വാഷിങ്ടണ്‍: പശ്ചിമേഷ്യന്‍ പ്രതിസന്ധി ഇന്ത്യയിലെ 25 ലക്ഷം മനുഷ്യരെ ദാരിദ്രത്തിലേക്ക് തള്ളിവിടുമെന്ന് ഐക്യരാഷ്ട്രസഭ റിപ്പോര്‍ട്ട്. ആഗോളതലത്തില്‍ 8.8 ദശലക്ഷം പേര്‍ ദാരിദ്ര്യത്തിലാകാന്‍ യുദ്ധം കാരണമാകുമെന്നും ഏഷ്യ-പസഫിക് മേഖലക്ക് 299 ബില്യണ്‍ യു.എസ് ഡോളര്‍ വരെ നഷ്ടമുണ്ടാകുമെന്നും ഐക്യരാഷ്ട്രസഭ റിപ്പോര്‍ട്ടില്‍ പറയുന്നു. 

'പശ്ചിമേഷ്യയിലെ യുദ്ധസാഹചര്യങ്ങള്‍ ഏഷ്യ-പസഫിക് മേഖലയിലെ ജനജീവിതത്തെ എങ്ങനെ ബാധിക്കും' എന്ന തലക്കെട്ടിലാണ് പുതിയ റിപ്പോര്‍ട്ട് പ്രസിദ്ധീകരിച്ചത്. ഇന്ത്യയിലെ ദാരിദ്ര്യ നിരക്ക് 23.9 ശതമാനത്തില്‍ നിന്ന് 24.2 ശതമാനമായി ഉയരുമെന്നാണ് കണക്കാക്കുന്നത്. 2,464,698 പേരെ ദാരിദ്ര്യത്തിലേക്ക് തള്ളിവിടുമെന്നാണ് റിപ്പോര്‍ട്ടില്‍ പറയുന്നത്. രാജ്യത്തെ ജനങ്ങളുടെ പുരോഗതിയില്‍ വലിയ നഷ്ടം വരുത്തുമെന്നും റിപ്പോര്‍ട്ട് പറയുന്നു. 

ALSO READ: 'f(f(O))>f(O)' യു.എസിന്റെ ഹോര്‍മുസ് ഉപരോധ ഭീഷണിക്ക് മറുപടിയായി ഇറാന്റെ 'ഗണിതശാസ്ത്ര' താക്കീത് 

ഇന്ധന പ്രതിസന്ധി വിലക്കയറ്റത്തിന് കാരണമാവും. ഗാര്‍ഹിക വാങ്ങല്‍ ശേഷി കുറക്കുകയും, ഭക്ഷ്യ അരക്ഷിതാവസ്ഥ വര്‍ധിപ്പിക്കുകയും ചെയ്യും. ഉപജീവന മാര്‍ഗങ്ങള്‍ ദുര്‍ബലപ്പെടുന്നതോടെ അതിജീവനം പ്രതിസന്ധിയിലാകുമെന്നും മുന്നറിയിപ്പുണ്ട്. ഇന്ത്യയുടെ ക്രൂഡ് ഓയില്‍ ഇറക്കുമതിയുടെ 40 ശതമാനത്തിലധികവും എല്‍പിജി ഇറക്കുമതിയുടെ 90 ശതമാനവും പശ്ചിമേഷ്യയില്‍ നിന്നാണ്. 

അതേസമയം ഇറാനും ഇസ്‌റാഈലും തമ്മിലുള്ള ആദ്യഘട്ട ചര്‍ച്ച പരാജയപ്പെട്ടതിന് പിന്നാലെ മേഖലയില്‍ പ്രതിസന്ധി തുടരുകയാണ്. അമേരിക്കന്‍ സൈന്യം ഇറാന്റെ തുറമുഖങ്ങളിലേക്കും പുറത്തേക്കുമുള്ള കപ്പല്‍ ഗതാഗതം തടയാന്‍ തുടങ്ങിയതായി റിപ്പോര്‍ട്ട്. ഇറാന്‍ തീരം തൊടാതെ മൂന്ന് കപ്പലുകള്‍ ഹോര്‍മുസ് കടന്നതായി യുഎസ് സെന്‍ട്രല്‍ കമാന്‍ഡ് അവകാശപ്പെട്ടു. ഇറാനില്‍ നിന്നുള്ള ക്രൂഡോയില്‍ കൂടി വിപണിയിലേക്ക് എത്താതിരുന്നാല്‍ വില ഇനിയും വര്‍ധിക്കും.