കുവൈത്ത് സിറ്റി: ആഗോള വിതരണ ശൃംഖലയിലെ തടസ്സങ്ങൾ മൂലമുണ്ടാകുന്ന വിലക്കയറ്റത്തിൽ നിന്ന് ഉപഭോക്താക്കളെ സംരക്ഷിക്കാൻ നിർണ്ണായക നീക്കവുമായി കുവൈത്ത് വാണിജ്യ വ്യവസായ മന്ത്രാലയം. അടിസ്ഥാന ഭക്ഷ്യവസ്തുക്കൾക്ക് സബ്‌സിഡി നൽകിക്കൊണ്ട് വിപണിയിൽ വില സ്ഥിരത ഉറപ്പാക്കുമെന്ന് മന്ത്രാലയം ആക്ടിംഗ് അണ്ടർസെക്രട്ടറി മർവ അൽ-ജൈദാൻ അറിയിച്ചു. ഇറക്കുമതിക്കാർക്ക് അധികമായി വരുന്ന ചെലവുകൾ വഹിക്കാൻ സബ്‌സിഡി സഹായിക്കുന്നതിലൂടെ വിപണിയിൽ സാധനങ്ങളുടെ തടസ്സമില്ലാത്ത ലഭ്യത ഉറപ്പാക്കാൻ സാധിക്കും.

ജൂൺ 30 വരെ പ്രത്യേക പരിരക്ഷ

പുതിയ സബ്‌സിഡി തീരുമാനം നിലവിൽ വന്ന തീയതി മുതൽ ജൂൺ 30 വരെ പ്രാബല്യത്തിലുണ്ടാകും. സാഹചര്യങ്ങൾ വിലയിരുത്തിയ ശേഷം ആവശ്യമെങ്കിൽ കാലാവധി നീട്ടാൻ മന്ത്രാലയത്തിന് അധികാരമുണ്ട്. ഭക്ഷ്യസുരക്ഷ വർദ്ധിപ്പിക്കുന്നതിനും പ്രാദേശിക വിപണിയിലെ അനാവശ്യമായ വിലവർദ്ധനവ് തടയുന്നതിനുമുള്ള മന്ത്രാലയത്തിന്റെ നിരന്തരമായ ശ്രമങ്ങളുടെ ഭാഗമായാണ് ഈ നടപടി.

ALSO READ: സുരക്ഷ ശക്തമാക്കി കുവൈത്ത് ആഭ്യന്തര മന്ത്രാലയം; ആറ് ഗവർണറേറ്റുകളിലായി 600 പട്രോളിംഗ് സംഘങ്ങളെ വിന്യസിച്ചു

സബ്‌സിഡി ലഭിക്കുന്ന ഉൽപ്പന്നങ്ങൾ

പ്രാദേശികമായി ഉൽപ്പാദിപ്പിക്കുന്ന പാൽ, മുട്ട തുടങ്ങിയ ഉൽപ്പന്നങ്ങൾ നിലവിൽ ഫീഡ് സപ്പോർ‍ട്ടിം​ഗ് പരിപാടികളുടെ (Feed support programs) ആനുകൂല്യം ലഭിക്കുന്നുണ്ട്. ഇതിന് പുറമെ, ആഗോള വിതരണ തടസ്സങ്ങൾ മൂലം വില വർദ്ധിക്കാൻ സാധ്യതയുള്ള മാംസം ഉൾപ്പെടെയുള്ള മറ്റ് ഉൽപ്പന്നങ്ങളെയും സബ്‌സിഡി പട്ടികയിൽ ഉൾപ്പെടുത്താൻ മന്ത്രാലയം തീരുമാനിച്ചിട്ടുണ്ട്. വിപണിയിലെ ആവശ്യകത അനുസരിച്ച് പട്ടികയിൽ മാറ്റങ്ങൾ വരുത്തും.

നിയമം ലംഘിച്ചാൽ കർശന നടപടി

വിപണിയിലെ വിലനിലവാരവും സാധനങ്ങളുടെ ലഭ്യതയും നിരീക്ഷിക്കുന്നതിനായി മന്ത്രാലയം ഫീൽഡ് പരിശോധനകൾ ശക്തമാക്കിയിട്ടുണ്ട്. സബ്‌സിഡി ആനുകൂല്യം കൈപ്പറ്റുന്ന കമ്പനികൾ നിബന്ധനകൾ പാലിക്കുന്നുണ്ടെന്ന് ഉറപ്പാക്കാൻ പ്രത്യേക പരിശോധനാ സംഘങ്ങളെ വിന്യസിച്ചു. നിയന്ത്രണങ്ങൾ ലംഘിക്കുന്ന കമ്പനികൾക്കെതിരെ കർശന നടപടികളുണ്ടാകുമെന്ന് അണ്ടർസെക്രട്ടറി മുന്നറിയിപ്പ് നൽകി. അത്തരം കമ്പനികൾ സബ്‌സിഡി തുക പൂർണ്ണമായും തിരിച്ചടയ്‌ക്കേണ്ടി വരുന്നതിനൊപ്പം ഭാവിയിലെ സർക്കാർ പദ്ധതികളിൽ നിന്ന് അവരെ ഒഴിവാക്കുകയും ചെയ്യും.

സ്വകാര്യ മേഖലയെ പിന്തുണയ്ക്കുന്നതിനൊപ്പം ഉപഭോക്താക്കളുടെ താൽപ്പര്യം സംരക്ഷിക്കുകയും വിപണിയിൽ സ്ഥിരത ഉറപ്പാക്കുകയുമാണ് ഈ നടപടികളിലൂടെ ലക്ഷ്യമിടുന്നത്.

kuwait’s commerce ministry has announced new subsidies to control rising food prices, aiming to ease the cost of living and ensure stable supply of essential items.