കല്പറ്റ: കല്‍പറ്റ എല്‍സ്റ്റണ്‍ എസ്റ്റേറ്റില്‍ മുണ്ടക്കൈ-ചൂരല്‍മല ഉരുള്‍പൊട്ടല്‍ ദുരന്തബാധിതര്‍ക്കായി സര്‍ക്കാര്‍ ഒരുക്കുന്ന ടൗണ്‍ഷിപ്പിലെ വീടുകള്‍ മെയ് 20-നകം കൈമാറണമെന്ന് ആവശ്യപ്പെട്ട് അതിജീവിതര്‍. ആദ്യഘട്ടത്തില്‍ ഫെയ്‌സ് വണ്ണില്‍ നിര്‍മാണം പുരോഗമിക്കുന്ന 178 വീടുകളുടെ നിര്‍മാണം പൂര്‍ത്തിയാക്കി മെയ് 20നകം കൈമാറണമെന്നാണ് ദുരന്തബാധ്യതര്‍ ആവശ്യപ്പെട്ടിരിക്കുന്നത്.  മഴക്കുമുന്‍പേ കൈമാറണമെന്നും ജില്ലാ ഭരണകൂടത്തോട് അതിജീവിതര്‍ ആവശ്യപ്പെട്ടു.  

178 വീടുകളുടെയും താക്കോല്‍ദാനവും പട്ടയംകൈമാറ്റവും മാര്‍ച്ച് ഒന്നിന് നടത്തിയിരുന്നു. വിഷുവിനുമുന്‍പ് താമസം തുടങ്ങാനാകുമെന്നാണ് ചടങ്ങില്‍ സര്‍ക്കാറും ജില്ലാഭരണകൂടവും ദുരന്തബാധിതര്‍ക്ക് ഉറപ്പുനല്‍കിയിരുന്നത്. എന്നാല്‍ പറഞ്ഞ വാക്ക് പാലിക്കപ്പെട്ടിട്ടില്ല- ദുരന്തബാധിതര്‍ ചൂണ്ടിക്കാട്ടുന്നു. 

ALSO READ: ചൂരല്‍മല-മുണ്ടക്കൈ പുനരധിവാസം; സര്‍ക്കാര്‍ നടപടി ചോദ്യംചെയ്ത് എല്‍സണ്‍ എസ്‌റ്റേറ്റ് നല്‍കിയ അപ്പീല്‍ തള്ളി സുപ്രീം കോടതി

ഇതില്‍ 40 വീടുകള്‍ നേരത്തെ താമസയോഗ്യമാക്കിയിരുന്നു. എന്നാല്‍, ഫെയ്‌സ് വണ്ണിലെ മുഴുവന്‍ വീടുകളും താമസ യോഗ്യമാക്കിയ ശേഷം ഒരുമിച്ചേ താമസം തുടങ്ങുന്നുള്ളൂവെന്ന് ദുരന്തബാധിതര്‍ ജില്ലാഭരണകൂടത്തെ അറിയിക്കുകയായിരുന്നു.

 40 വീടുകളുടെ നിര്‍മാണം പൂര്‍ത്തിയായെന്ന് പറയുന്നുണ്ടെങ്കിലും ഇവിടെ സുവിജ് ട്രീറ്റ്‌മെന്റ് പ്‌ളാന്റിന്റെയും കുടിവെള്ളവിതരണശൃംഖലയുടെയും പ്രവൃത്തികള്‍ നടക്കുകയാണ്. സുവിജ് പൈപ്പ്‌ലൈന്‍ സ്ഥാപിക്കലും നടക്കുന്നുണ്ട്.  10 പ്ലാന്റുകളാണ് അഞ്ച് സോണുകളിലുമായി നിര്‍മിക്കുന്നത്. നാലാം സോണിലെ 9.5 ലക്ഷം സംഭരണശേഷിയുള്ള കുടിവെള്ളസംഭരണിയില്‍നിന്ന് വീടുകളിലേക്കുള്ള പൈപ്പ്‌ലൈന്‍ സ്ഥാപിക്കലും ഇതോടൊപ്പം നടക്കുന്നുണ്ട്. ഒന്ന്, മൂന്ന്, നാല് സോണുകളില്‍ വീടുകളുടെ മിനുക്കുപണികളും പുരോഗമിക്കുന്നു.

ALSO READ: മുണ്ടക്കൈ, ചൂരല്‍മല പുനരധിവാസം വേഗത്തിലാക്കണം;  കര്‍ശന നിര്‍ദേശം നല്‍കി മുഖ്യമന്ത്രി

അതേസമയം,  മഴക്കുമുന്‍പേ താമസം തുടങ്ങിയില്ലെങ്കില്‍ തങ്ങളുടെ ജീവിതം ഇനിയും പ്രയാസത്തിലാകുമെന്ന ആധിയിലാണ് ദുരന്തബാധിതര്‍. തുടര്‍ന്നാണ് മെയ് 20-നകം വീടുകള്‍ കൈമാറണമെന്ന ആവശ്യവുമായി മുന്നോട്ടുവന്നതെന്ന് അവര്‍ ചൂണ്ടിക്കാട്ടുന്നു.

ALSO READ: ഒരു ഗുളിക വാങ്ങണമെങ്കില്‍ പോലും 13 കിലോമീറ്റര്‍ പോവണം;  ഒരു വര്‍ഷമായിട്ടും സാധാരണ നിലയിലാവാതെ ചൂരല്‍മലക്കാരുടെ ജീവിതം

landslide survivors in kalpetta urge authorities to hand over 178 township houses before may 20 ahead of monsoon delays