെച്ചപ്പെടുത്തുന്നതിനുള്ള മികച്ച വേദിയാണ് ഈ ഫോറമെന്ന് സായിദ് ഗിവിങ് ഇനീഷ്യേറ്റീവ് സി.ഇ.ഒയും 'ജാഹെസിയ' ഡയറക്ടറുമായ ഡോ. ആദില്‍ അല്‍ ഷംരി വ്യക്തമാക്കി. 

Summary: The Government of Abu Dhabi has announced the launch of a strategic plan to train 20,000 frontline personnel, including both healthcare and non-healthcare workers across healthcare facilities, emergency medical services, security entities, and other critical sectors involved in responding to major incidents and emergencies. The program will be delivered through a unified, integrated, and accredited framework.