കൊല്ലം: കൈകൊട്ടിക്കളി ടീമില്‍ അംഗമായ പ്രായപൂര്‍ത്തിയാകാത്ത ദളിത് പെണ്‍കുട്ടിയെ കോര്‍ഡിനേറ്ററുടെ മകന്‍ പീഡിപ്പിച്ചെന്ന പരാതിയില്‍ കേസെടുത്ത് പൊലിസ്. മണിയാര്‍ എരിച്ചിക്കല്‍ സ്വദേശി ചിക്കുരാജ് (31), ഇയാളുടെ അമ്മ മിനി എന്നിവര്‍ക്കെതിരെയാണ് പുനലൂര്‍ പൊലിസ് കേസ് രജിസ്റ്റര്‍ ചെയ്തത്. പീഡന വിവരം പുറത്ത് പറയരുതെന്ന് പെണ്‍കുട്ടിയെ ഭീഷണിപ്പെടുത്തിയതിനാണ് പ്രതിയുടെ അമ്മക്കെതിരെ കേസെടുത്തത്. 

പോക്‌സോ, ബാലവാകാശ നിയമം, പട്ടിക വിഭാഗങ്ങള്‍ക്കെതിരായ അതിക്രമം തുടങ്ങി ഗുരുതര വകുപ്പുകളാണ് പ്രതികള്‍ക്കെതിരെ ചുമത്തിയിട്ടുള്ളത്. മിനിയെ അറസ്റ്റ് ചെയ്ത് കോടതിയില്‍ ഹാജരാക്കി റിമാന്റ് ചെയ്തു. ഒന്നാം പ്രതി ചിക്കുരാജ് ഒളിവിലാണ്. ഇയാള്‍ക്കായി അന്വേഷണം ഊര്‍ജിതമാക്കിയതായി പൊലിസ് അറിയിച്ചു. 

ALSO READ: പൊലിസിന്റെയും പ്രോസിക്യൂഷന്റെയും ദയനീയ വീഴ്ച; ചാലിയാർ പുഴയിൽ ജീവനൊടുക്കിയ പെൺകുട്ടിക്ക് നീതി ലഭിച്ചില്ല; മലപ്പുറം പോക്സോ കേസിൽ കരാട്ടെ പരിശീലകനെ കോടതി വെറുതെ വിട്ടു 

2025 നവംബറിലായിരുന്നു കേസിനാസ്പദമായ സംഭവം. കൈകൊട്ടിക്കളി സംഘത്തില്‍ അംഗമായ കുട്ടിയെ ട്രൂപ്പിന്റെ കോര്‍ഡിനേറ്ററായ മിനിയുടെ മകന്‍ പുനലൂരിലെ വീട്ടിലെത്തിച്ച് ലൈംഗികമായി പീഡിപ്പിച്ചെന്നാണ് പരാതി. 

വിവരമറിഞ്ഞ് പ്രതിയുടെ അമ്മയും കേസിലെ രണ്ടാം പ്രതിയുമായ മിനി പെണ്‍കുട്ടിയുടെ വീട്ടിലെത്തി മാതാപിതാക്കളെ ഭീഷണിപ്പെടുത്തിയെന്നാണ് പരാതി. കുട്ടിയുടെ പെരുമാറ്റത്തില്‍ അസ്വാഭാവികത തോന്നിയ സ്‌കൂള്‍ അധികൃതര്‍ വഴി നടത്തിയ കൗണ്‍സിലിങ്ങിലാണ് പീഡന വിവരം പുറത്തറിയുന്നത്. പിന്നാലെ പുനലൂര്‍ പൊലിസ് കുട്ടിയുടെ മൊഴി രേഖപ്പെടുത്തുകയും, പ്രതികള്‍ക്കെതിരെ എഫ്.ഐ.ആര്‍ രജിസ്റ്റര്‍ ചെയ്യുകയും ചെയ്തു.

Police have registered a case following a complaint that a minor Dalit girl was sexually assaulted in kollam