കണ്ണൂര്‍: ഡെന്റല്‍ കോളജ് വിദ്യാര്‍ഥി നിതിന്‍ രാജിന്റെ മരണത്തില്‍ നിര്‍ണായക സിസിടിവി ദൃശ്യങ്ങള്‍ പൊലിസിന് ലഭിച്ചു. മരിക്കുന്നതിന് മുന്‍പായി പ്രിന്‍സിപ്പലിന്റെ മുറിയില്‍ നിന്ന് നിതിന്‍ കരഞ്ഞുകൊണ്ട് ഇറങ്ങിപ്പോകുന്ന ദൃശ്യങ്ങളാണ് പൊലിസിന് ലഭിച്ചത്. കോളജിനകത്തെ സിസിടിവി ദൃശ്യങ്ങളും, ചില രേഖകളും പ്രത്യേക അന്വേഷണ സംഘം കസ്റ്റഡിയിലെടുത്തിരുന്നു. 

പ്രിന്‍സിപ്പലിന്റെ മുറിയില്‍ നിന്ന് നിതിന്‍ ഇറങ്ങിവരുന്നത് കണ്ടതായി ദൃക്‌സാക്ഷികള്‍ മൊഴി നല്‍കിയിട്ടുണ്ട്. സംഭവം നടക്കുന്ന സമയത്ത് മുറിയില്‍ ആരൊക്കെ ഉണ്ടായിരുന്നുവെന്ന കാര്യവും പരിശോധിക്കുന്നുണ്ട്. വിശദമായ ചോദ്യം ചെയ്യലിന് ശേഷം മാത്രമേ കൃത്യമായ വിവരം ലഭ്യമാവൂ. 

അതേസമയം നിതിനെ മരണത്തിലേക്ക് നയിച്ചത് മൂന്ന് കാര്യങ്ങളാണെന്ന നിഗമനത്തിലാണ് പൊലിസ്. അധ്യാപകരില്‍ നിന്നും നേരിട്ട ജാതിവിവേചനവും, ലോണ്‍ ആപ്പുകാരുടെ സമ്മര്‍ദവും, പ്രിന്‍സിപ്പലും അധ്യാപകരും നടത്തിയ ചോദ്യം ചെയ്യലുമാണ് നിതിനെ സമ്മര്‍ദത്തിലാക്കിയത്. അധ്യാപികയായ ലതാ ശശിധരന്റെ ഗ്യാരണ്ടിയില്‍ ലോണ്‍ആപ്പില്‍ നിന്ന് 14000 രൂപയോളം നിതിന്‍ വായ്പയെടുത്തിരുന്നു. തിരിച്ചടവുമായി ബന്ധപ്പെട്ട് കടുത്ത സമ്മര്‍ദം നിതിനും അധ്യാപികക്കും നേരിടേണ്ടി വന്നുവെന്നാണ് റിപ്പോര്‍ട്ട്. 

ALSO READ: ഛത്തീസ്ഗഢിൽ പവർ പ്ലാന്റ് ബോയിലർ പൊട്ടിത്തെറിച്ചു: ഒമ്പത് മരണം; നിരവധി പേർക്ക് പരുക്ക് 

മരിക്കുന്നതിന് തലേദിവസം നിതിനെ ലോണ്‍ ആപ്പുകാര്‍ 98 തവണയും, അധ്യാപികയെ 26 തവണയും വിളിച്ചെന്നാണ് കണ്ടെത്തല്‍. ഇതോടെയാണ് അധ്യാപിക പ്രിന്‍സിപ്പലിനോട് കാര്യം അവതരിപ്പിക്കുന്നത്. മരിക്കുന്നതിന് തൊട്ടുമുന്‍പ് അധ്യാപികയും നിതിനും പ്രിന്‍സിപ്പലിന്റെ മുറിയിലെത്തി. പ്രിന്‍സിപ്പല്‍ നിതിന്റെ ഫോണ്‍ വാങ്ങിച്ചതിന് പിന്നാലെ കരഞ്ഞ് മുറിവിട്ട നിതിന്‍ കെട്ടിടത്തിന് മുകളില്‍ നിന്ന് ചാടുകയായിരുന്നുവെന്ന് പൊലിസ് പറയുന്നു.